គណៈកម្មការលទ្ធកម្មឃុំកណ្តែក ស្រុកប្រាសាទបាគង ខេត្តសៀមរាប បានប្រកាសបញ្ចប់ការដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែងជាង១០០ម៉ែត្រ ប្រកបដោយជោគជ័យ នៅថ្ងៃទី១៩ ខែសីហា ឆ្នាំ២០២៤ ក្រោមការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ និងក្រុមហ៊ុនម៉ៅការ ព្រមទាំងអ្នកពាក់ព័ន្ធជាច្រើនរូប។
លោក ភ្លន់ សេដ្ឋា សមាជិកគណៈកម្មការលទ្ធកម្មឃុំកណ្តែក ស្រុកប្រាសាទបាគង បានឱ្យដឹងថា៖គម្រោងមូលនិធិឃុំឆ្នាំ២០២៤នេះ សម្រាប់ឃុំកណ្តែក បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១៦៧ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ដាក់លូការពារផ្លូវ១កំប្លេ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៩៩.៧៦១.៨០០រៀល ដោយមានក្រុមហ៊ុនចំនួន៧ បានដាក់សំណើរដេញថ្លៃ។ ជាលទ្ធផលបានទៅលើក្រុមហ៊ុន សុខ មករា ក្នុងតម្លៃ ៤៩.២៦៥.០០០រៀល។
ជាមួយនឹងការទទួលបានសិទ្ធិនៃជួសជុលនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុត្តនៃការសាងសង់ និងគោរពទៅតាមលក្ខខណ្ឌផ្សេងៗដែលមានចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទនិងរូបភាព៖ លោក ស៊ុំ គីន
កែសម្រួល៖ យូ វង្ស
