នៅសណ្ឋាគារអង្គរសេនជូរី ខេត្តសៀមរាប នាព្រឹកថ្ងៃទី២០ ខែសីហា ឆ្នាំ២០២៤នេះ មានរៀបចំកិច្ចប្រជុំរបស់គណៈកម្មាធិការព្រំដែនថ្នាក់យោធភូមិភាគរវាងយោធភូមិភាគទី៤កម្ពុជា និងយោធភូមិភាគទី២ថៃ លើកទី២៥ ក្រោមកិច្ចដឹកនាំប្រជុំដោយលោកឧត្តមសេនីយ៍ទោ សុក រីនណា នាយសេនាធិការយោធភូមិភាគទី៤ ប្រធានលេខាគណៈកម្មាធិការព្រំដែនថ្នាក់ភូមិភាគ កម្ពុជា-ថៃ និងលោកឧត្តមសេនីយ៍ត្រី សុមថុប ផារ៉ាវ៉េត នាយសេនាធិការយោធភូមិភាគទី២ នៃព្រះរាជាណាចក្រថៃ ជាសហប្រធានក្រុមលេខា ដោយមានការចូលរួមពីអ្នកពាក់ព័ន្ធនៃខេត្តក្នុងយោធភូមិភាគទី៤ កម្ពុជា និងយោធភូមិភាគទី២ ថៃ ជាច្រើនរូប។
ក្នុងកិច្ចប្រជុំនេះថ្នាក់ដឹកនាំយោធភូមិភាគនៃប្រទេសទាំង២ បានបង្ហាញថា ក្នុងរយៈកាលកន្លងមក ក្រុមលេខាធិការគណៈកម្មាធិការព្រំដែនថ្នាក់ភូមិភាគ កម្ពុជា-ថៃ បានពិភាក្សារួមគ្នាជាផ្លូវការ និងក្រៅផ្លូវការជាបន្តបន្ទាប់ ក្នុងការទំនាក់ទំនងកិច្ចសហប្រតិបត្តិការរួមគ្នា ដើម្បីដោះស្រាយបញ្ហាដែលនៅសេសសល់ដោយភាពស្មោះត្រង់ និងការយោគយល់គ្នាទៅវិញទៅមក ដើម្បីជំរុញការអនុវត្តរបស់កងឯកភាពមូលដ្ឋានឱ្យប្រព្រឹត្តទៅតាមគណៈកម្មាធិការព្រំដែនថ្នាក់ភូមិភាគកំណត់ទុក ដែលនាំទៅដល់សភាពស្ងប់ស្ងាត់ សុវត្ថិភាពនៅតំបន់ព្រំដែន។
លោកឧត្តមសេនីយ៍ទោ សុក រីនណា បានគូសបញ្ជាក់ថា កិច្ចប្រជុំរួមក្រុមលេខានាថ្ងៃនេះ លោកសង្ឃឹមថា នឹងទទួលបានការរួមសហប្រតិបត្តិការកំណត់នូវ វិធានការក្នុងការដោះស្រាយបញ្ហាដែលនៅសេសសល់ រួមទាំងសហប្រតិបត្តិការគ្នាចងក្រងកំណត់ហេតុ នៃកិច្ចសហប្រតិបត្តិការប្រកបដោយផលប្រយោជន៍រួមគ្នា ក្នុងការប្រតិបត្តិរបស់ភាគីទាំងពីរ ដើម្បីលើកសំណើជូនគណៈកម្មាធិការព្រំដែនពិចារណា ដែលនិងនាំមកជាមួយនូវផលប្រយោជន៍ជូនដល់ប្រជាពលរដ្ឋនៃប្រទេសទាំងពីរជារៀងរហូត។ ម៉្យាងទៀតកិច្ចប្រជុំពិភាក្សានានាថ្នាក់យោធភូមិភាគរបស់យើងទាំងពីរ តែងតែបានដំណើរការជារៀងរហូតមក ក្នុងគោលបំណងពង្រឹង និងពង្រីក ចំណងកិច្ចសហប្រតិបត្តិការល្អ ធានាបាននូវ សុខសន្តិភាព ស្ថិរភាព សណ្តាប់ធ្នាប់ ជូនប្រជាពលរដ្ឋរបស់យើង។
ព័ត៌មានជាតិ ថ្មីៗ
លោកបន្តថា កិច្ចប្រជុំក្រុមលេខាធិការគណៈកម្មាធិការព្រំដែនថ្នាក់យោធភូមិភាគទាំងពីរនាថ្ងៃនេះ គឺផ្តោតលើការពិភាក្សាសំខាន់ទៅលើលទ្ធផល ក្នុងការអនុវត្តកន្លងមក និងការដោះស្រាយរាល់បញ្ហាដែលនៅសេសសល់ ហើយធ្វើការបូកសរុបដើម្បីដាក់ជូន សហប្រធានក្នុងកិច្ចប្រជុំគណៈកម្មាធិការព្រំដែនថ្នាក់យោធភូមិភាគពិនិត្យនិងសម្រេច។ លោកសង្ឃឹមជឿជាក់ថា កិច្ចប្រជុំរបស់ក្រុមលេខាធិការនាពេលនេះ នឹងបានកសាងនូវអត្ថប្រយោជន៍ជាច្រើនក្នុងការកសាងទំនុកចិត្ត ភាពជឿជាក់ និងការផ្លាស់ប្ដូររយោបល់ទៅវិញទៅមក ក្នុងន័យស្ថាបនាឈានទៅរកការឯកភាពជាគោលការណ៍ ដែលធានាឱ្យកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ កងយោធពលខេមរភូមិន្ទកម្ពុជា ជាមួយយោធភូមិភាគទី២ កងទ័ពភូមិន្ទថៃ ដែលនឹងប្រព្រឹត្តទៅនាពេលខាងមុខនេះ បានប្រកបដោយលទ្ធផលជាវិជ្ជមាន។
សូមជម្រាបថា ឆ្លងទៅលើលទ្ធផលនៃកំណត់ហេតុអង្គប្រជុំ ភាគីកម្ពុជា និងថៃ ក៏បានធ្វើការចុះហត្ថលេខា ដោយសហប្រធានក្រុមលេខាលើខ្លឹមសារ១៨ចំណុចដែលបានឯកភាព ក្នុងនោះដោយផ្តោតទៅលើ វិស័យសន្តិសុខ រក្សាសុវត្ថិភាព ស្ថិរភាព តំបន់ភូមិសាស្ត្រព្រំដែនជាដើម៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
