បច្ចុប្បន្នមិនមែនមានតែប្រទេសកម្ពុជាមួយទេ ដែលមានការចម្លងមេរោគអេដស៍ និងបញ្ហាគ្រឿងញៀន តែវាគឺជាបញ្ហាសាកល ដែលទាំងនេះគឺជាបញ្ហាប្រឈមនិងមានផលប៉ះពាល់ខ្លាំង ចំពោះអ្នកបម្រើការតាមទីតាំងសេវាកម្មកម្សាន្តមួយចំនួន ហើយបញ្ហានេះដែរក្រសួង ស្ថាប័នពាក់ព័ន្ធបាននឹងកំពុងយកចិត្តដាក់ខ្ពស់ទៅលើបញ្ហាទាំងអស់នេះ តាមរយៈការផ្សព្វផ្សាយ និងជួយដោះស្រាយជូនដល់ពួកគាត់ទាំងនោះ។
នេះបើតាមការលើកឡើងរបស់ឯកឧត្តម វេជ្ជបណ្ឌិត ហ៊ុយ ហាងសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ក្នុងសិក្ខាសាលាស្តីពីលក្ខខណ្ឌនៃការទទួលបានការលើកសសើរសម្រាប់សហគ្រាស គ្រឹះស្ថាន ក្រុមហ៊ុនផ្នែកសេវាកម្សាន្ត ដែលអនុវត្តតាមប្រការលេខ០៨៦ ប្រការលេខ១៩៤ និងសេចក្តីណែនាំលេខ០០៨ ស្តីពីការប្រយុទ្ធប្រឆាំងគ្រឿងញៀនខុសច្បាប់នៅតាមសហគ្រាស គ្រឺះស្ថាន និងរបៀបរៀបចំគណៈកម្មការ គោលនយោបាយ និងកម្មវិធីផ្សព្វផ្សាយអប់រំពីអេដស៍ និងគ្រឿងញៀន ដែលរៀបចំឡើងនៅមន្ទីរការងារ និងបណ្តុះបណ្តាលវិជ្ជាជីវៈ ខេត្តសៀមរាប នាថ្ងៃទី២១ ខែសីហា ឆ្នាំ២០២៤នេះ។
ឯកឧត្តមវេជ្ជបណ្ឌិត មានប្រសាសន៍ថា ចំពោះបញ្ហាទាំងអស់នេះ ក្រសួងការងារមានតួនាទីក្នុងការពារសុខភាព សុវត្ថិភាព និងជាអាជ្ញាកណ្ដាល ទប់ស្កាត់មិនឱ្យមានការរំលោភបំពានសិទ្ធិសម្រាប់អ្នកធ្វើការផ្នែកឯកជនទាំងនិយោជិក និងនិយោជក់ ដោយមានអង្គការអាយឡូ (ILO) ជាអ្នកគាំទ្រ និងបង្កើតច្បាប់ បង្កើតធម្មនុញ្ញជាគោលការណ៍ត្រីភាគីដែលសកលលោកដែលត្រូវគោរពតាម ក្នុងនាមប្រទេសកម្ពុជា ជាប្រទេសមួយក្នុងចំណោមប្រទេសទាំង៧ លើសកលលោកដែលអាចនឹងសម្រេចគោលដៅលុបបំបាត់បញ្ហាទាំងអស់នេះនៅឆ្នាំ២០៣០។
ឯកឧត្តមបន្តថា សម្រាប់សិក្ខាសាលានាពេលនេះដែរ មានគោលបំណង ពង្រឹងការចូលរួមឆ្លើយតបនឹងមេរោគអេដស៍ និងជំងឺអេដស៍ដើម្បីឈានឆ្ពោះទៅការបញ្ចប់អេដស៍នៅឆ្នាំ២០២៥ និងបំប៉នចំណេះដឹងអំពីវិធីសាស្ត្រក្នុងការរៀបចំរចនាសម្ព័ន្ធគណៈកម្មការឬក្រុមការងារអេដស៍ និងគ្រឿងញៀនដល់គ្រឹះស្ថាន ក្រុមហ៊ុនផ្នែកសេវាកម្សាន្ត ដូចជាការចែករំលែកវឌ្ឍនភាពព័ត៌មានទាក់ទងនឹងការឆ្លើយតបមេរោគអេដស៍ និងជំងឺអេដស៍ និងគ្រឿងញៀន, របៀបនៃការរៀបចំបង្កើតគណៈកម្មការ ឬក្រុមការងារអេដស៍និងគ្រឿងញៀន, ពង្រឹងការចូលរួមរបស់គ្រឹះស្ថាន ក្រុមហ៊ុនផ្នែកសេវាកម្សាន្ត ក្នុងការអប់រំផ្សព្វផ្សាយបញ្ហាអេដស៍ និងគ្រឿងញៀនជាប្រចាំដល់កម្មករនិយោជិត។
បើតាម លោក ច័ន្ទ សុខុមចិន្តា ប្រធានមន្ទីក្រសួងការងារ និងបណ្តុះបណ្តាលវិជ្ជាជីវៈខេត្តសៀមរាប បានបង្ហាញថា ចាប់ពីឆ្នាំ២០០៩-២០២៥ មន្ទីបានរៀបចំសិក្ខាសាលា កិច្ចប្រជុំ និងបណ្តុះបណ្តាលអំពីកម្មវិធីអេដស៍ និងគ្រឿងញៀនជូនដល់ម្ចាស់សហគ្រាស គ្រិះស្ថានក្នុងខេត្តបានចំនួន៦លើក ដែលមានអ្នកចូលរួមជាង ១០០នាក់។ ជាមួយនោះក្រុមការងារអធិការកិច្ចការងារបានចុះផ្សព្វផ្សាយអំពីប្រការ និងសេចក្តីណែនាំនានារបស់ក្រសួង និងជំរុញឱ្យសហគ្រាស គ្រឹះស្ថាន បង្កើតនៅគណៈកម្មការគោលនយោបាយអេដស៍ និងគ្រឿងញៀនព្រមទាំងជនបង្គោលនូវកន្លែងធ្វើការ ដើម្បីទប់ស្កាត់ការរីករាយដោយមេរោគអេដស៍ជំងឺអេដស៍ និងបញ្ហាគ្រឿងញៀនជាប្រចាំផងដែរ៕
អត្ថបទ៖ កញ្ញា ប្រ៊ន ស្រីនិត
រូបភាព៖ លោក អ៊ុន ណារាជ្យ
