កាលពីរសៀលថ្ងៃទី២០ ខែសីហា ឆ្នាំ២០២៤ កម្ពុជា បានទទួលសិទ្ធិធ្វើជាម្ចាស់ផ្ទះនៃកិច្ចប្រជុំគណៈកម្មាធិការព្រំដែនថ្នាក់យោធាភូមិភាគ កម្ពុជា-ថៃ លើកទី២៥ ឆ្នាំ២០២៤ នៅលើទឹកដីនៃខេត្តសៀមរាប នៃយោធភូមិភាគទី៤ កម្ពុជា និងយោធភូមិភាគទី២ ថៃ ដើម្បីជាការពង្រឹង និងពង្រីកចំណងកិច្ចសហប្រតិបត្តិការល្អ ធានាបាននូវសុខសន្តិភាព ស្ថិរភាព សណ្តាប់ធ្នាប់ និងរឹតចំណងមិត្តភាព រវាងប្រទេសទាំងពីរកម្ពុជាថៃ។
ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ ជាសហប្រធានភាគីកម្ពុជា បានសម្ដែងភាពរីករាយក្នុងឱកាសដែលភាគីខាងកម្ពុជា ធ្វើជាម្ចាស់ផ្ទះរៀបចំកិច្ចប្រជុំ ជាមួយភាគីថៃនាពេលនេះ ដើម្បីលើកស្ទួយ និងរឹតចំណងទំនាក់ទំនងមិត្តភាពដ៏ល្អរវាងកម្ពុជាថៃ ឱ្យមានភាពរឹងមាំ ពង្រឹងពង្រីក សន្តិសុខ ស្ថិរភាព សុវត្ថិភាព និងការអភិវឌ្ឍន៍ជូនដល់ប្រជាជននៃប្រទេសទាំងពីរដែលរស់តាមបណ្ដោយខ្សែបន្ទាត់ព្រំដែន។ ជាមួយនេះក៏សូមថ្លែងនូវការកោតសរសើរដល់កិច្ចសហប្រតិបត្តិការយ៉ាងជិតស្និត ដែលសមត្ថកិច្ចនៃប្រទេសទាំងពីរ បានផ្ដល់ផលល្អចំពោះការអភិវឌ្ឍន៍ ស្ថិរភាព សន្តិភាព របៀបរៀបរយតាមបណ្តោយខ្សែបន្ទាត់ព្រំដែន ព្រមទាំងបានសំណូមពរឱ្យភាគីទាំងពីរបង្កើនកិច្ចសហប្រតិបត្តិការយ៉ាងជិតស្និតក្នុងការដោះស្រាយបញ្ហាដែលនៅសេសសល់តាមបណ្ដោយខ្សែបន្ទាត់ព្រំដែនឱ្យកាន់តែមានភាពល្អប្រសើរ។
ឧត្តមសេនីយ៏ទោ អាឌុន ប៊ុនថាំចារើន មេបញ្ជាការយោធភូមិភាគទី២ នៃកងទ័ពភូមិន្ទថៃ បានថ្លែងអំណរគុណយ៉ាងកក់ក្ដៅ និងរីករាយក្នុងឱកាសដែលបានមកចូលរួមកិច្ចប្រជុំជាមួយភាគីកម្ពុជា ហើយក៏សូមអបអរសាទរចំពោះភាពជឿនលឿនលើកិច្ចសហប្រតិបត្តិការទាំងទ្វេភាគី ក្នុងការដោះស្រាយបញ្ហាការងារសន្តិសុខនៅក្នុងតំបន់ព្រំដែន ដើម្បីលើកស្ទួយដល់ការទំនាក់ទំនងល្អជាមួយគ្នា និងអបអរសាទរចំពោះ កិច្ចសហប្រតិបត្តិការក្នុងការជួយគ្នាទៅវិញទៅមកផងដែរ។
សូមជម្រាបថា ក្នុងកិច្ចប្រជុំនេះ ភាគីទាំងពីរបានសន្យាបន្តជំរុញ និងគាំទ្រកិច្ចសហប្រតិបត្តិការទ្វេភាគី លើគ្រប់វិស័យឱ្យកាន់តែមានភាពល្អប្រសើរ និងបានឯកភាពគ្នារៀបចំឱ្យមានកិច្ចប្រជុំគណៈកម្មការព្រំដែនថ្នាក់យោធភូមិភាគ កម្ពុជា-ថៃ លើកទី២៦ ប្រចាំឆ្នាំ២០២៥ នៅព្រះរាជាណាចក្រថៃ។ ភាគីទាំងពីរក៏បានឯកភាពចុះហត្ថលេខារួមគ្នាលើកំណត់ហេតុកិច្ចប្រជុំសហប្រតិបត្តិការ គណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ លើកទី២៥ រវាងយោធភូមិភាគទី៤ កម្ពុជា និងយោធភូមិភាគទី២ ថៃ ប្រចាំឆ្នាំ២០២៤ ហើយនឹងមានការប្រគល់ជូននូវវត្ថុអនុស្សាវរីយ៍ឱ្យគ្នាទៅវិញទៅមកផងដែរ៕
អត្ថបទ និងរូបភាព៖ លោក មុី សុខារិទ្ធ, បូ សាវី
កែសម្រួល៖ លោក អ៊ុន ណារាជ្យ
