លេខាធិការដ្ឋានរៀបចំការបោះឆ្នោតខេត្តសៀមរាប (ល.ខ.ប) នៅថ្ងៃទី២២ ខែសីហា ឆ្នាំ២០២៤នេះ បានបើកវគ្គបណ្តុះបណ្តាលស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៤ ជូនដល់គ្រូបង្ហាត់ក្រុងស្រុក មន្ត្រី ល.ខ.ប តំណាងគណបក្សនយោបាយ សមាគម អង្គការ មិនមែនរដ្ឋាភិបាល និងភាគីពាក់ព័ន្ធ រយៈពេលពីរថ្ងៃ ចាប់ពីថ្ងៃទី២២-២៣ ខែសីហា ឆ្នាំ២០២៤។
លោក អ៊ាម ស៊ីណា អនុប្រធានលេខាធិការដ្ឋានរៀបចំការបោះឆ្នោតខេត្ដសៀមរាប មានប្រសាសន៍ថា វគ្គបណ្តុះបណ្តាលនេះ ផ្តោតលើប្រធានបទសំខាន់ៗមួយចំនួនដូចជា តួនាទី និងភារកិច្ចរបស់ ល.ខ.ប ក្រុមប្រឹក្សាឃុំសង្កាត់ និងក្រុមចុះឈ្មោះបោះឆ្នោតដំណើរប្រព្រឹត្តទៅនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ជំហានទាំង៤ នៃការចុះឈ្មោះបោះឆ្នោត និងករណីផ្សេងៗពាក់ព័ន្ធនឹងការពិនិត្យបញ្ជីឈ្មោះ និងការចុះឈ្មោះបោះឆ្នោត។ នីតិវិធីនៃការស្នើសុំ និងការចេញឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោត និងលិខិតបញ្ជាក់ទីលំនៅក្នុងឃុំសង្កាត់។ ការដាក់ ការទទួល និងការដោះស្រាយពាក្យបណ្តឹងទាក់ទងនឹងដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត។ ការប្រើប្រាស់ទម្រង់ និងការវេចខ្ចប់សម្ភារឯកសារ ការវេចខ្ចប់ការបញ្ជូន និងការត្រួតពិនិត្យស្បោង “ខ”បញ្ជូនទៅ ល.ខ.ប និងស្បោង “គ” បញ្ជូនទៅ គ.ជ.ប ការបិទផ្សាយបញ្ជីបោះឆ្នោតដំបូង។ ការណែនាំអំពីឧបករណ៍និងកម្មវិធីចុះឈ្មោះបោះឆ្នោតការប្រើប្រាស់ផ្ទាំងកម្មវិធី Dashboard តាមប្រព័ន្ធកុំព្យូទ័រ ប្រើប្រាស់សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត។
លោក អ៊ាម ស៊ីណា មានប្រសាសន៍ទៀតថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ត្រូវធ្វើតាមប្រព័ន្ធកុំព្យូទ័រ និងការបញ្ជូនតាមប្រព័ន្ធអ៊ីនធើណិត មកនាយកដ្ឋានគ្រប់គ្រងទិន្នន័យអ្នកបោះឆ្នោតនិងបញ្ជីបោះឆ្នោតជាប្រចាំ ដើម្បីរៀបចំបញ្ជីបោះឆ្នោតដំបូង សម្រាប់បិទផ្សាយបម្រើឱ្យគោលដៅនៃការប្តឹងតវ៉ាឬ/និងការប្តឹងជំទាស់បន្ទាប់មកផ្តល់សុពលភាពជាបញ្ជីបោះឆ្នោតផ្លូវការឆ្នាំ២០២៤ សម្រាប់ប្រើប្រាស់តាមតម្រូវការនៃច្បាប់។ ក្រៅពីចំណុចសំខាន់ៗខាងលើនេះ ការងារដែលត្រូវធ្វើបន្តទៀត ក្រោយពីទទួលបានទិន្នន័យអំពីការចុះឈ្មោះបោះឆ្នោត គ.ជ.ប ត្រូវធ្វើការផ្តល់សុពលភាពលើបញ្ជីបោះឆ្នោតផ្លូវការឆ្នាំ២០២៤ សម្រាប់ធ្វើជាមូលដ្ឋាន ក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតនាឆ្នាំបន្តបន្ទាប់ទៀត។ លោកក៏បានអំពាវដល់សិក្ខាកាម ត្រូវយកចិត្តទុកដាក់ស្ដាប់ទាំងផ្នែកទ្រឹស្តី ទាំងផ្នែកបច្ចេកទេសឱ្យបានល្អបំផុត ដើម្បីយកចំណេះដឹងទៅចែករំលែកបន្ដដល់ក្រុមចុះឈ្មោះបោះឆ្នោត និងគ្រប់ភាគីទាំងឱ្យបានល្អប្រសើរ។
សូមជម្រាបថា នៅខែកញ្ញាឆ្នាំ២០២៤ ខាងមុខនេះ គ.ជ.ប នឹងចាប់ផ្តើមពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំនៅតាមឃុំសង្កាត់ទូទាំងប្រទេស ដែលនឹងត្រូវអនុវត្តចាប់ពីថ្ងៃទី១-១៦ ខែកញ្ញា ឆ្នាំ២០២៤។ ការចុះឈ្មោះបោះឆ្នោតឆ្នាំនេះ គ.ជ.ប បានកំណត់អាយុ១៨ឆ្នាំ ត្រូវគិតដល់ថ្ងៃទី៣០ ខែវិច្ឆិកា ឆ្នាំ២០២៤។ សម្រាប់ប្រជាពលរដ្ឋខ្មែរដែលមិនទាន់បានចុះឈ្មោះបោះឆ្នោតដែលទើបគ្រប់អាយុ ១៨ឆ្នាំ អ្នកដែលបានផ្លាស់លំនៅឋាន ឬទីសំណាក់ចូលថ្មី មានសិទ្ធិស្នើសុំចុះឈ្មោះបោះឆ្នោតនៅក្នុងឃុំ សង្កាត់ ដែលខ្លួនកំពុងរស់នៅ ឬស្នាក់អាស្រ័យនៅជាក់ស្តែង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ