នៅសាលាខេត្តសៀមរាប នាព្រឹកថ្ងៃទី២៣ ខែសីហា ឆ្នាំ២០២៤នេះ មានរៀបចំកិច្ចប្រជុំស្ដីពីការត្រៀមរៀបចំប្រារព្ធព្រឹត្តិការណ៍ Pre-Gumball 3000 Rally in Cambodia នៅខេត្តសៀមរាប រយៈពេល២ថ្ងៃ ចាប់ពីថ្ងៃទី៣១ ខែសីហា ដល់ថ្ងៃទី០១ ខែកញ្ញា ឆ្នាំ២០២៤ ដើម្បីចូលរួមជំរុញទេសចរណ៍ក្នុងស្រុក និងជាកម្មវិធីអមព្រឹត្តិការណ៍ Gumball 3000 Rally in Cambodia ដែលកិច្ចប្រជុំនេះដឹកនាំដោយ ឯកឧត្តម គុជ បញ្ញាសា រដ្ឋលេខាធិកាក្រសួងទេចរណ៍ និង លោក ង៉ូវ សេងកាក់ អភិបាលរងខេត្តសៀមរាប និងមានការចូលរួមពីអ្នកពាក់ព័ន្ធជាច្រើនរូប។
ឯកឧត្តម គុជ បញ្ញាសា បានបញ្ជាក់ថា ព្រឹត្តិការណ៍ Pre-Gumball 3000 Rally in Cambodia មានរយៈពេល២ថ្ងៃ គឺថ្ងៃទី៣១ ខែសីហា ដល់ថ្ងៃទី០១ ខែកញ្ញា ឆ្នាំ២០២៤ខាងមុខ នៅទីតាំងសួនច្បារព្រះរាជដំណាក់ក្រុងសៀមរាប និងអាកាសយានដ្ឋានចាស់។ ព្រឹត្តិការណ៍នេះធ្វើឡើងក្នុងគោលបំណងផ្សព្វផ្សាយពីព្រឹត្តិការណ៍ Gumball 3000 Rally in Cambodia ដែលនឹងប្រព្រឹត្តិទៅចាប់ថ្ងៃទី១៥-១៧ ខែកញ្ញា ឆ្នាំ២០២៤ នៅរាជធានីភ្នំពេញ និងខេត្តសៀមរាប ឱ្យបានទូលំទូលាយ ក្នុងនាមកម្ពុជាធ្វើជាម្ចាស់ផ្ទះ ព្រមទាំងដើម្បីចូលរួមគាំទ្រយុទ្ធនាការ “ទស្សនាសៀមរាប ឆ្នាំ២០២៤” “ឆ្នាំនៃការផ្លាស់ប្ដូរប្រជាជន និងប្រជាជន កម្ពុជា-ចិន ២០២៤” “ឆ្នាំទេសចរណ៍កម្ពុជា-ឥណ្ឌាលើកទី១” និងជាការជំរុញទេសចរណ៍ក្នុងស្រុក ក៏ដូចជាគាំទ្រយុទ្ធសាស្ត្រ “បង្កើន៥ និងអភិវឌ្ឍ៣” របស់ក្រសួងទេសចរណ៍។
ឯកឧត្តមរដ្ឋលេខាធិកាបញ្ជាក់ទៀតថា ព្រឹត្តិការណ៍នេះដែរ សម្រាប់ថ្ងៃទី៣១ ខែសីហា នឹងរៀបចំនៅទីតាំងសួនច្បារព្រះរាជដំណាក់ក្រុងសៀមរាប ជាមួយនឹងការដាក់តាំងបង្ហាញរថយន្តសេរីទំនើប ការរៀបចំស្តង់ពិពណ៌ផ្សេងៗ រួមនឹងកម្មវិធីប្រគំតន្ត្រីដែលមានការចូលរួមពីសំណាក់តារាល្បីនៃប្រទេសកម្ពុជាជាច្រើន។ ហើយសម្រាប់ថ្ងៃទី០១ ខែកញ្ញា នឹងមានរៀបចំកម្មវិធីតាំងបង្ហាញរថយន្ត ឱ្យសាធារណៈជូនចូលទស្សនាដោយសេរីនៅក្នុងទីតាំងអាកាសយានដ្ឋានចាស់ខេត្តសៀមរាប។ ជាមួយនឹងការរៀបចំនេះ ឯកឧត្តមបានស្នើដល់អាជ្ញាធរខេត្ត ចូលរួមសហការក្នុងការរៀបចំព្រឹត្តិការណ៍នេះឱ្យប្រព្រឹត្តិទៅដោយរលូន និងទទួលបានជោគជ័យតាមការរំពឹងទុក។
ក្នុងនាមអាជ្ញាធរខេត្ត លោក ង៉ូវ សេងកាក់ អភិបាលរងខេត្ត បានបង្ហាញការគាំទ្រចំពោះការរៀបចំព្រឹត្តិការណ៍នេះ ដែលជាព្រឹត្តិការណ៍ដ៏ធំ និងពិសេសមិនធ្លាប់មាននៅកម្ពុជា ជាព្រឹត្តិការណ៍នៃការជួយជំរុញពីសក្តានុពលវិស័យទេសចរណ៍នៅកម្ពុជា ពិសេសខេត្តសៀមរាប ទៅកាន់ពិភពលោកតាមរយៈការចូលរួមពីបុគ្គលល្បីៗមកពីបណ្ដាប្រទេសនានាដែលបានចូលរួមក្នុងព្រឹត្តិការណ៍នេះ។ ជាមួយនេះលោកក៏បានជំរុញដល់គ្រប់អ្នកពាក់ព័ន្ធ ត្រូវសហការរៀបចំឱ្យបានល្អ ទាំងការងារសន្តិសុខ សណ្ដាប់ធ្នាប់ របៀបរៀបរយ សោភ័ណភាពនៅតាមទីតាំងរៀបចំកម្មវិធី។ ជាពិសេសត្រូវមានកម្លាំងប្រចាំការជាប្រចាំនៅតាមទីតាំងទាំងនោះ ហើយត្រូវមានក្រុមគ្រូពេទ្យប្រចាំការ ដើម្បីបង្ការនៅពេលមានបញ្ហាអ្វីមួយកើតឡើង។ ក្នុងនោះក៏សូមស្នើដល់អ្នកពាក់ព័ន្ធទាំងអស់ចូលរួមផ្សព្វផ្សាយពីព្រឹត្តិការណ៍នេះឱ្យបានទូលំទូលាយទៅដល់សាធារណជនទូទៅឱ្យពួកគាត់បានមកចូលរួមក្នុងព្រឹត្តិការណ៍នេះឱ្យបានគ្រប់ៗគ្នា ដើម្បីជាការជំរុញកំណើនសេដ្ឋកិច្ចប្រជាពលរដ្ឋក្នុងមូលដ្ឋានផងដែរ៕
អត្ថបទ និងរូបភាព៖ លោក អ៊ុន ណារាជ្យ
