កម្ពុជាក្នុងនាមជាម្ចាស់ផ្ទះ នៅថ្ងៃទី២៣ ខែសីហា ឆ្នាំ២០២៤នេះ បានរៀបចំកិច្ចប្រជុំថ្នាក់ដឹកនាំក្រុមហ៊ុនអគ្គិសនីរដ្ឋនៃបណ្ដាប្រទេសអាស៊ានលើកទី៤០ និងកិច្ចប្រជុំពាក់ព័ន្ធ ដែលកិច្ចប្រជុំនេះដែរមួយផ្នែកជាកិច្ចប្រជុំថ្នាក់បច្ចេកទេស និងមួយផ្នែកក៏ជាកម្រិតថ្នាក់នយោបាយ ក្រោមអធិបតីភាព ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពលកម្ពុជា នៅលើទឹកដីនៃខេត្តសៀមរាប។
បើតាមឯកឧត្តម ប្រាំង ជលសា ប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជា បានប្រាប់អ្នកសារព័ត៌មានថា កិច្ចប្រជុំដែលកម្ពុជាធ្វើជាម្ចាស់ផ្ទះនេះ ធ្វើឡើងដើម្បីពិនិត្យមើលការអនុវត្តការងារក្នុងរយៈពេលមួយឆ្នាំរបស់អាស៊ាន លើវិស័យថាមពល និងធ្វើជារបាយការណ៍សង្ខេបជូនកិច្ចប្រជុំរដ្ឋមន្ត្រីថាមពលអាស៊ាន ដែលនឹងធ្វើឡើងនៅក្នុងប្រទេសឡាវ នាចុងឆ្នាំ២០២៤នេះ។ កិច្ចប្រជុំនេះក៏បានលើកយកនូវបញ្ហាថាមពលកកើតឡើងវិញមកជជែកពិភាក្សាគ្នាផងដែរ។ ឯកឧត្តមលើកឡើងថា ក្នុងបរិបទដែលពិភពលោកកំពុងបោះជំហានទៅមុខ ការប្រើប្រាស់ប្រភពថាមពលផូស៊ីល ដូចជាប្រេង ដូចជាធ្យូងថ្ម មានការថយចុះ ខណៈការប្រើប្រាស់ថាមពលកកើតឡើងវិញ ដូចជា ប្រភពពីវារីអគ្គិសនី ពីថាមពលព្រះអាទិត្យ ពីថាមពលខ្យល់ជាដើមកើនឡើង។
ឯកឧត្តមបន្តថា ជាមួយគ្នានឹងអាស៊ានក៏បានជំរុញឱ្យមានការបង្កើនការប្រើប្រាស់យានយន្តអគ្គិសនីផងដែរ។ ប៉ុន្តែបញ្ហាទាំងអស់នេះ វាពិបាកក្នុងការគ្រប់គ្រង ដូចជាថាមពលកកើតឡើងវិញ វាប្រែប្រួលទៅតាមអាកាសធាតុ ចំណែកការប្រើប្រាស់យានយន្តអគ្គិសនី នៅពេលដែលគេបញ្ចូលថាមពលព្រមៗគ្នាក្នុងពេលតែមួយ តើវាប៉ះពាល់ដល់ការផ្គត់ផ្គង់ដែរឬទេ? ដែលបញ្ហាទាំងអស់នេះ យើងនឹងជជែកគ្នារកចំណុចរួម។
សូមជម្រាបថា ចាប់តាំងពីចូលជាសមាជិកសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ានកាលពីឆ្នាំ១៩៩៩ មកដល់ពេលនេះ កម្ពុជាបានធ្វើជាម្ចាស់ផ្ទះសម្រាប់កិច្ចប្រជុំដឹកនាំក្រុមហ៊ុនអគ្គិសនីរដ្ឋ នៃបណ្ដាប្រទេសអាស៊ាននេះ ចំនួន៣ដង ដែលលើកទី១កាលពីឆ្នាំ២០០៤ លើកទី២កាលឆ្នាំ២០១៣ និងឆ្នាំ២០២៤នេះ ជាលើកទី៣៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
