នៅយប់ថ្ងៃទី២៣ ខែសីហា ឆ្នាំ២០២៤នេះ រដ្ឋបាលខេត្តសៀមរាប បានចុះពិនិត្យទីតាំង និងសិក្សាបញ្ហាប្រឈមនៅតំបន់ Pub street ក្នុងក្រុងសៀមរាប ដឹកនាំដោយលោក សំកុល សុចិត្រា អភិបាលរងខេត្ត និងជាប្រធានគណៈកម្មាការរៀបចំសណ្ដាប់ធ្នាប់ និងរបៀបរៀបរយសាធារណៈក្នុងភូមិសាស្រ្តក្រុងសៀមរាប ដោយមានការចូលរួម លោក យន់ លីណេ អភិបាលរងខេត្ត ស្នងការរដ្ឋាននគរបាលខេត្ត មន្ត្រីសាលាក្រុង បញ្ជាការកងរាជអាវុធហត្ថខេត្ត រួមនឹងលោក លោកស្រីសមាជិកសមាជិកាលេខាធិការដ្ឋាន នៃគណៈកម្មការរៀបចំសណ្ដាប់ធ្នាប់ និងរបៀបរៀបសារធារណៈក្នុងក្រុងជាច្រើនរូប។
លោក សំកុល សុចិត្រា ប្រធានគណៈកម្មាការរៀបចំសណ្ដាប់ធ្នាប់ និងរបៀបរៀបរយសាធារណៈក្នុងភូមិសាស្រ្តក្រុងសៀមរាប បញ្ជាក់ថាការចុះពិនិត្យទីតាំង និងសិក្សាបញ្ហាប្រឈមនៅតំបន់ Pub street ក្នុងក្រុងសៀមរាបពេលនេះដើម្បីសិក្សា និងកំណត់បញ្ហាមួយចំនួន ពាក់ព័ន្ធនិងសណ្ដាប់ធ្នាប់សាធារណៈ អំពីការគ្រប់គ្រងចំណត ការដាក់រទះលក់ដូរ របស់ប្រជាពលរដ្ឋប្រកបរបបសេដ្ឋកិច្ចក្រៅប្រព័ន្ធ ការសាងសង់ ជួសជុល កែលម្អហាង ការតម្លើងផ្លាកយីហោ ការកំណត់ការបើកឧបករណ៍បំពងសំឡេង បញ្ហាអ្នកសុំទាន និងជនអនាថាជាដើម ដើម្បីរកដំណោះស្រាយ បញ្ហាប្រឈមជាក់ស្ដែង និងចុះអនុវត្តន៍នៅពេលខាងមុខ។
ជាមួយនេះដែលអាជ្ញាធរខេត្តកំពុងគិតគូរ និងយកចិត្តទុកដាក់ខ្ពស់ ពីរៀបចំផែនការរៀបចំសណ្តាប់ធ្នាប់ និងរបៀបរៀបរយសាធារណៈក្នុងក្រុងសៀមរាប ដើម្បីដោះស្រាយនូវបញ្ហានានា សំដៅលើកកម្ពស់វិស័យទេសចរណ៍ បង្កើនភាពពេញចិត្ត និងភាពទាក់ទាញដល់ភ្ញៀវទេសចរណ៍ជាតិ អន្តរជាតិ ឲ្យបានជាអតិបរមា ថែរក្សាទីក្រុងទេសចរណ៍វប្បធម៌ប្រវត្តិសាស្ត្រ ដែលជាមរតកដូនតាសម័យអង្គរ និងប្រែរូបរាងឲ្យក្លាយជាទីក្រុងបេតិកភណ្ឌទំនើបនាពេលអនាគត។
លោកអភិបាលរងខេត្តបន្តថា គោលបំណងនៃផែនការស្តីពីការរៀបចំសណ្តាប់ធ្នាប់ និងរបៀបរៀបរយសាធារណៈក្នុងក្រុងសៀមរាប គឺត្រូវធ្វើយ៉ាងណាឲ្យក្រុងសៀមរាប មានសណ្តាប់ធ្នាប់ និងរបៀបរៀបរយសាធារណៈ និងដើម្បីធានាឲ្យបាននូវនិរន្តរភាពវិស័យទេសចរណ៍ មានគុណភាព និងភាពទាក់ទាញនៅក្នុងតំបន់ និងសកលលោក ផ្សារភ្ជាប់ជាមួយការអភិវឌ្ឍ និងការលើកកម្ពស់សេដ្ឋកិច្ចមូលដ្ឋានរបស់ប្រជាពលរដ្ឋ ស្របតាមគោលបំណងនៃ “ផែនការមេ អភិវឌ្ឍទេសចរណ៍ខេត្តសៀមរាប ២០២១-២០៣៥” “យុទ្ធនាកាសៀមរាបផ្ទះខ្ញុំ” និង “ផែនទីចង្អុលផ្លូវទីក្រុងឆ្លាតវៃនៃ ខេត្តសៀមរាប” ។
សូមជម្រាបថារដ្ឋបាលខេត្តសម្រេចរៀបចំទីតាំងគោលដៅចំបងចំនួន ៩ទីតាំង ដើម្បីរៀបចំសណ្តាប់ធ្នាប់ និងរបៀបរៀបរយសាធារណៈក្នុងនោះរួមមាន តំបន់ផាប់ស្ទ្រីត, ដងស្ទឹងសៀមរាប ,តំបន់អង្គរឃ្យូងយូ ,ព្រះអង្គចេក ព្រះអង្គចម ,រុក្ខវិថីសម្តេចសីហនុ, វិថីសម្តេចសង្ឃ ទេព វង្ស វិថីស៊ីវត្ថា , តាមបណ្ដោយផ្លូវជាតិលេខ៦ មន្ទីរពេទ្យ និងសាលារៀន ផ្សារ បេនឡាន និងខ្សែផ្លូវមួយចំនួនទៀតផងដែរ៕
អត្ថបទ និងរូបភាព ធន់ ពូថេ
កែសម្រួល ហាំ ម៉េងហួត
