នៅព្រឹកថ្ងៃទី២៦ ខែសីហា ឆ្នាំ២០២៤ វិទ្យាល័យសែនសុខ ស្ថិតក្នុងភូមិច្រនៀង ឃុំសែនសុខ ស្រុកក្រឡាញ់ ខេត្តសៀមរាប បានទទួលអំណោយមានផ្ទាំងសូឡា១២ផ្ទាំង ម៉ាស៊ីនត្រជាក់១គ្រឿង និងកង្ហារ៣៥គ្រឿង ពីសប្បុរសជនប្រទេសជប៉ុន គឺលោក ខាតូ ខូដៃ (KATO KOUDAI) ប្រធានក្រុមហ៊ុនផលិតសូឡា Prometex ដែលពិធីប្រគល់នេះមានការអញ្ជើញចូលរួមពីឯកឧត្តមបណ្ឌិត អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប អាជ្ញាធរមូលដ្ឋាន លោកគ្រូអ្នកគ្រូ និងសិស្សានុសិស្សជាច្រើនរូប។
លោក KATO KOUDAI បានឱ្យដឹងថា ដោយមើលឃើញថាវិទ្យាល័យសែនសុខ ជាសាលារៀនដែលនៅតំបន់ជនបទ មិនទាន់មានអគ្គិសនីប្រើប្រាស់គ្រប់គ្រាន់ ហើយអាកាសធាតុក៏ក្ដៅទៀតនោះ ទើបក្រុមការងារលោកសម្រេចផ្តល់ផ្ទាំងសូឡា ម៉ាស៊ីនត្រជាក់ និងកង្ហារជូននាពេលនេះ។ លោកថាបច្ចុប្បន្នប្រទេសកម្ពុជា គឺជាប្រទេសដែលកំពុងអភិវឌ្ឍ ហើយក៏មានអ្នកវិនិយោគជាច្រើនបានកំពុងមកចាប់ដៃគូររកស៊ីនៅកម្ពុជា ក្នុងនោះក៏មានក្រុមហ៊ុនផលិតសូឡា Prometex របស់លោកផងដែរ។ ក្នុងន័យនេះដែរ លោកបានជំរុញឱ្យសិស្សានុសិស្សទាំងអស់ត្រូវខិតខំរៀនសូត្រឱ្យបានពូកែ ដើម្បីចូលរួមធ្វើការអភិវឌ្ឍប្រទេសកម្ពុជាឱ្យកាន់តែមានការរីកចម្រើនឱ្យបានកាន់តែលឿន។
ព័ត៌មានជាតិ ថ្មីៗ
ឯកឧត្តមបណ្ឌិត អ្នកឧកញ៉ា សៀង ណាំ មានប្រសាសន៍ថា ជាការពិតណាស់សម្ភារៈទាំងនេះ ពិតជាបានបង្កលក្ខណៈងាយស្រួលដល់លោកគ្រូ អ្នកគ្រូ និងក្មួយៗសិស្សានុសិស្ស នៅទីនេះទទួលបានភ្លើងប្រើប្រាស់គ្រប់គ្រាន់ ដើម្បីសិក្សារៀនសូត្រទាំងអស់គ្នា ជាពិសេសបានរួមចំណែកកាត់បន្ថយការចំណាយទៅលើថ្លៃភ្លើងផងដែរ។ កន្លងមកសប្បុរសជនជប៉ុនជាច្រើនតែងតែបានចូលរួមធ្វើសកម្មភាពមនុស្សធម៌តាមរយៈឯកឧត្តមផ្ទាល់ ជួយដល់ប្រជាពលរដ្ឋដែលមានជីវភាពខ្វះខាត និងជួយដល់សាលារៀន នៅតាមតំបន់ជនបទក្នុងខេត្តសៀមរាប។ ហើយដើម្បីជាការតបគុណទៅម្ចាស់ជំនួយវិញ សូមឱ្យក្មួយៗ ត្រូវរៀនសូត្រឱ្យបានពូកែ ក្លាយជាកូនល្អ មិត្តល្អ សិស្សល្អ ពលរដ្ឋល្អ និងជាធនធានមនុស្សប្រកបដោយសក្តានុពលសម្រាប់រួមគ្នាប្រទេសជាតិ។
ឯកឧត្តមបញ្ជាក់ថា កម្ពុជាក្រោមការដឹកនាំប្រកបដោយឆន្ទៈមោះមុត និងភាពស្វាហាប់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលជាអ្នកបន្តវេនដ៏មានសក្តានុពល បានដឹកនាំឱ្យកម្ពុជាមានសន្ទុះរីកចម្រើនជឿនលឿនលើគ្រប់វិស័យ ក្នុងនោះវិស័យសិក្សាធិការអប់រំ គឺជាវិស័យអាទិភាពមួយដែលបាននិងកំពុងជំរុញ ពង្រីក ហើយមានការឈានឡើងទាំងបរិមាណ និងគុណភាពឥតឈប់ឈរគួរជាទីមោទនៈ សំដៅធ្វើការអភិវឌ្ឍធនធានមនុស្ស ដើម្បីរួមចំណែកអភិវឌ្ឍប្រទេសជាតិ ស្របតាមកាលៈទេសៈនៃការរីកចម្រើនទាំងផ្នែកវិទ្យាសាស្ត្រ និងបច្ចេកវិទ្យាទំនើប។ ឯកឧត្តមក៏សូមថ្លែងអំណរគុណចំពោះទឹកចិត្តមនុស្សធម៌របស់សប្បុរសជនប្រទេសកូរ៉េ ដែលតែងតែបានចំណាយពេលវេលា កម្លាំងកាយ កម្លាំងចិត្ត និងថវិកាជួយឧបត្ថម្ភគាំទ្រយ៉ាងច្រើនដល់ប្រជាជនកម្ពុជា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
