នៅព្រឹកថ្ងៃទី២៦ ខែសីហា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលស្រុកពួក បានចុះធ្វើការប្រជុំផ្សព្វផ្សាយសេចក្ដីសម្រេចកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋក្នុងភូមិចំនួន១០ មានភូមិចំបក់ស ភូមិគោកដូង ភូមិស្វាយ ភូមិតាហុក ភូមិធិបតី ភូមិជួយចក្រី ភូមិឈូក ភូមិត្រីញ័រ ភូមិធ្វាស និងភូមិត្រពាំងព្រីង ឃុំត្រីញ័រ ស្រុកពួក ខេត្តសៀមរាប ក្រោមវត្តមានលោក ស៊ីន ចាន់ថុល អភិបាលស្រុកពួក និងលោក ប៊ូ ជុំសម្បត្តិ អនុប្រធានមន្ទីរ ដោយមានការចូលរួមពីអ្នកពាក់ព័ន្ធជាច្រើនរូប។
លោក ប៊ូ ជុំសម្បត្តិ បានបង្ហាញថា ការកសាងប្លង់សុរិយោដី និងសៀវគោលបញ្ជីដីធ្លី ដើម្បីឈានដល់ការចេញប្លង់បានឆ្លងកាត់ ៥ដំណាក់កាលដូចជា៖ ទី១.ការត្រៀមរៀបចំ ការកំណត់តំបន់ធ្វើការវិនិច្ឆ័យ និងដំណើរការផ្សព្វផ្សាយពីការចុះបញ្ជីដីធ្លីមានលក្ខណៈជាប្រព័ន្ធ, ទី២.ប្រតិបត្តិការបច្ចេកទេស គឺការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី, ទី៣.ការបិទផ្សាយជាសាធារណៈនូវឯកសារនៃការវិនិច្ឆ័យ, ទី៤.ការសម្រេចលើឯកសារវិនិច្ឆ័យ និងទី៥.ការចុះបញ្ជី ចេញបណ្ណ និងចែកជូនម្ចាស់ដី។
ព័ត៌មានជាតិ ថ្មីៗ
លោក ប៊ូ ជុំសម្បត្តិ បញ្ជាក់ថា ដើម្បីឱ្យការងារនេះអនុវត្តទៅដោយរលូន សូមបងប្អូនប្រជាពលរដ្ឋទាំងអស់ ចូលរួមសហការជាមួយអាជ្ញាធរ មន្ត្រីជំនាញវាស់វែង ជាពិសេសសម្របសម្រួលរវាងភាគីដែលជាប់ព្រំប្រទល់ដីទាំងអស់ជាមុនសិន បើពុំដូច្នេះទេនៅពេលដែលមន្ត្រីវាស់វែងចុះធ្វើការត្រួតពិនិត្យលើព្រំប្រទល់ឃើញថា ជាដីមានទំនាស់មិនទាន់បានដោះស្រាយ ក្រុមមន្ត្រី និងអាជ្ញាធរពាក់ព័ន្ធនឹងមិនធ្វើការវាស់វែងជូនឡើយ។
ក្នុងឱកាសនោះដែរ លោក ស៊ីន ចាន់ថុល អភិបាលស្រុកពួក មានប្រសាសន៍ ការផ្សព្វផ្សាយសេចក្ដីសម្រេចកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជារឿងសំខាន់ និងគប្បីបងប្អូនជាម្ចាស់កម្មសិទ្ធិយកចិត្តទុកដាក់ឱ្យបានហ្មត់ចត់ ព្រោះបណ្ណកម្មសិទ្ធិពិតមានសារៈសំខាន់ និងមានតម្លៃណាស់។ ការចុះបញ្ជីដីធ្លីមានលក្ខណៈជាប្រព័ន្ធនេះ អាចបង្កលក្ខណៈងាយស្រួលដល់រាជរដ្ឋាភិបាល និងប្រជាពលរដ្ឋដូចជា៖ រដ្ឋគ្រប់គ្រងបានដីធ្លីទាំងដីរដ្ឋ និងដីឯកជន ដែលធ្វើឱ្យរដ្ឋមានការងាយស្រួលក្នុងការងាររៀបចំដែនដីរដ្ឋបាលដីធ្លី ការបែងចែកដី ការលើកស្ទួយកម្រិតជីវភាពរស់នៅរបស់ប្រជាពលរដ្ឋ និងការកាត់បន្ថយទំនាស់ដីធ្លី។ ធានាសុវត្ថិភាព ក្នុងការកាន់កាប់ដីធ្លីរបស់ប្រជាពលរដ្ឋ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចធ្វើការបង្កបង្កើនផល ឬប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ និងអាចប្រើប្រាស់បណ្ណកម្មសិទ្ធិដីដើម្បីផលប្រយោជន៍ផ្សេងៗក្នុងការប្រកបមុខរបរ ឬអាជីវកម្មរបស់ខ្លួនជាដើម ដូច្នេះសូមឱ្យបងប្អូនសហការឱ្យបានល្អជាមួយមន្ត្រីជំនាញ ដើម្បីឱ្យការងារនេះអនុវត្តទៅដោយរលូន៕
អត្ថបទ និងរូបភាព៖ លោក ហេង វ៉ាន្នី
កែសម្រួល៖ លោក អ៊ុន ណារាជ្យ
