អធិការដ្ឋាននគរបាលស្រុកជីក្រែង ខេត្តសៀមរាប លោកវរសេនីយ៍ឯក តាំង លីហេង បានជំរុញឱ្យប្រជាពលរដ្ឋបន្តផ្ដល់កិច្ចសហការជាមួយអាជ្ញាធរមានសមត្ថកិច្ច ធ្វើយ៉ាងណាចូលរួមក្នុងការលុបបំបាត់បញ្ហាអសន្តិសុខនានាក្នុងមូលដ្ឋានរបស់ពួកយើងឱ្យអស់។
ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃ២៦ ខែសីហា ឆ្នាំ២០២៤ លោកវរសេនីយ៍ឯក តាំង លីហេង បានបង្ហាញថា សម្រាប់ឆ្នាំ២០២៤នេះ បញ្ហាអសន្ដិសុខ សណ្ដាប់សាធារណៈក្នុងមូលដ្ឋានស្រុកជីក្រែង មិនមានករណីអ្វីកើតឡើងគួរឱ្យកត់សម្គាល់ឡើយ ប៉ុន្តែបញ្ហាដែលប្រឈម គឺករណីគ្រោះថ្នាក់ចរាចរ ដែលមានការកើតឡើងញឹកញាប់ជាងគេ។ ក្រៅពីនោះករណីគ្រឿងញៀន ករណីឆក់ប្លន់ ករណីឃាតកម្ម និងបញ្ហាមួយចំនួនទៀត ហាក់មានភាពស្ងប់ស្ងាត់ច្រើន ដោយសារក្នុងមូលដ្ឋានពលរដ្ឋមួយចំនួនធំ ពួកគាត់មានការយល់ដឹង និងបានចូលរួមសហការយ៉ាងល្អជាមួយអាជ្ញាធរមានសមត្ថកិច្ច នៅពេលមានភាពមិនប្រក្រតីណាមួយកើតមានក្នុងមូលដ្ឋាន។
លោកវរសេនីយ៍ឯកបន្តថា កន្លងមកអាជ្ញាធរមានសមត្ថកិច្ចពាក់ព័ន្ធតែងតែចុះអប់រំផ្សព្វផ្សាយជាប្រចាំពីគោលនយោបាយភូមិឃុំសង្កាត់មានសុវត្ថិភាព ដោយបានបញ្ជ្រាបគោលនយោបាយនេះ ទៅតាមកម្មវិធីផ្សេងៗ ទាំងតាមវត្តអារាម សាលារៀន និងទីតាំងផ្សេងៗទៀត ពីបញ្ហាអសន្តិសុខផ្សេងៗនៅក្នុងមូលដ្ឋាន ជាពិសេសសមត្ថកិច្ចបានសហការជាមួយកម្លាំងប្រជាការពារតែងចុះល្បាតជាប្រចាំនៅពេលយប់។ ជាមួយនោះលោកក៏បានជំរុញឱ្យប្រជាពលរដ្ឋ នៅពេលដែលឃើញមានបញ្ហាអសន្តិសុខអ្វីមួយកើតឡើងក្នុងមូលដ្ឋាន សូមរាយការណ៍មកអាជ្ញាធរមានសមត្ថកិច្ច ដើម្បីឱ្យសមត្ថកិច្ចចុះអន្តរាគមន៍ទាន់ពេលវេលា និងមានប្រសិទ្ធភាព៕
អត្ថបទ៖ កញ្ញា វុឹង ហាន់ស៊ាង
កែសម្រួល៖ លោក អ៊ុន ណារាជ្យ
