នៅព្រឹកថ្ងៃទី២៨ ខែសីហា ឆ្នាំ២០២៤នេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) បានបើកវគ្គបណ្តុះបណ្ដាលពង្រឹងសមត្ថភាពដល់សមាជិកលេខាធិការដ្ឋានរបស់ខ្លួន ស្តីពីការអនុវត្តតួនាទី ភារកិច្ចច្បាប់ គោលនយោបាយពាក់ព័ន្ធការប្រយុទ្ធប្រឆាំងអំពើជួញដូរមនុស្ស និងកិច្ចការពារកុមារ ដឹកនាំដោយលោកស្រី ម៉ននី រង្សី អភិបាលរងខេត្ត និងជាអនុប្រធានអចិន្រ្តៃយ៍ គ.ខ.ប.ជ ដោយមានការចូលរួមថ្នាក់ដឹកនាំ មន្ត្រីនៃមន្ទីរអង្គភាពពាក់ព័ន្ធ រដ្ឋបាលក្រុងស្រុក និងអង្គការដៃគូជាច្រើនរូប។
លោកស្រី ម៉ននី រង្សី មានប្រសាសន៍ថា វគ្គបណ្តុះនេះរៀបចំឡេីងដើម្បីឱ្យសមាជិកទាំងអស់បានយល់ដឹងបន្ថែមអំពីរចនាសម្ព័ន្ធ ការអនុវត្តតួនាទីភារកិច្ច ច្បាប់ គោលនយោបាយដែលពាក់ព័ន្ធនឹងការប្រយុទ្ធប្រឆាំងអំពើជួញដូរមនុស្ស និងកិច្ចការពារកុមារពីការរំលោភបំពាននានា ការអនុវត្តសកម្មភាព បង្ការទប់ស្កាត់ ការបង្ក្រាបបទល្មើសនានាពាក់ព័ន្ធនឹងអំពើជួញដូរមនុស្ស និងអំពើហិង្សាទាក់ទងនឹងយេនឌ័រ ការផ្តន្ទាទោសជនល្មើស ការការពារជនរងគ្រោះ ការពង្រឹងសមត្ថភាពក្រុមការងារពាក់ព័ន្ធ និងកិច្ចសហប្រតិបត្តិក្នុងឆ្នាំ២០២៤ ដើម្បីធ្វើការតាមដាន ត្រួតពិនិត្យ និងវាយតម្លៃលើលទ្ធផលការងាររបស់ខ្លួន ដែលនេះជាជំហានទី១ ហើយជំហានបន្ទាប់នឹងចុះបណ្ដុះបណ្ដាលនៅតាមក្រុងស្រុកមួយចំនួនបន្ថែមទៀត។
ព័ត៌មានជាតិ ថ្មីៗ
លោកស្រី ម៉ននី រង្សី ក៏បានជំរុញ និងសំណូមពរដល់ឱ្យមន្ត្រីបង្គោល សិក្ខាកាមទាំងអស់ត្រូវយកចិត្តដាក់ស្ដាប់តាមការបកស្រាយរបស់មន្ត្រីបង្គោល ចែករំលែកបទពិសោធទៅគ្នាទៅវិញទៅមក ហើយក្នុងករណីនៅមានចម្ងល់ ត្រូវហ៊ានសួរ ព្រោះនេះជាការបង្កើនចំណេះដឹងថ្មី ពង្រឹងសមត្ថភាពបន្ថែម នៅចំណុចខ្វះខាតក្នុងការអនុវត្តការងារប្រចាំថ្ងៃ ស្របទៅតាមបរិបទសង្គមបច្ចុប្បន្ន ធ្វើឱ្យការដោះស្រាយឱ្យកាន់តែមានប្រសិទ្ធភាព ពិសេសដើម្បីការបង្ការ ទប់ស្កាត់ ការពារ និងបង្ក្រាប ឈានទៅការលុបបំបាត់អំពើជួញដូរមនុស្សគ្រប់រូបភាព ក្នុងករណីដែលអាចកើតមានហេតុការណ៍កើតឡើងនៅក្នុងមូលដ្ឋានរបស់ខ្លួន ឱ្យទទួលបានលទ្ធផលល្អប្រសើរបន្ថែមទៀត៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
