គ្រួសារក្រីក្រ និងងាយរងគ្រោះ ចំនួន ៣៤គ្រួសារ និងសិស្សានុសិស្សមានការលំបាកចំនួន ៣០នាក់ បានទទួលអំណោយជាស្បៀងអាហារ កង់ ថវិកា និងសម្ភារៈ ដែលជាកញ្ចប់ថវិកាសេវាសង្គម របស់រដ្ឋបាល ឆ្នាំ២០២៤ ស្ថិតនៅសាលាស្រុកក្រឡាញ់ នាថ្ងៃទី២៨ ខែសីហា ឆ្នំា២០២៤។
តាមការឱ្យដឹងពីលោក សុខ ណារ៉េត អភិបាលស្រុកក្រឡាញ់ កញ្ចប់ថវិកាសេវាសង្គមនេះ ជាយុទ្ធសាស្ត្ររួមចំណែកកាត់បន្ថយភាពក្រីក្ររបស់រដ្ឋបាលស្រុក ដែលស្របតាមគោលនយោបាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ ដែលបានកំណត់អាទិភាពគន្លឹះចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា។
លោកអភិបាលស្រុក បន្ថែមថា គ្រួសារទីទ័លក្រ ត្រូវបានជ្រើសរើសពីគ្រួសារក្រ១ និងក្រ២ ក្នុងឃុំចំនួន ៨ ដោយឡែកសិស្សានុសិស្ស ដែលជួបការខ្វះខាត ត្រូវបានជ្រើសរើសពីលោកគ្រូ អ្នកគ្រូ និងគណៈគ្រប់នៅតាមសាលាបឋមសិក្សាចំនួន១១។ លោក ក៏បានបញ្ជាក់ផងដែរថា ក្រៅពីថវិកាសេវាសង្គម គ្រួសារប្រជាពលរដ្ឋ ដែលមានជីវភាពខ្វះខាត និងងាយរងគ្រោះ ដែលមានដូចជា ស្រ្តីមេម៉ាយ កុមារកំព្រា ចាស់ជរា តែងតែទទួលបានការយកចិត្តទុកដាក់ពីឯកឧត្តម សៀង ណាំ អ្នកតំណាងរាស្ត្រមណ្ឌលសៀមរាប ឯកឧត្ដម ប្រាក់ សោភ័ណ អភិបាលខេត្តសៀមរាប និងអាជ្ញាធរមូលដ្ឋាន ក៏ដូចជាសាខាកាកបាទក្រហមកម្ពុជានៅថ្នាក់ខេត្ត និតស្រុកផងដែរ។
គួរជម្រាបថា គ្រួសារមានជីវភាពខ្វះខាតទាំង ៣៤គ្រួសារ ក្នុងមួយគ្រួសារទទួលបាន អង្ករ ២៥គីឡូក្រាម មី ១កេស ត្រីខ ១យួរ ទឹកត្រី ១យួរ ទឹកស៊ីអ៊ីវ ១យួរ, ប្រេងសណ្តែក ១ដប សម្ភារៈប្រើប្រាស់មួយចំនួន និងថវិកា ១០ ០០០រៀល។ ចំពោះ សិស្សានុសិស្សជួបការលំបាកចំនួន ៣០នាក់ ម្នាក់ៗទទួលបាន កង់ ១គ្រឿង សម្លៀកបំពាក់សិក្សា ១ឈុត សម្ភារៈសិក្សាមួយចំនួន និងថវិកា ១០ ០០០រៀល។ ក្នុងឱកាសនោះ រដ្ឋបាលស្រុក ក៏បានចែកជូនធុងសំរាមដល់សាលារៀនចំនួន ៥០ ក្នុងស្រុក ដោយមួយសាលាទទួលបានធុងចំនួន ២ ដើម្បីជួយលើកកម្ពស់បរិស្ថានក្នុងសាលាឱ្យមានអនាម័យ និងមានសោភណ្ឌភាព ស្របតាមគោលនយោបាយភូមិឃុំមានសុវត្ថិភាព ត្រង់ចំណុចទី៥។
អត្ថបទ និងរូបភាព៖ រដ្ឋបាលស្រុកក្រឡាញ់
