ក្នុងឱកាសដឹកនាំប្រតិភូពិនិត្យមើលដំណើរការកសិដ្ឋានសូត្រ ក្នុងស្រុកពួក ខេត្តសៀមរាប នៅថ្ងៃទី២៩ ខែសីហា ឆ្នាំ២០២៤នេះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម បានផ្តល់ពូជដង្កូវនាងមាស និងដើមមនពូជថ្មីៗចំនួន ១.០០០ដើម ជូនដល់កសិដ្ឋានសូត្រ Angkor Silk Farm នៃសិប្បកម្មអង្គរ ស្ថិតនៅភូមិពួកចាស់ ស្រុកពួក ដើម្បីជួយគាំទ្រដល់ការស្ដារឡើងវិញនូវសិប្បកម្មតម្បាញសូត្ររបស់ខ្មែរ ហើយការងារនេះក្រសួងបានគាំទ្រតាំងពីខែមីនា ឆ្នាំ២០២៤ រហូតសិប្បកម្មអាចដំណើរការឡើងវិញទាំងស្រុង ចាប់តាំងពីការដាំដើមមន ចិញ្ចឹមដង្កូវនាង ស្រាវសូត្រ និងតម្បាញ។
ក្នុងឱកាសនោះ ឯកឧត្តម ឌិត ទីណា បានសម្ដែងការសាទរចំពោះសិប្បកម្មអង្គរ ដែលខិតខំប្រឹងប្រែងស្ដារឡើងវិញនូវវិស័យតម្បាញសូត្រ ដែលជាវប្បធម៌ដ៏ចំណាស់របស់ខ្មែរ។ ផលិតផលសូត្រមានតម្លៃខ្ពស់ ព្រោះដំណើរការផលិត នៅមានលក្ខណៈប្រពៃណីច្រើន។ ឯកឧត្តមរដ្ឋមន្ដ្រីសង្ឃឹមថា សិប្បកម្មអង្គរនឹងបន្តអភិវឌ្ឍដំណើរការផលិតសូត្រឱ្យកាន់តែប្រសើរឡើង ទាំងផ្នែកបច្ចេកទេស និងបរិក្ខារ ហើយក្រសួងនឹងបន្តគាំទ្រទៅតាមលទ្ធភាព លើផ្នែកបច្ចេកទេស ដាំដុះ និងចិញ្ចឹមដង្កូវនាង ដែលស្ថិតក្រោមសមត្ថកិច្ច និងជំនាញរបស់ក្រសួង។
ឯកឧត្តមរដ្ឋមន្ដ្រី ក៏បានបង្ហាញក្ដីជឿងជាក់ថា វិស័យតម្បាញសូត្ររបស់សិប្បករអង្គរ នឹងរីកចម្រើនថែមទៀតនាពេលអនាគត ហើយការរីកចម្រើននៃវិស័យតម្បាញសូត្រ នឹងអាចជួយផ្ដល់ការងារបន្ថែមដល់កសិករដាំដើមមនសម្រាប់ផ្គត់ផ្គង់ដល់ការចិញ្ចឹមដង្កូវនាង និងសិប្បករតម្បាញសូត្រ។ មិនត្រឹមតែប៉ុណ្ណោះ វានឹងរួមចំណែកដល់ការថែរក្សាសិប្បកម្មតម្បាញសូត្រ ដែលជាវប្បធម៌ដ៏ចំណាស់របស់ខ្មែរឱ្យបានស្ថិតស្ថេរគង់វង្ស។
ឯកឧត្តមបន្តថា នៅពេលខាងមុខបើឃើញថា តម្លៃស្លឹកមនល្អក្រសួងកសិកម្មក៏មានគម្រោងជំរុញឱ្យប្រជាកសិករដាំមននៅតាមផ្ទះ សម្រាប់ផ្គង់ផ្គង់មកឱ្យកសិដ្ឋានសូត្រ ឬអាចឈានដល់ឱ្យប្រជាពលរដ្ឋចិញ្ចឹមដង្កូវនាងនៅតាមផ្ទះផងដែរ។ កន្លងមកនេះក្រសួងកសិកម្ម រុក្ខាប្រមាញ់ និងនេសាទ បានធ្វើការសិក្សាស្រាវជ្រាវជាច្រើនទៅលើដើមមន ក៏ដូចជាពូជដង្កូវនាងថ្មីៗជាពិសេសដង្កូវនាងដែលចេញសំបុកព័ណ៌ស ដែលអាច ផលិតចេញជាសូត្រពណ៌សតែម្តងដោយមិនបាច់ជ្រលក់ព័ណ៌ ហើយក៏បានយកបច្ចេកវិទ្យាទាំងនេះមកចែកជូនដល់សិប្បកម្មអង្គរផងដែរ។
គួរបញ្ជាក់ថា ក្រៅពីការទស្សនកិច្ចចម្ការដើមមន និងសិប្បកម្មតម្បាញសូត្ររបស់ សិប្បករអង្គរ ឯកឧត្តមរដ្ឋមន្ដ្រី និងថ្នាក់ដឹកនាំ ព្រមទាំងថ្នាក់ដឹកនាំ និងបុគ្គលិកសិប្បករអង្គរ បានអញ្ជើញដាំដើមមន ពូជថ្មី ដែលមានស្លឹកច្រើនរួមគ្នាផងដែរ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
