នៅថ្ងៃទី២៩ ខែសីហា ឆ្នាំ២០២៤ ឯកឧត្តម នាយឧត្តមសេនីយ៍ ជួន សុវណ្ណ រដ្ឋមន្ត្រី ប្រតិភូអមនាយករដ្ឋមន្ត្រី និងជាប្រធានក្រុមការងារពិសេសតាមដាន អនុវត្តគោលការណ៍របស់នាយករដ្ឋមន្ត្រី ពាក់ព័ន្ធនឹងការងារសន្តិសុខ សណ្ដាប់ធ្នាប់សង្គម បានជួបប្រជុំពិភាក្សា ជាមួយគណៈបញ្ជាការឯកភាពរដ្ឋបាលខេត្តសៀមរាប លើចំណុចអាទិភាពចំនួន៤ រួមមានករណីអាជីវកម្មឆ្នោត-ឡូតូ និងឆ្នោតផ្សងសំណាង ក្មេងទំនើង គ្រឿងញៀន និងគ្រោះថ្នាក់ចរាចរណ៍។
តាមរយៈរបាយការណ៍របស់ លោក សំកុល សុចិត្រា អភិបាលរងខេត្ត និងជាអនុប្រធានអចិន្ដ្រៃយ៍គណៈបញ្ជាការឯកភាពរដ្ឋបាលខេត្ដសៀមរាប បង្ហាញថាការគ្រប់គ្រងល្បែងផ្សងសំណាងគ្រប់គ្រប់ប្រភេទ រួមមាន អាជីវកម្មឆ្នោត-ឡូតូ និងឆ្នោតផ្សងសំណាង ដោយគិតត្រឹមថ្ងៃទី២៧ ខែសីហា ឆ្នាំ២០២៤ នេះ គណៈបញ្ជាការឯកភាពរដ្ឋបាលខេត្ត បានណែនាំដល់ គណៈបញ្ជាការឯកភាពរដ្ឋបាលក្រុង ស្រុក ធ្វើការចុះស្រង់ស្ថិតិ និងរកឃើញក្រុមហ៊ុនសរុបចំនួន១២ ក្នុងនោះមានអាជ្ញាបណ្ណកំពុងធ្វើប្រតិបត្តិការអាជីវកម្មចំនួន៦ក្រុមហ៊ុន និង៥ក្រុមហ៊ុន បានផ្អាកដំណើរការ ដោយឡែក ១ក្រុមហ៊ុន គ្មានអាជ្ញាបណ្ណ។ ចំពោះការទប់ស្កាត់បទល្មើសល្បែងស៊ីសងគ្រប់ប្រភេទ ចុះបង្ក្រាបបានចំនួន ១០ករណីលើ ១០ករណី ក្នុងនោះ បានកសាងសំណុំរឿងបញ្ជូនទៅសាលាដំបូងខេត្តសៀមរាប និងបានធ្វើការអប់រំ។ទន្ទឹមនឹងនេះ គណៈបញ្ជាការឯកភាពរដ្ឋបាលខេត្តសៀមរាប បានណែនាំដល់គណ:បញ្ជាការឯកភាពរដ្ឋបាលក្រុង ស្រុក និងអាជ្ញាធរមានសមត្ថកិច្ច ចុះតាមដានត្រួតពិនិត្យជាប្រចាំ និងបង្ក្រាបល្បែងស៊ីសងគ្រប់ប្រភេទ ព្រមទាំងបានសហការគ្នាអនុវត្តឱ្យបានពង្រឹងការចុះទប់ស្កាត់ក្មេងទំនើង ការផ្សព្វផ្សាយពីគ្រោះថ្នាក់ចរាចរណ៍ និងទប់ស្កាត់បទល្មើសគ្រឿងញៀន ឱ្យមានការថយចុះជាបន្តបន្ទាប់ និងទទួលបានសាទរ គាំទ្រពីសំណាក់សាធារណជន និងចូលរួមពីប្រជាពលរដ្ឋនៅទូទាំងខេត្ត។
ថ្លែងក្នុងឱកាសនោះ ឯកឧត្តម នាយឧត្តមសេនីយ៍ ជួន សុវណ្ណ បញ្ជាក់ថា យោងតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្ត្រី កាលពីថ្ងៃទី១៤ ខែកុម្ភៈ ឆ្នាំ២០២៤ បានបញ្ជាដល់គណៈបញ្ជាការឯកភាពរដ្ឋបាលរាជធានី ខេត្ត ត្រូវធ្វើការចុះត្រួតពិនិត្យ ទប់ស្កាត់ បញ្ឈប់ជាបន្ទាន់នូវការធ្វើប្រតិបត្តិការអាជីវកម្មឆ្នោត-ឡូតូ និងឆ្នោតផ្សងសំណាងទាំងអស់នៅក្នុងភូមិសាស្ត្រមូលដ្ឋានរបស់ខ្លួន។ ជាមួយនេះ ឯកឧត្តម ក៏បានបញ្ជាក់ផងដែរថា កិច្ចប្រជុំនាពេលនេះ មានគោលបំណង ពិគ្រោះ ពិភាក្សា រកដោះស្រាយ ជូនដល់គណៈបញ្ជាការឯកភាពរដ្ឋបាលរាជធានី-ខេត្ត ដើម្បីពង្រឹង ថែរក្សាសុខសន្ដិភាព សុវត្ថិភាព និងសណ្ដាប់ធ្នាប់សាធារណៈក្នុងសង្គមជាតិ។
ឯកឧត្តមបានបន្តថា ការធ្វើប្រតិបត្តិការល្បែងពាណិជ្ជកម្ម ត្រូវមានអាជ្ញាបណ្ណពី គណៈកម្មការគ្រប់គ្រងល្បែងពាណិជ្ជកម្មកម្ពុជា ហៅកាត់ថា គ.ល.កដែលក្នុងនោះរួមមាន អាជ្ញាបណ្ណសាខា លិខិតអនុញ្ញាតប៉ុស្តិ៍សេវាល្បែងផ្សងសំណាង។ ការបើកដំណើរល្បែងស៊ីសង ដែលគ្មានអាជ្ញាបណ្ណ ត្រូវហាមឃាត់ដាច់ខាត់ និង ត្រូវចាប់ជនល្មើស និងជនផ្សំគំនិត មកផ្តន្ទាទោសទៅតាមច្បាប់។
ក្នុងនោះដែរ ឯកឧត្តម នាយឧត្តមសេនីយ៍ ជួន សុវណ្ណ ក៏បានជំរុញដល់រដ្ឋបាលខេត្ត បន្តចាត់វិធានការតឹងរ៉ឹងលើករណីក្មេងទំនើង និងគ្រឿងញៀនចាប់ពីតំបន់ទីប្រជុំជន ដល់តំបន់ដាច់ស្រយាល ដើម្បីផ្ដល់ភាពកក់ក្ដៅដ់ប្រជាពលរដ្ឋ និងរក្សាសន្តិសុខ សណ្តាប់ធ្នាប់ក្នុងភូមិសាស្ត្រខេត្តឱ្យបានកាន់តែល្អប្រសើរ។ ដោយឡែក គ្រោះថ្នាក់ចរាចរណ៍ ក៏ជាបញ្ហាប្រឈមដ៏គួរឱ្យព្រួយបារម្ភ ដែលទាមទារឱ្យអាជ្ញាធរខេត្ត បន្តធ្វើការរឹតបន្តឹង និងអនុវត្តច្បាប់ចរាចរណ៍ ធ្វើយ៉ាងណាកាត់បន្ថយអត្រាគ្រោះថ្នាក់ និងមរណភាពនៅលើដងផ្លូវនេះ។
អត្ថបទ និងរូបភាព : លោក បូ សាវី
