នៅរសៀលថ្ងៃទី២៩ខែសីហាឆ្នាំ២០២៤ លោក សេង ផល្លី ប្រធានមន្ទីរព័ត៌មានខេត្តសៀមរាបស្តីទី បានទទួលជួបលោក យូណាហ្សាវ៉ា អាត់ស៊ូស៊ី(Atsushi YONEZAWA) ប្រធានការិយាល័យកុងស៊ុលជប៉ុនប្រចាំនៅខេត្តសៀមរាប និងជាទីប្រឹក្សាស្ថានទូតជប៉ុននៅកម្ពុជា ដើម្បីសិក្សាស្វែងយល់ពីប្រព័ន្ធផ្សព្វផ្សាយរបស់រដ្ឋ និងឯកជន ក្នុងខេត្តសៀមរាប។
មានប្រសាសន៍ក្នុងឱកាសនោះ លោក សេង ផល្លី បានបង្ហាញនូវក្ដីសោមនស្ស ចំពោះការិយាល័យកុងស៊ុលជប៉ុន ដែលមានបំណងស្វែងយល់ពីវិស័យព័ត៌មាន និងសោតទស្សន៍ក្នុងខេត្ត ជាពិសេសការអញ្ជើញដោយផ្ទាល់នាឱកាសនេះ។ លោក បន្ថែមថា មុន និងក្រោយ វិបត្តិជំងឺកូវីដ១៩ មន្ទីរព័ត៌មានខេត្ត បានចូលរួមផ្សព្វផ្សាយព្រឹត្តិការណ៍នានារបស់ប្រទេសជប៉ុនជាច្រើន ជាពិសេសព្រឹត្តិការណ៍ ដែលបានរៀបចំក្នុងខេត្តសៀមរាប។
ព័ត៌មានជាតិ ថ្មីៗ
មានប្រសាសន៍ក្នុងជំនួបសំណេះសំណាលនេះ លោក យូណាហ្សាវ៉ា អាត់ស៊ូស៊ី បានបង្ហាញនូវការចាប់អារម្មណ៍ទៅលើកម្មវិធីចុះផ្សាយប្រចាំថ្ងៃរបស់មន្ទីរព័ត៌មានខេត្ត និងការចូលរួមរបស់ប្រព័ន្ធផ្សព្វផ្សាយក្នុងខេត្ត លើទំនាក់ទំនងរវាងប្រជាជនជប៉ុន និងកម្ពុជា ព្រមទាំងវិស័យនានាជាច្រើន។
ជំនួបក្នុងឱកាសនេះដែរ លោកប្រធានការិយាល័យកុងស៊ុលជប៉ុន បានបញ្ជាក់ថា នេះជាជំនួបលើកដំបូង ជាមួយមន្ទីរព័ត៌មានខេត្ត ចាប់តាំងពីការមកបំពេញការងារនៅខេត្តសៀមរាបក្នុងខែមីនា ឆ្នាំ២០២៤នេះ។ លោករំពឹងថា រូបលោក នឹងអាចស្វែងយល់បន្ថែមពីប្រជាជនក្នុងខេត្តសៀមរាបកាន់ច្រើនបន្ថែមទៀត និងអាចមានកិច្ចសហការផ្សព្វផ្សាយក្នុងព្រឹត្តិការណ៍នានាជាមួយមន្ទីរព័ត៌មានខេត្តនាពេលខាងមុខ។
អត្ថបទ និងរូបភាព : លោក យូ វង្ស
