នៅព្រឹកថ្ងៃទី៣០ ខែ សីហា ឆ្នាំ២០២៤នេះ លេខាធិការដ្ឋានរៀបចំការបោះឆ្នោតខេត្តសៀមរាប បានបើកកិច្ចប្រជុំផ្សព្វផ្សាយស្តីពីកិច្ចសហការការងារសន្តិសុខ សុវត្ថិភាព និងសណ្តាប់ធ្នាប់សាធារណៈសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ ជូនដល់គ្រប់អ្នកពាក់ព័ន្ធទាំងអស់ក្នុងខេត្តសៀមរាប។
លោក ចឹក គឹមជុន នាយករង រដ្ឋបាលសាលាខេត្តសៀមរាប មានប្រសាសន៍ថា ដើម្បីធានាបានសន្តិសុខសុវត្ថិភាព និងសណ្តាប់ធ្នាប់សាធារណៈនៃដំណើរការពិនិត្យបញ្ជី និងការចុះឈ្មោះបោះឆ្នោត និងការផ្តល់សុពលភាពលើបញ្ជីបោះឆ្នោត ឆ្នាំ២០២៤ ប្រព្រឹត្តទៅដោយរលូន គ្មានការភ័យខ្លាច ការបំភិតបំភ័យ ការគំរាមកំហែង និងអំពើហិង្សា គណបញ្ជាការឯកភាពខេត្តសៀមរាប បានដាក់ចេញនូវផែនការស្តីពីកិច្ចការពារការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ។ ជាមួយនោះ ក៏សូមឱ្យកម្លាំងសមត្ថកិច្ច អាជ្ញាធរដែនដីគ្រប់ជាន់ថ្នាក់ និងអង្គភាពពាក់ព័ន្ធ ត្រូវផ្តល់កិច្ចសហការពង្រឹងបន្ថែមនូវកិច្ចសហការរវាងយន្តការរចនាសម្ព័ន្ធសន្តិសុខបោះឆ្នោតរបស់រាជរដ្ឋាភិបាល និងលេខាធិការដ្ឋានខេត្តរៀបចំការបោះឆ្នោត ក្រុមប្រឹក្សាឃុំសង្កាត់ និងក្រុមចុះឈ្មោះ។ ស្នើឱ្យរចនាសម្ព័ន្ធសន្តិសុខបោះឆ្នោត ត្រូវសហការជាមួយកម្លាំងសមត្ថកិច្ចជំនាញពាក់ព័ន្ធ បង្កើនប្រសិទ្ធភាពបង្ការ ទប់ស្កាត់ និងបង្ក្រាបបទល្មើសព្រហ្មទណ្ឌគ្រប់ប្រភេទ ឬក៏សកម្មភាពបំពានច្បាប់ផ្សេងៗទៀត ដែលបង្កឱ្យមានការភ័យខ្លាច និងប៉ះពាល់ដល់បរិយាកាសនយោបាយ និងសន្តិសុខសង្គមជាតិទាំងមូល។
លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្ត បានបញ្ជាក់ថា គ.ជ.ប នឹងរៀបចំដំណើរការពិនិត្យបញ្ជីឈ្មោះ និងការបោះឆ្នោត និងការផ្តល់សុពលភាពលើបញ្ជីបោះឆ្នោត ឆ្នាំ២០២៤ អនុវត្តពីថ្ងៃទី០១ ខែកញ្ញា ដល់ថ្ងៃទី៣០ ខែវិច្ឆិកា ឆ្នាំ២០២៤។ ការពិនិត្យបញ្ជីឈ្មោះ និងការចុះឈ្មោះ បោះឆ្នោតនេះ ត្រូវបានរៀបចំនៅក្នុងសភាពការណ៍ដែលស្ថានភាពសង្គម សេដ្ឋកិច្ច និងនយោបាយនៅកម្ពុជា មានការវិវឌ្ឍល្អប្រសើរនៅក្រោយការបោះឆ្នោតអសកល គឺការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុមប្រឹក្សាក្រុងស្រុកខណ្ឌ អាណត្តិទី៤ ពេលថ្មីៗ កន្លងទៅ។ កត្តាសន្តិសុខសុវត្ថិភាព និងសណ្តាប់ធ្នាប់សង្គមនេះហើយ ដែលធ្វើឱ្យ គ.ជ.ប មានលទ្ធភាពគ្រប់គ្រាន់ក្នុងការរៀបចំ ចាត់ចែ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតនាពេលខាងមុខនេះ។
លោក នឹម វ៉ាន់សំ ក៏បានថ្លែងអំណរគុណយ៉ាងជ្រាលជ្រៅចំពោះតំណាងមន្ទីរអង្គភាព គណបក្ស នយោបាយ សមាគម អង្គការមិនមែនរដ្ឋាភិបាល ដែលបានចំណាយ ពេលវេលាដ៏មានតម្លៃអញ្ជើញចូលរួមក្នុងកិច្ចប្រជុំដ៏មានសារៈសំខាន់នេះ។ ហើយក៏សូមអំពាវនាវដល់ប្រជាពលរដ្ឋសូមអញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោតឱ្យបានគ្រប់ៗគ្នា ចាប់ផ្តើមពីថ្ងៃទី១ ខែកញ្ញា រហូតដល់ថ្ងៃទី១៦ ខែកញ្ញា ឆ្នាំ២០២៤ខាងមុខនេះ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
