ក្រុមយុវជននៃក្រុមសិល្បៈមហាជនប្រមាណជិត ២០០នាក់ បានទទួលការបណ្ដុះបណ្ដាលពីការសម្ដែងសិល្បៈរបាំក្បាច់បុរាណខ្មែរ ដើម្បីចូលរួមអភិរក្សវិស័យសិល្បៈបុរាណ និងដើម្បីពួកគាត់មានជំនាញតាមក្បួនខ្នាតច្បាស់លាស់ ក្នុងការសម្ដែងសិល្បៈបុរាណ ដែលការបណ្ដុះបណ្ដាលនេះរៀបចំដោយមន្ទីរវប្បធម៌ និងវិចិត្រសិល្បៈខេត្ដសៀមរាប រយៈពេល៣ថ្ងៃ ចាប់ពីថ្ងៃទី៣០ ខែសីហា ដល់ថ្ងៃទី១ ខែកញ្ញា ឆ្នាំ២០២៤ ដែលពិធីបើកវគ្គបណ្តុះបណ្ដាលនេះ ធ្វើឡើងនៅសាលាវិចិត្រសិល្បៈភូមិភាគសៀមរាប។
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្ដសៀមរាប បានបញ្ជាក់ថា វគ្គបណ្ដុះបណ្ដាលនេះ មានក្រុមសិល្បៈមហាជនចំនួន ២០ក្រុមចូលរួម មានមហាជនជិត២០០នាក់ ដោយមានគ្រូជំនាញសិល្បៈចំនួន៥នាក់ មកពីរាជធានីភ្នំពេញ ជួយបង្ហាត់បង្រៀន ដើម្បីឱ្យពួកគាត់ជាសិល្បករ សិល្បៈការី មានជំនាញសម្ដែងសិល្បៈតាមក្បួនខ្នាតត្រឹមត្រូវ ក្នុងការចូលរួមចំណែកអភិរក្សសិល្បៈបុរាណខ្មែរ។ ពិសេសជាងនេះទៅទៀត គឺដើម្បីពង្រីក និងពង្រឹងគុណភាពសិល្បៈបុរាណខ្មែរឱ្យបានរឹងមាំ គង់វង់ សម្រាប់កូនខ្មែរជំនាន់ក្រោយបានស្គាល់ ខណៈដែលខេត្ដសៀមរាបជាខេត្ដសម្បូរដោយវប្បធម៌បុរាណ។
លោក មួន សុភាព បញ្ជាក់ទៀតថា ការបើកវគ្គបណ្ដុះបណ្ដាលនេះ គឺចង់ឱ្យក្រុមសិល្បៈទាំងអស់មានឱកាសចាប់យកអាជីពជាអ្នកសម្ដែងសិល្បៈមានសមត្ថភាពច្បាស់លាស់នាពេលអនាគត ព្រោះការបណ្ដុះបណ្ដាលផ្ដោតសំខាន់លើតួអង្គមានបីតួអង្គ រួមមាន តួអង្គនាង តួនាងរង និងតួយក្ស ដែលតួទាំងបីនេះ ដែលត្រូវចាំបាច់ត្រូវហាត់ឱ្យមានភាពស្ទាត់ជំនាញ មានគុណភាពរឹងមាំ និងមានក្បួនខ្នាតត្រឹមត្រូវ តាមទម្រង់ល្ខោនបុរាណខ្មែរ។
លោក មួន សុភាព ក៏បានបញ្ជាក់បន្ថែមថា នេះជាលើកទី៤ នៃវគ្គបណ្ដុះបណ្ដាលនេះ ដែលជាផែនការរបស់មន្ទីរ ក្នុងគម្រោងការបណ្ដុះបណ្ដាលដល់សិល្បករសិល្បៈការនី លើវិស័យសិល្បៈរបាំក្បាច់បុរាណខ្មែរ ដែលការចូលរួមក្នុងវគ្គនីមួយៗ មានក្រុមយុវជនចូលរួមបណ្ដុះបណ្ដាលពីជាង ១០០នាក់ទៅ ២០០នាក់ ដែលនេះបានបង្ហាញយុវជនខ្មែរនៅមានបេះដូងស្រលាញ់សិល្បៈបុរាណខ្មែរ។ លោកបានសម្ដែងមោទនភាពដែលខេត្ដសៀមរាប មានយុវជនច្រើនចូលរួមអភិរក្សសិល្បៈវប្បធម៌លើសពីការរំពឹងទុក៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
