ក្រុមសិល្បៈមហាជនប្រមាណជិត ២០០នាក់ កាលពីថ្ងៃទី០១ ខែកញ្ញា ឆ្នាំ២០២៤នេះ បានបញ្ចប់ការបណ្ដុះបណ្ដាលស្ដីពីការពង្រឹងគុណភាព និងការសម្ដែងរបាំក្បាច់បុរាណខ្មែរ ដែលរៀបចំឡើងដោយមន្ទីរវប្បធម៌ និងវិចិត្រសិល្បៈខេត្ដសៀមរាប នៅសាលាវិចិត្រសិល្បៈភូមិភាគសៀមរាប។
ក្រុមសិល្បៈមហាជនដែលបានបញ្ចប់ការបណ្តុះបណ្ដាលនេះ បានបង្ហាញថា ពួកគាត់ពិតជាមានក្ដីរីករាយណាស់ ចំពោះការទទួលបានការបណ្ដុះបណ្ដាលនេះ ព្រោះពួកគាត់មានការស្រលាញ់សិល្បៈ វប្បធម៌ខ្មែរតាំងពីនៅតូច ទើបពួកគាត់បានចូលរួមក្នុងការបណ្ដុះបណ្ដាលការសម្ដែងរបាំក្បាច់បុរាណខ្មែរនេះ ដើម្បីចូលរួមអភិរក្សថែរក្សាវិស័យសិល្បៈបុរាណឱ្យបានគង់វង្ស តទៅជំនាន់ក្រោយៗទៀត។
ពួកគាត់បង្ហាញទៀតថា ការហ្វឹកហាត់ដំបូង ពិតជាមានការលំបាក និងឈឺខ្លួន ប៉ុន្ដែដោយទឹកចិត្ដ និងចំណង់ចំណូលចិត្ដទើបពួកគាត់តស៊ូរហូតបានសម្រេច និងចូលរួមសម្ដែងបានល្អប្រសើរ។ ជាមួយនោះពួកគាត់ ក៏បានស្នើឱ្យយុវជន ជាពិសេសប្រតិបត្តិករទេសចរណ៍ ជួយគាំទ្រវិស័យសិល្បៈប្រពៃណីបុរាណខ្មែរ ដោយយកពួកគាត់ទៅសម្ដែងតាមសណ្ឋាគារ ភោជនីយដ្ឋាន ដើម្បីឱ្យភ្ញៀវទេសចរជាតិអន្ដរជាតិ បានស្គាល់កាន់តែច្បាស់នូវវប្បធម៌ខ្មែរ។
បើតាមលោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្ដសៀមរាប បានបញ្ជាក់ថា ការរៀបចំវគ្គបណ្ដុះបណ្ដាលនេះ គឺដើម្បីឱ្យសិល្បករ សិល្បការី មានជំនាញសម្ដែងសិល្បៈតាមក្បួនខ្នាតត្រឹមត្រូវពីសិល្បៈបុរាណខ្មែរ ពង្រឹងគុណភាពសិល្បៈបុរាណខ្មែរឱ្យបានរឹងមាំ និងគង់វង់ សម្រាប់កូនខ្មែរជំនាន់ក្រោយបានស្គាល់ ខណៈដែលខេត្ដសៀមរាបជាខេត្ដសម្បូរដោយវប្បធម៌បុរាណ។ លោកថាក្រោយបញ្ចប់វគ្គនេះ ពួកគាត់បានទទួលចំចេះដឹងអាចប្រកបអាជីពជាអ្នកសិល្បៈបាន ប៉ុន្ដែលោកបានស្នើឱ្យពួកគាត់ធ្វើយ៉ាងណាការសម្ដែងឱ្យមហាជនទស្សនា ត្រូវសម្ដែងទៅតាមជំនាញក្បួនខ្នាតត្រឹមត្រូវ មិនទៅសម្ដែងនៅកន្លែងដែលគេមិនឱ្យតម្លៃ ឬមិនគួរសម្ដែង ដែលធ្វើប៉ះពាល់ដល់វប្បធម៌របស់ខ្មែរ។ មិនត្រូវយកវប្បធម៌ខ្មែរ ទៅជាន់ឈ្លីក្នុងការសម្ដែងណាឡើយ ជាពិសេសត្រូវចូលរួមគាំទ្រលើកស្ទួយវិស័យសិល្បៈឱ្យបានគង់វង្ស លើសពីនោះក្រុមអ្នកសិល្បៈត្រូវចេះដឹងគុណគ្រូ ដែលបានបណ្ដុះបណ្ដាលឱ្យខ្លួនមានជំនាញច្បាស់លាស់ត្រូវនៅក្នុងខ្លួន៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
