នាព្រឹកថ្ងៃទី០២ ខែកញ្ញា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយអាជ្ញាធរស្រុក បានចុះផ្សព្វផ្សាយសេចក្តីប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋក្នុងភូមិចំនួន១៣ មានភូមិតាអុង ភូមិគោកអំពិល ភូមិរំជច្រុះ ភូមិថ្នល់ ភូកិក្នុង ភូមិព្រៃទទឹង ភូមិក្បាលក្តួច ភូមិបាឡាំង ភូមិចំបក់ខ្ពស់ ភូមិរូងថ្មី ភូមិល្វែងឬស្សី ភូមិតាងួន និងភូមិកកោះ ឃុំល្វែងឬស្សី ស្រុកជីក្រែង ខេត្តសៀមរាប ដែលពិធីនេះធ្វើឡើងក្នុងបរិវេណវត្តធម្មជោតសត្ថារាម ហៅវត្តតាអុង។
លោក ស៊ុន សុជាតិ អនុប្រធានមន្ទីរ មានប្រសាសន៍ថា ការផ្សព្វផ្សាយជាសាធារណៈនូវដំណើរការចុះបញ្ជីដីធ្លីមានលក្ខណៈជាប្រព័ន្ធនេះ គឺដើម្បីជាការជូនដំណឹងដល់ម្ចាស់ក្បាលដីទាំងអស់ ក្នុងការត្រៀមលក្ខណៈទៅលើទីតាំងដីរបស់ខ្លួន ដូចជាការពិនិត្យទៅលើព្រំដីរបស់ខ្លួន និងអ្នកជាប់ព្រំឱ្យមានការឯកភាពគ្នា គោលដៅបញ្ចៀសទំនាស់អំឡុងពេលក្រុមការងារចុះវាស់វែង ជាពិសេសត្រៀមនូវឯកសារដែលពាក់ព័ន្ធឱ្យបានរួចជាស្រេច ដើម្បីឱ្យមន្រ្តីចុះបញ្ជីធ្វើបានវាស់វែងបានលឿន មាននូវសុក្រឹត្យភាព ត្រឹមត្រូវទាំងលក្ខណៈបច្ចេកទេស និងទាំងលក្ខណៈច្បាប់។
ព័ត៌មានជាតិ ថ្មីៗ
លោកអនុប្រធានមន្ទីរ បន្តថាការចុះបញ្ជីដីធ្លីមានលក្ខណៈជាប្រព័ន្ធនេះ ក្រុមការងារតែងតែអនុវត្តន៍តាមនីតិវិធីសំខាន់ៗ ចំនួន៥គឺ ១.ដំណាក់កាលត្រៀមរៀបចំ ២.ដំណាក់កាលប្រតិបត្តិបច្ចេកទេស ៣.ដំណាក់កាលបិទផ្សាយជាសាធារណៈនូវឯកសារនៃការវិនិច្ឆ័យ ៤.ដំណាក់កាលសម្រេចលើឯកសារវិនិច្ឆ័យ និងទី៥.ដំណាក់កាលចេញបណ្ណ និងចែកបណ្ណជូនម្ចាស់ដី។ ចំពោះលទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធសម្រាប់ខេត្តសៀមរាប មន្ទីរបានសម្រេចប្រកាសកំណត់តំបន់សម្រាប់ធ្វើការវិនិច្ឆ័យដែលមានលក្ខណៈជាប្រព័ន្ធរួចបានចំនួន ៥៨៣ភូមិលើក្រុង/ស្រុកទាំង១៣ ។
លោក ធូ ចន្ថុល អភិបាលរងស្រុកជីក្រែង មានប្រសាសន៍ថា ការចុះបញ្ជីដីធ្លីលក្ខណៈជាប្រព័ន្ធ ពិតជាមានសារៈសំខាន់ណាស់សម្រាប់បងប្អូនជាម្ចាស់ ដើម្បីទទួលបាននូវវិញ្ញាបនបត្រសម្គាល់ម្ចាស់កម្មសិទ្ធិដីធ្លី ឬ ជាបណ្ណសម្គាល់សិទ្ធិកាន់កាប់អចលនវត្ថុពេញលេញស្របតាមច្បាប់នៅក្នុងប្រើប្រាស់ ចាត់ចែង និងអាស្រ័យផល។ ចំពោះបុគ្គលដែលចារឈ្មោះលើវិញ្ញាបនបត្រសម្គាល់ម្ចាស់អចលនវត្ថុ គឺជាកម្មសិទ្ធិករ ឬជាម្ចាស់កម្មសិទ្ធិនៃអចលនវត្ថុនោះហើយត្រូវបានគាំពារដោយច្បាប់ក្នុងការប្រើប្រាស់សិទ្ធិនៃកម្មសិទ្ធិព្រមទាំងការពារដោយច្បាប់នៅរាល់សកម្មភាពរំលោភបំពានលើកម្មសិទ្ធិនោះ។ លោកក៏បានអំពាវនាវឱ្យបងប្អូនជាម្ចាស់ដីទាំងអស់ ត្រូវចូលរួមសហការជាមួយក្រុមការងារចុះបញ្ជីដីធ្លីមានលក្ខណៈជាប្រព័ន្ធ ដើម្បីជួយពន្លឿនការចុះវាស់វែងដីធ្លីឱ្យបានលឿន៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
