ការដេញថ្លៃគម្រោងសាងសង់ផ្លូវបេតុងអាមេចំនួន ២ខ្សែ ក្នុងសង្កាត់បល្ល័ង្ក ក្រុងរុនតាឯកតេជោសែន និងឃុំត្រពាំងធំ ស្រុកប្រាសាទបាគង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៣ ខែកញ្ញា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្តអាជ្ញាធរក្រុងស្រុក គណៈកម្មការលទ្ធកម្មឃុំសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ឈឿ ជូ ប្រធានគណៈកម្មការលទ្ធកម្មឃុំត្រពាំងធំ ស្រុកប្រាសាទបាគង បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំត្រពាំងធំ បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង២០០ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ដាក់លូរការពារផ្លូវ១កំប្លេ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១១៩.៨៩៦.២០០រៀល ដោយមានក្រុមហ៊ុនចំនួន៧ បានដាក់សំណើ។ ជាលទ្ធផលបានទៅលើក្រុមហ៊ុន យ៉ែម សុងីម ក្នុងតម្លៃ ៥៩.៧០០.០០០រៀល។
ព័ត៌មានជាតិ ថ្មីៗ
ចំណែកលោកស្រី ឡែម ណាត ប្រធានគណៈកម្មការលទ្ធកម្មសង្កាត់បល្ល័ង្ក ក្រុងរុនតាឯកតេជោសែន បានឱ្យដឹងដែរថា គម្រោងមូលនិធិសង្កាត់ឆ្នាំ២០២៤នេះ សង្កាត់បល្ល័ង្ក បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង៥០ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ដាក់លូរការពារផ្លូវ១កំប្លេ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ៣៤.៥៣៥.២០០រៀល ដោយមានក្រុមហ៊ុនចំនួន៧ បានដាក់សំណើ។ ជាលទ្ធផលបានទៅលើក្រុមហ៊ុន សុខ មករា ក្នុងតម្លៃ ១៥.២៥០.០០០រៀល។
ជាមួយនឹងការទទួលបានសិទ្ធិនៃសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
