សិក្ខាសាលាពិគ្រោះយោបល់ ស្តីពីការរៀបចំផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥-២០២៨ ដែលរៀបចំឡើងនៅក្រុងសៀមរាប ក្រោមអធិបតីភាព ឯកឧត្តម ថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ (គ.អ.ទ.ស) នៅថ្ងៃទី០៣ ខែកញ្ញា ឆ្នាំ២០២៤ ត្រូវបានបិទបញ្ចប់ជាផ្លូវការ ជាមួយនឹងការទទួលបានការគាំទ្រ និងផ្លែផ្កាគួរជាទីមោទនៈ។
អង្គសិក្ខាសាលានេះដែរ សម្រេចបានលទ្ធផលដោយការគាំទ្រ និងដាក់ចេញនូវសសរស្តម្ភចំនួន៥ នៃផែនការអភិវឌ្ឍន៍រួមមាន៖ ទី១.ការពង្រឹង និងពង្រីកទីផ្សារទេសចរណ៍ចម្រុះមកកាន់ខេត្តសៀមរាប, ទី២.ការលើកកម្ពស់ខេត្តសៀមរាបជាគោលដៅទេសចរណ៍គួរឱ្យចងចាំ និងផ្តល់នូវបទពិសោធទេសចរណ៍ល្អៗ, ទី៣.ការកាត់បន្ថយគម្លាតរដូវកាលទេសចរណ៍នៅខេត្តសៀមរាប, ទី៤.ការលើកកម្ពស់ភាពប្រកួតប្រជែងផ្នែកថ្លៃ និងមិនមែនថ្លៃ នៃគោលដៅទេសចរណ៍ខេត្តសៀមរាប, និងទី៥.ការធ្វើពិពិធកម្ម និងលើកកម្ពស់អត្តសញ្ញាណ “សៀមរាប តារារះនាទិសឧត្តរ”។ ក្នុងនោះអង្គសិក្ខាសាលា ក៏បានឯកភាពគាំទ្រក្នុងការលើកសំណើជូនរាជរដ្ឋាភិបាល ដើម្បីដាក់បញ្ចូលនូវគម្រោងកសាង និងកែលម្អឱ្យកាន់តែប្រសើរឡើង នូវហេដ្ឋារចនាសម្ព័ន្ធ និងសេវាគាំទ្រទេសចរណ៍នៅតាមគោលដៅអាទិភាព ទៅក្នុងផែនការអភិវឌ្ឍន៍ មានដូចជា៖ តំបន់ឧទ្យានជាតិភ្នំគូលែន តំបន់បេតិកភណ្ឌអង្គរ តំបន់បឹងទន្លេសាប តំបន់ក្រុងសៀមរាប អាកាសយានដ្ឋានអន្តរជាតិសៀមរាប-អង្គរ និងតំបន់ជុំវិញតំបន់ការពារប្រាសាទបន្ទាយស្រីជាដើម។
ព័ត៌មានជាតិ ថ្មីៗ
ឯកឧត្តម ថោង ខុន ប្រធាន គ.អ.ទ.ស បានបង្ហាញពីគោលបំណងដោយបានកំណត់គន្លឹះយុទ្ធសាស្ត្រដែលផ្តល់ផលភ្លាមៗ ក្នុងរយៈពេលខ្លី និងរយៈពេលមធ្យម តាមរយៈការធ្វើអាទិភាវូបនីយកម្មសកម្មភាពរបស់គ្រប់ភាគីពាក់ព័ន្ធ ទាំងលើការគ្រប់គ្រង ការអភិវឌ្ឍ និងការផ្សព្វផ្សាយទេសចរណ៍ខេត្តសៀមរាប ដោយបន្ស៊ីពីខ្លឹមសារនៃ “ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥” និងស្របតាមការវិវត្តជាក់ស្តែងនៃបរិបទទីផ្សារទេសចរណ៍ក្រោយវិបត្តិកូវីដ-១៩ ដើម្បីទាក់ទាញភ្ញៀវទេសចរចម្រុះជាតិសាសន៍មកកម្សាន្តក្នុងខេត្តសៀមរាប ឱ្យបានគ្រប់រដូវកាលមកច្រើនដង ស្នាក់នៅយូរ និងចំណាយច្រើន។
ឯកឧត្តមទេសរដ្ឋមន្ត្រី មានប្រសាសន៍ថា ខេត្តសៀមរាប ត្រូវកំណត់ទស្សនវិស័យនៃការអភិវឌ្ឍ ដោយរួមបញ្ចូលទាំងទេសចរណ៍វប្បធម៌ និងទេសចរណ៍ធម្មជាតិ ខណៈដែលបច្ចុប្បន្នការទស្សនាប្រាសាទនៅតែជាហេតុផលចម្បងតែមួយរបស់ភ្ញៀវទេសចរក្នុងការមកកាន់ខេត្តសៀមរាប។ ខេត្តសៀមរាប ត្រូវពង្រឹងលក្ខណសម្បត្តិរបស់ខ្លួន សម្រាប់ចាប់យកកាលានុវត្តភាពដែលមាននៅលើទីផ្សារអន្តរជាតិ និងត្រៀមខ្លួនឱ្យបានរួចរាល់នៅចំពោះមុខបញ្ហាប្រឈមថ្មីៗ ដែលជាបច្ច័យពីកត្តាខាងក្រៅ និងកត្តាខាងក្នុង។ ឯកឧត្តមទេសរដ្ឋមន្ត្រី បានផ្តល់នូវអនុសាសន៍មួយចំនួន ដើម្បីជំរុញយន្តការស្ថាប័ន និងការអនុវត្ត ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ឱ្យសម្រេចបានជោគជ័យប្រកបដោយប្រសិទ្ធភាព ដោយបានស្នើឱ្យក្រុមការងារលេខាធិការដ្ឋាន ខិតខំបន្តរៀបចំ ផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥-២០២៨ ឱ្យបានឆាប់រហ័ស ដោយត្រូវបន្តកិច្ចសហការជាមួយគ្រប់ភាគីពាក់ព័ន្ធ ដើម្បីធានាបាននូវសង្គតិភាព ទាំងលើទិដ្ឋភាពខ្លឹមសារ និងយន្តការអនុវត្ត នៅពេលដែលផែនការនេះត្រូវបានអនុម័តជាផ្លូវការដោយរាជរដ្ឋាភិបាល៕
អត្ថបទ និងរូបភាព៖ លោក យូ វង្ស, ជា ស្រស់
កែសម្រួល៖ លោក អ៊ុន ណារាជ្យ
