ឯកអគ្គរដ្ឋទូតអុីស្រាអែលប្រចាំកម្ពុជា និងថៃ លោកស្រី Orna Sagiv បានធ្វើការប្រដូចទីក្រុងសៀមរាប ទៅនឹងប្រទេសអុីស្រាអែល ដែលពោរពេញទៅដោយភាពបៃតង លោកជំទាវថ្លែងបែបនេះ ក្នុងពិធីដាំកូនឈើប្រភេទដើមក្ងោក និងដើមជ្រៃកូរ៉េ ចំនួន៤៥០ដើម អមសងខាង និងទ្រូងផ្លូវ វិថី៧មករា ស្ថិតក្នុងភូមិជន្លង់ សង្កាត់សាលាកំរើក ក្រុងសៀមរាប នៅថ្ងៃទី០៣ ខែកញ្ញា ឆ្នាំ២០២៤ ម្សិលមិញ។
លោកស្រី Orna Sagiv បានលើកឡើងថា អ្វីដែលយើងកំពុងតែធ្វើនៅថ្ងៃនេះ គឺស្ថិតនៅក្នុងដំណើរមួយ ដែលអភិវឌ្ឍន៍ក្រុងរបស់យើងឱ្យក្លាយទៅជាទីក្រុងបៃតង។ លោកជំទាវថា អុីស្រាអែលជាប្រទេសដែលតូច និងមានប្រជាជនតិច ហើយជាប្រទេសដែលមានវាលខ្សាច់ច្រើន និងមិនសូវមានទឹកសាបក្នុងការប្រើប្រាស់នោះទេ ។ កាលពីមុនប្រទេសអុីស្រាអែល គឺជាវាលខ្សាច់ តែដល់ពេលបច្ចុប្បន្ននេះ គឺជាប្រទេសបៃតង ដោយសារតែរដ្ឋាភិបាលយកចិត្តទុកដាក់ជាចំបងទៅលើការដាំដើមឈើ។ ដូច្នេះគម្រោងដាំដើមឈើនេះ ក៏នឹងជួយឱ្យក្រុងសៀមរាប ក្លាយទីក្រុងបៃតង។
លោក អុឹង គឹមលាង អភិបាលរងខេត្តសៀមរាប មានប្រសាសន៍ថា ក្រៅពីក្នុងក្រុងសៀមរាប រដ្ឋបាលខេត្តក៏មានគម្រោងដាំកូនឈើចំនួន ១០០.០០០ដើមទៀត នៅទូទាំងខេត្តសៀមរាប។ លោកថាប្រសិនបើយើងធ្វើដំណើរមកពីភ្នំពេញ ឬ ក៏មកពីខេត្តផ្សេងៗចូលមកដល់ ស្រុកប្រាសាទបាគង ខេត្តសៀមរាប យើងបានឃើញដើមឈើជាច្រើននៅអមសងខាងផ្លូវ និងមានភាពត្រជាក់ត្រជុំ ដែលជាកន្លែងនៅពេលភ្ញៀវទេសចរជាតិ និងអន្តរជាតិ មកដល់ គឺបានប្តូរបរិយាកាសភ្លាមដែលប្រៀបដូចទៅនឹងវិមានធម្មជាតិមួយ។ ប៉ុនែ្តប្រសិនបើហួសមកបន្តិច គឺមិនមានដើមឈើនោះទេ។ ដូច្នេះហើយ រដ្ឋបាលខេត្តគ្រោងនឹងដាំដើមឈើបន្ថែមទៀត ដោយយើងទាំងអស់គ្នាចូលរួមដាំជាមួយគ្នា។
គួរឱ្យដឹងថា កាលពីពេលថ្មីនេះ អាជ្ញាធរខេត្តសៀមរាប បានដាក់ចេញនូវផែនការដាំដើមឈើចំនួន ២៤.០០០ដើម ក្នុងរយៈពេល២ឆ្នាំ នៅក្នុងក្រុងសំដៅលើកកម្ពស់សោភណភាព និងបរិស្ថាននៅក្នុងក្រុងសៀមរាប។ ដែលមកដល់ពេលនេះ អាជ្ញាធរដោយមានការចូលរួមពីភាគីពាក់ព័ន្ធនានា បានធ្វើការដាំដើមឈើក្នុងក្រុងបានជាង មួយម៉ឺនដើម រួចហើយ ក្នុងនោះមានដើមឈើធំៗជិត ៦.០០០ដើម និងដើមឈើតូចៗបានជិត ១០.០០០ដើមទៀត៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
