គណៈកម្មការលទ្ធកម្មឃុំដំដែក ស្រុកសូទ្រនិគម ខេត្តសៀមរាប នៅថ្ងៃទី០៣ ខែកញ្ញា ឆ្នាំ២០២៤ បានប្រកាសបញ្ចប់ការដេញថ្លៃគម្រោងសាងសង់ផ្លូវបេតុងអាមេ១ខ្សែ និងជួសជុលផ្លូវដីសក្រាលក្រួសក្រហម១ខ្សែ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ផាន់ សាយ ប្រធានគណៈកម្មការលទ្ធកម្មឃុំដំដែក ស្រុកសូទ្រនិគម បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំដំដែក បានដាក់ដេញថ្លៃគម្រោងចំនួន២ គឺទី១.គម្រោងសាងសង់ផ្លូវបេតុងអាមេ១ខ្សែ ប្រវែង១០០ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ សាងសង់លូ៣កន្លែង និងស្លាកសញ្ញាចរាចរណ៍ចំនួន៣ រួមជាមួយនឹងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១២០.០១៤.៩០៩រៀល ដោយមានក្រុមហ៊ុនចំនួន៨ បានដាក់សំណើ។ ជាលទ្ធផលបានទៅលើក្រុមហ៊ុន អុឹង លីសួរ ក្នុងតម្លៃ ៦៣.៦០០.៣០០រៀល។ ទី២.គម្រោងជួសជុលផ្លូវដីសក្រាលក្រហមចំនួន ១ខ្សែប្រវែង២៥០ម៉ែត្រ ទទឹង៥ម៉ែត្រ កម្រាសក្រួស ០.១៥ម៉ែត្រ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១៧.៦១៧.៧៦៣ ដោយមានក្រុមហ៊ុនចំនួន ៥បានដាក់ដំណើរ។ ជាលទ្ធផលបានទៅលើក្រុមហ៊ុន អុីង លីសួរ ក្នុងតម្លៃ ១៣.១៧៥.០០០រៀល។
ជាមួយនឹងការទទួលបានសិទ្ធិនៃជួសជុលនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគត្តិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និង រូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
