ក្នុងពិធីប្រគល់វិញ្ញាណបណ្ណបត្របញ្ចប់កម្រិតមត្ដេយ្យសិក្សា និងបឋមសិក្សានៃសាលាអារីហ្សូន ខេត្ដសៀមរាប នាថ្ងៃទី១ ខែកញ្ញា ឆ្នាំ២០២៤ លោក លី ប៊ុនណា ប្រធានមន្ទីរអប់រំ យុវជន និងកីឡា បានលើកឡើងថា ការអប់រំល្អ គឺជាកូនសោរ សម្រាប់ដោះស្រាយនូវរាល់បញ្ហាសង្គមសេដ្ឋកិច្ច ដែលត្រូវបន្តរួមគ្នាគាំទ្រ និងអភិវឌ្ឍ ដើម្បីចូលរួមចំណែកដល់ការអភិវឌ្ឍវិស័យនេះឱ្យកាន់តែរីកលូតលាស់បន្ថែមទៀត។
លោក លី ប៊ុនណា មានប្រសាសន៍ថា ការសិក្សារៀនសូត្រ គឺពិតជាមានសារៈសំខាន់ណាស់សម្រាប់ជីវិតមនុស្សម្នាក់ៗហើយជាការងារមួយគ្មានទីបញ្ចប់សម្រាប់ធានាដល់ការអភិវឌ្ឍលើគ្រប់វិស័យ ព្រោះកិច្ចការនេះបានផលិតធនធានមនុស្សប្រកបដោយគុណភាព និងសមត្ថភាពខ្ពស់។ លោកក៏បានស្នើឱ្យលោកគ្រូអ្នកគ្រូអាណាព្យាបាល ត្រូវបន្តរួមគ្នាគាំទ្រ និងចូលរួមចំណែកដល់ការអភិវឌ្ឍវិស័យធនធានចំណេះដឹង ឱ្យកាន់តែរីកលូតលាស់បន្ថែមទៀត ដើម្បីបន្តលើកម្ពស់គុណភាព និងប្រសិទ្ធភាពការងារក្នុងវិស័យអប់រំឱ្យស្របតាមនិន្នាការរីកចម្រើន និងបទដ្ឋាននៃវិស័យអប់រំ ទាំងក្នុងកម្រិតតំបន់និងពិភពលោក។ ក្នុងនោះអាណាព្យាបាលគ្រប់រូប មិនត្រូវទុកឱ្យកូនចៅណាម្នាក់ស្ថិតនៅក្រៅសេវាអប់រំ និងត្រូវបង្កើនសក្តានុពលឱ្យកូនចៅនៅជំនាន់ក្រោយជាមនុស្សដែលមានសមត្ថភាព និងជំនាញគ្រប់គ្នានៅពេលអនាគត។
លោកប្រធានមន្ទីរបង្ហាញថា ក្នុងឆ្នាំសិក្សាថ្មី២០២៤-២០២៥ ខាងមុខនេះ ក្រសួងអប់រំនឹងនៅបន្តផ្តោតការយកចិត្តទុកដាក់ដល់ការប្រមូលកុមារឱ្យបានចូលរៀន គ្រប់ៗគ្នាដោយអនុវត្តតាមទិសស្លោក “សាលារៀនស្វែងរកកុមារ” ដោយខិតខំកសាងសាលារៀនឱ្យកាន់តែខិតជិតទីលំនៅរបស់សិស្សានុសិស្ស។ កិច្ចការនេះជាជំហានថ្មីបន្ថែមទៀត ដែលនឹងបង្កលក្ខណៈងាយស្រួលដល់កុមារ ដើម្បីទទួលបានការអប់រំប្រកបដោយសមធម៌ និងជំរុញឱ្យមានការចូលរួមពីគ្រប់ភាគីពាក់ព័ន្ធ ជាពិសេសមាតាបិតា អ្នកអាណាព្យាបាលសិស្សក្នុងការបង្កើតបរិស្ថានរៀនសូត្រដល់សិស្សានុសិស្សឱ្យប្រកបដោយសុខមាលភាព ទាំងផ្លូវកាយនិង ផ្លូវចិត្តពោល គឺប្រែក្លាយសាលារៀនជាសាលាកុមារមេត្រី។ ទន្ទឹមនេះក្រសួងអប់រំនឹងបន្តបញ្ជូនសិស្ស និស្សិតឱ្យទៅចូលរួមប្រឡងប្រជែងថ្នាក់អន្តរជាតិលើមុខវិជ្ជានានា ដូចជាគណិតវិទ្យា រូបវិទ្យា ដើម្បីលើកទឹកចិត្តពួកគេ ឱ្យមានក្តីស្រមៃក្លាយជាអ្នកវិទ្យាសាស្រ្តវ័យក្មេងជាដើម និងនាំមកនូវមេដាយជូនដល់ប្រទេសជាតិផងដែរ។
បើតាម លោក ម៉ី ភារិទ្ធ នាយកសាខាសាលាអារីហ្ហូន មានប្រសាសន៍ថា ក្នុងឆ្នាំសិក្សាកន្លងមកនេះ សិស្សដែលត្រូវឡើងទទួលវិញ្ញាបនបត្របញ្ចប់កម្រិតសិក្សាមានចំនួន ១២៣នាក់ ក្នុងនោះថ្នាក់មត្តេយ្យកម្រិតខ្ពស់ចំនួន៣៦នាក់ និងថ្នាក់ទី៦ ចំនួន៥១នាក់ ព្រមទាំងមានសិស្សភាសាបរទេសសិង្ហបុរី និងភាសាចិន សិស្សពូកែប្រចាំឆ្នាំសិក្សា២០២៣-២០២៤ ផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
