វិញ្ញាបនបត្រសម្គាល់ម្ចាស់អចលនវត្ថុចំនួន ៨.៥២១បណ្ណ លើក្បាលដីសរុបចំនួន ១០.៩២៥ក្បាលដី ស្ថិតក្នុងភូមិចំនួន១៩ នៃឃុំចាន់ស ស្រុកសូទ្រនិគម ខេត្តសៀមរាប ត្រូវបានអាជ្ញាធរខេត្ត សហការជាមួយមន្ត្រីជំនាញប្រគល់ជូនប្រជាពលរដ្ឋជាម្ចាស់កម្មសិទ្ធិយកទៅប្រើប្រាស់ជាផ្លូវការ ដែលពិធីប្រគល់នេះធ្វើឡើង នៅព្រឹកថ្ងៃទី៣០ ខែសីហា ឆ្នាំ២០២៤នេះ ក្នុងបរិវេណវត្តប្រាសាទអណ្តែត ក្រោមអធិបតីភាព លោក សុខ ថុល អភិបាលរងខេត្តសៀមរាប ដោយមានការចូលរួមពីមន្ត្រីជំនាញ អាជ្ញាធរមូលដ្ឋាន និងប្រជាពលរដ្ឋជាច្រើនរូប។
លោក ជុំ ចាន់ថេង អភិបាលរងស្រុកសូទ្រនិគម បានបញ្ជាក់ថា ការចុះបញ្ជីដីធ្លីលក្ខណៈជាប្រព័ន្ធ បានចូលរួមចំណែកយ៉ាងច្រើនក្នុងការជួយរៀបចំភូមិឃុំ និងស្រុក ជាពិសេសលើការរៀបចំហេដ្ឋារចនាសម្ព័ន្ធនៅក្នុងមូលដ្ឋាន ហើយក៏បានជួយកាត់បន្ថយទំនាស់ និងកាត់បន្ថយភាពក្រីក្ររបស់ប្រជាពលរដ្ឋផងដែរ។ ហេតុនេះសំណូមពរដល់បងប្អូនប្រជាពលរដ្ឋទាំងអស់ សូមរក្សាទុកបណ្ណកម្មសិទ្ធិនេះឱ្យបានល្អ ដោយមិនត្រូវយកទៅអ៊ុតឱ្យសោះពីព្រោះវាធ្វើឱ្យខូចបណ្ណ។
លោក ស៊ុន សុជាតិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានឱ្យដឹងថា វិញ្ញាបនបត្រសម្គាល់ម្ចាស់អចលនទ្រព្យដែលប្រគល់ជូននាពេលនេះ គឺផ្តល់ចំពោះតែក្បាលដីណាដែលគ្មានទំនាស់ មិនជាប់ពាក់ព័ន្ធនឹងបុរាណដ្ឋាន ឬតំបន់រក្សាការពារដោយមន្ទីរធនធានទឹក និងឧតុនិយម ហើយក្បាលដីដែលជាប់ពាក់ព័ន្ធទំនាស់ផ្សេងៗគណៈកម្មការរដ្ឋបាល នឹងបន្តពិនិត្យដោះស្រាយតាមនីតិវិធីបន្តទៀត។ ចំពោះវិញ្ញាបនបត្រសម្គាល់ម្ចាស់អចលនវត្ថុចំនួន ៨.៥២១បណ្ណ ដែលបានផ្ដល់ជូននាពេលនេះ គឺសម្រាប់ភូមិចំនួន១៩ នៃឃុំចាន់ស ស្រុកសូទ្រនិគម រួមមាន៖ ភូមិជាំ ភូមិគោកតឹង ភូមិស្រែប្រិយ៍ ភូមិត្រពាំងទូក ភូមិជប់ ភូមិតាតោកខាងជើង ភូមិកន្សែងក្រោម ភូមិកន្សែងលើ ភូមិតាតោកខាងលិច ភូមិតាតោកកណ្តាល ភូមិសន្លោង ភូមិស្វាយស ភូមិដូនដៀវ ភូមិថ្នល់ ភូមិបាញ់កាំភ្លើង ភូមិគោកចិន ភូមិចាន់សខាងជើង ភូមិចាន់សខាងត្បូង និងភូមិច្បារលើ។
លោកស្រី សុខ ថុល មានប្រសាសន៍ថា គិតចាប់ពីឆ្នាំ២០០៧ មកដល់បច្ចុប្បន្ននេះ អាជ្ញាធរខេត្តសៀមរាប បានខិតខំយកចិត្តទុកដាក់ខ្ពស់លើការងារចុះបញ្ជីដីធ្លីជូនប្រជាពលរដ្ឋ ទាំងលក្ខណៈដាច់ដោយដុំ និងជាប្រព័ន្ធ ស្របទៅតាមគោលការណ៍ណែនាំច្បាប់ និងលិខិតបទដ្ឋានគតិយុត្តិ ក្នុងគោលដៅធានាឱ្យបាននូវការចុះបញ្ជីដីធ្លីមួយប្រកបដោយតម្លាភាព និងការចូលរួម។ លោកថាដំណើរការចុះបញ្ជីដីធ្លីក្នុងខេត្តសៀមរាបនាពេលកន្លងមក ឃើញថាមានឧបសគ្គ និងបញ្ហាស្មុគស្មាញមួយចំនួនដូចជា បណ្តឹងតវ៉ា បណ្តឹងជំទាស់ អវត្តមាននៃម្ចាស់ក្បាលដី ម្ចាស់ក្បាលដីពុំមានឯកសារគ្រប់គ្រាន់ជាដើម ក៏ប៉ុន្តែបញ្ហាទាំងនេះត្រូវបានអាជ្ញាធរមូលដ្ឋានគ្រប់លំដាប់ថ្នាក់ធ្វើការដោះស្រាយជូនប្រជាពលរដ្ឋរហូតទទួលបានលទ្ធផលល្អប្រសើរជាបន្តបន្ទាប់។
លោកអភិបាលរងខេត្ត ក៏បានបញ្ជាក់ថា ចំពោះក្បាលដីមួយចំនួនដែលនៅសល់ពុំទាន់អាចចេញបណ្ណជូនបានដោយសារក្បាលដីទាំងនោះមានពាក់ព័ន្ធនឹង ក្បាលដីគ្មានទិន្នន័យ ជាប់បណ្តឹងទប់ស្កាត់ ជំទាស់តវ៉ាពាក់ព័ន្ធនឹងផ្លូវ អូរ ប្រឡាយ និងមួយចំនួនទៀតជាប់បុរាណដ្ឋាន។ ចំពោះក្បាលដីជាប់បណ្តឹងតវ៉ា គណៈកម្មការរដ្ឋបាល នឹងបន្តសម្របសម្រួលដោះស្រាយជាបន្តបន្ទាប់ជាមួយម្ចាស់បណ្តឹងទាំងនោះ ហើយក្បាលដីជាប់ពាក់ព័ន្ធនឹងបុរាណដ្ឋាន រដ្ឋបាលខេត្តនឹងបន្តសហការជាមួយអាជ្ញាធរជាតិអប្សរា មន្ទីរអង្គភាពពាក់ព័ន្ធ ដើម្បីពិនិត្យ និងដោះស្រាយស្របតាមនីតិវិធីច្បាប់ជាធរមាន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
