ក្នុងកម្មវិធីយើងធ្វើបានរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី២៨ ខែសីហា ឆ្នាំ២០២៤នេះ លោក ប៉ើ អ៊ូម៉ើត មន្ត្រីស្វែងរកមតិគាំទ្ររបស់អង្គការជំនួយផ្នែកច្បាប់នៅកម្ពុជា LAC បានបង្ហាញថា អង្គការលោកការផ្តល់សេវាផ្នែកច្បាប់ដល់ស្ត្រី ឬកុមារីរងគ្រោះពីអំពើហិង្សា ទាំងផ្លូវកាយ ផ្លូវភេទ និងការរំលោភបំពានផ្សេងៗ គឺមានការផ្តល់ជាប្រឹក្សាយោបល់ផ្នែកច្បាប់ទៅលើបទព្រហ្មទណ្ឌស៊ីវិល ដែលមានមេធាវីដោយមិនគិតថ្លៃដល់ពួកគាត់។
លោក ប៉ើ អ៊ូម៉ើត បញ្ជាក់ថា ការផ្តល់មេធាវីនេះ គឺក្រោមកិច្ចសហការជាមួយអាជ្ញាធរមូលដ្ឋានពីថ្នាក់ឃុំដល់ថ្នាក់ខេត្ត ក្នុងនោះមន្ទីរព័ត៌មាន និងមន្ទីរកិច្ចការនារីខេត្តក៏បានព្រមព្រៀងគ្នាតាំងពីឆ្នាំ២០១០ ដោយនៅពេលមានបញ្ហាណាមួយ គឺមានអង្គការដៃគូដែលនៅក្នុងខេត្តសៀមរាប តែងតែសហការ និងចែកចាយព័ត៌មាន ដើម្បីទទួលបាននូវការផ្តល់សេវាដោយមានប្រសិទ្ធភាពទៅកាន់ស្រ្តី និងកុមារីរងគ្រោះ។
លោកបន្តថា កន្លងមកនេះអង្គការជំនួយផ្នែកច្បាប់នៃកម្ពុជាប្រចាំខេត្តសៀមរាប គឺមានអ្នកមករកសេវាច្រើន ដោយក្នុងមួយថ្ងៃមានពី ២ទៅ ៣ករណី លើសេវាមេធាវីនៃករណីរឿងស៊ីវិលដែលទាក់ទងនឹងការលែងលះតាមការព្រមព្រៀង និងលែងលះតាមពាក្យបណ្តឹងមានចំនួនច្រើនគួរឱ្យកត់សម្គាល់។ ក្នុងនោះអ្នកមករកសេវាភាគច្រើនជាស្ត្រីក្រីក្រ រស់នៅតាមតំបន់ដាច់ស្រយាល ដូចជា៖ ស្រុកវ៉ារិន និងក្រឡាញ់ ដោយពួកគាត់បានដឹងព័ត៌មានតាមរយៈអាជ្ញាធរមូលដ្ឋាន។
មន្ត្រីដដែលក៏បានជំរុញដល់បងប្អូនដែលមិនទាន់ដឹងពីព័ត៌មាននៃការផ្តល់សេវាផ្នែកច្បាប់ បងប្អូនអាចទាក់ទងទៅកាន់មន្ទីរកិច្ចការនារី ដើម្បីឱ្យអង្គការនានា អាចផ្តល់សេវាជូនតាមរយៈមន្ទីរ និងអង្គភាពពាក់ព័ន្ធឱ្យកាន់តែទូលំទូលាយ៕
អត្ថបទ៖ មន្ត្រីវិទ្យុ
កែសម្រួល៖ លោក អ៊ុន ណារាជ្យ