នៅរសៀលថ្ងៃទី២៧ ខែសីហា ឆ្នាំ២២០២៤ម្សិលមិញនេះ ប្រជាពលរដ្ឋចំនួន ៣០គ្រួសារ ដែលមានជីវភាពខ្វះខាត់ រស់នៅក្នុងភូមិអូរ ឃុំកណ្ដែក ស្រុកប្រាសាទបាគង ខេត្ដសៀមរាប បានទទួលអំណោយជាគ្រឿងឧបភោគបរិភោគពីសប្បុរសជនប្រទេសព្រុយណេ តាមរយៈគម្រោងផ្ទះមនុស្សធម៌ ក្រោមការសម្របសម្រួលពី លោក ងឿម សុផារ៉ា សមាជិកក្រុមប្រឹក្សាឃុំកណ្តែក ស្រុកប្រាសាទបាគង ។
លោក ងឿម សុផារ៉ា បានបញ្ជាក់ថា ការផ្ដល់អំណោយមនុស្សធម៌នាពេលនេះ គឺជាការបង្ហាញពីក្ដីស្រលាញ់របស់ប្រជាជនប្រទេសព្រុយណេ ទៅកាន់ប្រជាជនកម្ពុជា ជាពិសេសពលរដ្ឋក្នុងស្រុកប្រាសាទបាគង និងផ្ដល់សម្ភារៈសិក្សាដល់សិស្សានុសិស្សដែលមានជីវភាពខ្វះខាតជាច្រើន ដែលគិតមកទល់ពេលនេះមានរយៈពេល៥ឆ្នាំមកហើយ។ លោកថាការផ្ដល់ជូននេះ វាជាសកម្មភាពនៃវប្បធម៌ចែករំលែករបស់ប្រជាជនព្រុយណេ មកកាន់ប្រជាពលរដ្ឋក្រីក្រកម្ពុជា ដែលវានឹងអាចជួយសម្រួលដល់ជីវភាពប្រជាពលរដ្ឋបានមួយផ្នែក កាត់បន្ថយការចំណាយក្នុងគ្រួសារផងដែរ។
សូមជម្រាបថា ក្រៅពីផ្ដល់អំណោយដល់បងប្អូនក្រីក្រទាំង ៣០គ្រួសារនេះ សប្បុរសជនប្រទេសព្រុយណេ ក៏នឹងបន្តជួយសាងសង់ផ្ទះ និងបង្គន់អនាម័យដល់គ្រួសារខ្វះខាត នៅក្នុងឃុំកណ្ដែក និងបានរៀបចំរង្វាន់លើកទឹកចិត្តដល់សិស្សពូកែចំនួន៤នាក់ផងដែរ។
បើតាមលោក ងឿម សុផារ៉ា បានឱ្យដឹងថា ចាប់ពីតាំងពីឆ្នាំ២០១៧ ដល់បច្ចុប្បន្ននេះ សប្បុរសជននានាតាមរយៈគម្រោងផ្ទះមនុស្សធម៌ បានជួយសាងសង់ផ្ទះជូនប្រជាពលរដ្ឋខ្វះខាតបានចំនួន ២២៣ខ្នង និងបង្គន់អនាម័យចំនួន ៧១បង្គន់។ ដោយឡែកកាលពីពេលថ្មីៗនេះលោកបានទទួលជំនួយពីសប្បុរសជនមកពីសហរដ្ឋអាមេរិក តាមរយៈគម្រោងផ្ទះមនុស្សធម៌បានជួយផ្ទះ៥ខ្នង និងបង្គន់៥បង្គន់ ជូនដល់ប្រជាពលរដ្ឋក្នុងភូមិអូរ ឃុំកណ្ដែក ស្រុកប្រាសាទបាគង ខេត្ដសៀមរាប ទៀតផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
