រយៈពេល១ឆ្នាំ នៃការដឹកនាំរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានធ្វើឱ្យប្រព័ន្ធផ្សព្វផ្សាយរបស់រដ្ឋទាំងថ្នាក់ជាតិ និងក្រោមជាតិកាន់តែមានគុណភាព ឆាប់រហ័ស និងឈានមុខ ក្នុងផ្សព្វផ្សាយសារនយោបាយរបស់ថ្នាក់ដឹកនាំ និងកិច្ចការសាធារណមតិ នេះបើតាមការលើកឡើងរបស់លោក សេង ផល្លី ប្រធានមន្ទីរព័ត៌មានខេត្តសៀមរាបស្ដីទី ក្នុងកិច្ចប្រជុំផ្សព្វផ្សាយពីវឌ្ឍនភាពការងាររយៈពេល ១ឆ្នាំ របស់ក្រសួងព័ត៌មាន ជូនដល់ថ្នាក់ដឹកនាំ និងមន្ត្រីក្រោមឱវាទ នាព្រឹកថ្ងៃទី២៨ ខែសីហា ឆ្នាំ២០២៤នេះ។
លោកប្រធានមន្ទីរស្ដីទី បន្ថែមថា ឆ្នាំ២០២៤នេះ រាជរដ្ឋាភិបាលបានកំណត់ថា ជាឆ្នាំ(ចាប់ហ្វ្រាំង)ត្រួតពិនិត្យឡើងវិញ ទៅលើតួនាទីភារកិច្ច ប្រសិទ្ធភាពការងារ គុណភាពរបស់ក្រសួង ស្ថាប័ន ជាពិសេសការជ្រើសរើសមន្ត្រី និងប្រព័ន្ធលើកទឹកចិត្តមន្ត្រី។ តាមប្រសាសន៍របស់ ឯកឧត្តម នេត្រ ភក្ត្រា មកដល់ពេលនេះ ក្រសួងព័ត៌មានបានបញ្ចប់សេចក្ដីព្រាង អនុក្រឹត្យស្ដីពីការរៀបចំ និងការប្រព្រឹត្តិទៅរបស់ក្រសួងព័ត៌មានរួចរាល់ហើយ ព្រមទាំងគ្រោងបញ្ចប់ការវិភាគមុខងារ ជាមួយនឹងការគ្រប់គ្រងធនធានមនុស្ស នៅឆ្នាំ២០២៤ផងដែរ។
បើតាមប្រសាសន៍របស់ឯកឧត្តម នេត្រ ភក្ត្រា នាកិច្ចប្រជុំថ្នាក់ដឹកនាំក្រសួងព័ត៌មាន រាជធានីភ្នំពេញកាលពីរសៀលថ្ងៃទី២៣ ខែសីហាកន្លងមកនេះ បញ្ជាក់ថា សមិទ្ធផលដែលសម្រេចបាននេះ គឺដោយសារប្រទេសមានសុខសន្តិភាព និងសាមគ្គីភាពផ្ទៃក្នុងរបស់ក្រសួង។ ឯកឧត្តម រដ្ឋមន្ត្រី បានវាយតម្លៃជារួមថា ចាប់ពីថ្នាក់ដឹកនាំជាន់ខ្ពស់ រហូតដល់មន្ត្រីក្រោមឱវាទរបស់ក្រសួង បានខិតខំប្រឹងប្រែង និងសហការគ្នាយ៉ាងសស្រាក់សស្រាំក្នុងការបំពេញកិច្ចការក្នុងរយៈពេលកន្លងមកនេះ។
ដោយឡែកនៅក្នុងកិច្ចប្រជុំផ្សព្វផ្សាយនៅមន្ទីរព័ត៌មានខេត្តនេះ លោកប្រធានមន្ទីរស្ដីទី បានណែនាំដល់ មន្ត្រីក្រោមឱវាទស្វែងយល់ពីផែនការយុទ្ធសាស្ត្រ អភិវឌ្ឍន៍វិស័យព័ត៌មាន និងសោតទស្សន៍ឆ្នាំ២០២៤-២០២៨ ដែលផែនការបង្កើនប្រសិទ្ធភាពស្ថាប័នទំនាក់ទំនងសាធារណៈរបស់រាជរដ្ឋាភិបាលប្រកបដោយ “បុរេសកម្ម សកម្ម អន្តរកម្ម ប្រសិទ្ធភាព និងប្រសិទ្ធផល” ដើម្បីគ្រប់គ្រងសណ្ដាប់ធ្នាប់សារព័ត៌មាន ធានាបានសន្តិសុខព័ត៌មាន និងសុខដុមនីយកម្មសង្គម។ ទន្ទឹមនោះ លោក ក៏បានផ្សព្វផ្សាយការចែកជូនដោយឥតគិតថ្លៃ ដល់អ្នកសារព័ត៌មានក្នុងខេត្ត នូវកូនសៀវភៅ “ធម្មនុញ្ញវិជ្ជាជីវៈសារព័ត៌មាន” ដែលបោះពុម្ពដោយក្រសួងព័ត៌មាន មានគោលបំណងរួមគ្នារៀបចំសណ្តាប់ធ្នាប់ និងលើកកម្ពស់គុណតម្លៃវិជ្ជាជីវៈសារព័ត៌មាននៅកម្ពុជា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
