ក្នុងឱកាសចុះពិនិត្យសកម្មភាពការងារសាងសង់ស្ពានបេតុងឆ្លងស្ទឹង តភ្ជាប់ពីស្រុកក្រឡាញ់ ខេត្តសៀមរាប ទៅស្រុកព្រះនេត្រព្រះ ខេត្តបន្ទាយមានជ័យ នៅថ្ងៃទី២៦ ខែសីហា ឆ្នាំ២០២៤នេះ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានណែនាំ និងជំរុញដល់ក្រុមជាងធ្វើឱ្យណាពន្លឿនការងារជួសជុលស្ពានខាងលើ និងផ្លូវ២ខ្សែទៀត ធ្វើយ៉ាងណាឱ្យឆាប់រួចរាល់នៅដើមឆ្នាំ២០២៥ ដើម្បីងាយស្រួលដល់ប្រជាពលរដ្ឋនៃខេត្តទាំង២ ងាយស្រួលក្នុងការធ្វើដំណើរ។
ឯកឧត្តម សៀង ណាំ បានចាត់ទុកស្ពានថ្មីនេះ ថាជាសមិទ្ធិផលថ្មីបន្ថែមទៀតសម្រាប់គាំទ្រដល់ទំនាក់ទំនងអ្នករស់នៅមូលដ្ឋានជនបទនៃស្រុកក្រឡាញ់ និងស្រុកព្រះនេត្រព្រះ ដែលវានឹងកាត់បន្ថយបានទាំងពេលវេលា និងថវិកា ក្នុងការធ្វើដំណើរទៅកាន់សាលារៀន វត្តអារាម ជាពិសេសស្ត្រីឆ្លងទន្លេ ការដឹកជញ្ជូនអ្នកជំងឺយប់ព្រលប់ និងជួយបង្កលក្ខណៈងាយស្រួលក្នុងទំនាក់ទំនងនិងដឹកកសិផលពីជនបទទៅកាន់ទីប្រជុំជន។ល។
សូមជម្រាបថា ក្នុងការចុះពិនិត្យនេះដែរ ក៏មានការរួមអាជ្ញាធរស្រុកក្រឡាញ់ ព្រមទាំងព្រះចៅអធិការ អាចារ្យ គណៈកម្មការវត្តគោកដូងសំរោងក្លាង ស្រុកព្រះនេត្រព្រះ ខេត្តបន្ទាយមានជ័យ ដោយបានចុះពិនិត្យសកម្មភាពការងារសាងសង់ស្ពានបេតុងឆ្លងស្ទឹង មានបណ្តោយ៤៥ម៉ែត្រ ទទឹង៨ម៉ែត្រ តភ្ជាប់ពីឃុំក្រឡាញ់ ស្រុកក្រឡាញ់ ខេត្តសៀមរាប ទៅកាន់ឃុំទឹកជ្ជោរ ស្រុកព្រះនេត្រព្រះ ខេត្តបន្ទាយមានជ័យ និងផ្លូវដីស ប្រវែងប្រមាណជា២គីឡូម៉ែត្រ ភ្ជាប់ពីផ្លូវលេខ២៦៩ ទៅកាន់ស្ពានថ្មី និងជួសជុលជាផ្លូវដីក្រហមមួយខ្សែទៅជាផ្លូវបេតុងប្រវែងជាង១គីឡូម៉ែត្រ ទទឹង៥ម៉ែត្រ តពីផ្លូវ២៦៩ ភ្ជាប់ទៅស្ពានក្នុងគម្រោងថវិកាមូលនិធិរដ្ឋបាលឃុំសំបួរ ឆ្នាំ២០២៣។
ព្រះភិក្ខុកល្យាណោ ព្រិល បញ្ញា ព្រះចៅអធិការវត្តគោកដូងសំរោងក្លាង មានថេរដីកាថា ភូមិសាស្ត្រនេះត្រូវខ័ណ្ឌដោយស្ទឹង កន្លងមកការធ្វើដំណើរឆ្លងទៅមករបស់ប្រជាពលរដ្ឋក្រៅពីតាមបណ្តោយផ្លូវជាតិ គឺប្រើប្រាស់ស្ពានយោល ចាប់ពីផ្នែកខាងលើរហូតដល់ផ្នែកខាងក្រោម គឺមានស្ពានយោលចំនួន ១០កន្លែង។ ដោយមើលឃើញពីការលំបាករបស់ប្រជាពលរដ្ឋទាំងពីរស្រុកក្នុងការធ្វើការដំណើរ និងប្រាស្រ័យទាក់ទងគ្នាទៅវិញទៅទៅមក ក៏ដូចជាការសម្រួលដល់ការដឹកជញ្ជូនទំនិញផ្សេងៗ ទើបព្រះសង្ឃ និងប្រជាពុទ្ធបរិស័ទចំណុះជើងវត្តបានឯកភាពគ្នាសាងសង់ស្ពាននេះឡើង តាមការស្រុះស្រួល និងចូលរួមពីគ្រប់ភាគីពាក់ព័ន្ធ ដែលគ្រោងនឹងចំណាយថវិកាជាង ២២ម៉ឺនដុល្លារ បូករួមទាំងផ្លូវពីរខ្សែទៀតប្រមាណ ៣០ម៉ឺនដុល្លារ។ យ៉ាងណាផ្លូវនេះក៏នៅមានការខ្វះខាតនូវថវិកាក្នុងការសាងសង់ដែរ សូមអំពាវនាវដល់ពុទ្ធបរិស័ទជួយបរិច្ចាគថវិកាដើម្បីពន្លឿនការងារសាងសង់នេះឆាប់បានរួចរាល់។
លោក សុខ ណារ៉េត អភិបាលស្រុកក្រឡាញ់ ខេត្តសៀមរាប បញ្ជាក់ថា ស្ពានថ្មថ្មី និងផ្លូវទាំងពីរខ្សែនេះ ពិតជាមានសារៈសំខាន់សម្រាប់ប្រជាពលរដ្ឋក្នុងមូលដ្ឋានសងខាងស្ទឹងនេះ ព្រោះវានឹងអាចជួយសម្រួលបានច្រើនដល់ការធ្វើដំណើររបស់បងប្អូនប្រជាពលរដ្ឋក្នុងការធ្វើដំណើរឆ្លងកាត់ទៅតាមមូលដ្ឋាន ប្រកបរបរការងារ ទៅសាលារៀន មន្ទីរពេទ្យ និងដឹកជញ្ជូនផ្សេងៗផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
