ក្នុងឱកាសចូលរួមក្នុងកម្មវិធី “ដែនដី និងកសិ-ទេសចរណ៍” កាលពីថ្ងៃចុងសប្ដាហ៍កន្លងទៅនេះ ក្នុងនាមអាជ្ញាធរខេត្តសៀមរាប លោក ង៉ូវ សេងកាក់ អភិបាលរងខេត្ត បានចាត់ទុកកម្មវិធីនេះ ថានឹងជួយជំរុញការលើកកម្ពស់ជីវភាព និងពង្រឹងជំរុញបន្ថែមដល់ប្រជាកសិករនៅតាមមូលដ្ឋានឱ្យមានទីផ្សារកាន់តែទូលំទូលាយ សំដៅចូលរួមលើកកម្ពស់គុណភាព និងធានាសន្តិសុខស្បៀងនៃសង្វាក់ផលិតផលកសិកម្ម និងរួមចំណែកពង្រីកសកម្មភាពកសិទេសចរណ៍នៅក្នុងតំបន់ជុំវិញទីក្រុងសៀមរាបអង្គរ។
លោកអភិបាលរងខេត្ត បង្ហាញក្ដីជឿជាក់ថា តាមរយៈកម្មវិធីនេះនឹងមានអ្នកទិញកាន់តែច្រើន ហើយបន្លែ ផ្លែឈើដែលដាំដោយកសិករក៏នឹងលក់ដាច់ច្រើន ដែលនេះបង្ហាញពីការជឿទុកចិត្តមកលើ ផលិតផលបន្លែ និងផ្លែឈើ ដែលដាំដុះតាមគោលការណ៍សុវត្ថិភាព ហើយកម្មវិធីនេះនឹងបន្តជួយលើកកម្ពស់ការផ្សព្វផ្សាយ ផលិតផលរបស់ប្រជាកសិករទៅកាន់ទីផ្សារកាន់តែទូលាយបន្ថែមទៀត។
.
សូមជម្រាបថា កាលពីចុងសប្តាហ៍កន្លងទៅនេះ អង្គការ អាគ្រីស៊ុត (Agrisud) និងក្លឹបទេសចរណ៍ខេត្តសៀមរាប បានសហការរៀបចំកម្មវិធី “ដែនដី និងកសិ-ទេសចរណ៍” រយៈពេល៣ថ្ងៃ ចាប់ពីថ្ងៃទី២៣ ដល់២៥ ខែសីហា ឆ្នាំ២០២៤ តាមរយៈវេទិកាជំនួបពិភាក្សានៅសណ្ឋាគារមេម័រផាលែស និងការធ្វើដំណើរទៅកាន់តំបន់ភ្នំគូលែន និងសង្កាត់ក្របីរៀលខេត្តសៀមរាប ដើម្បីទស្សនាផលិតផលកសិកម្មដែលគាំទ្រដោយអង្គការអាគ្រីស៊ុត។
លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប បញ្ជាក់ថា កម្មវិធី “ដែនដី និងកសិ-ទេសចរណ៍” ជាឱកាសមួយផ្តល់ឱ្យសាធារណជន និងអ្នកបរិភោគបន្លែបង្កើនការជឿជាក់ និងគាំទ្រផលិតផលរបស់ប្រជាកសិករ ដោយគ្រាន់តែឆ្លៀតពេលពីដំណើរកម្សានទៅស្វែងយល់ភ្លក្សរសជាតិម្ហូបអាហារតាមសហគមន៍ទេសចរណ៍ ចុះទៅពិនិត្យស្ថានភាពនៃការដាំដុះតាមកសិដ្ឋានបន្លែនៅតាមមូលដ្ឋានសហគមន៍នានានិងគួរតែ សិក្សាពីគុណតម្លៃ និងសង្វាក់ផលិត ចៀសវាងមានការសង្ស័យបែបអវិជ្ជមានទៅលើកសិផលខ្មែរ ដោយ មិនបានទៅពិនិត្យដល់កសិដ្ឋានបន្លែឬសហគមន៍ណាមួយនោះ។
ប្រធានអង្គការអាគ្រីស៊ុតប្រចាំកម្ពុជា លោក សេង ពិចិត្រ បង្ហាញថា សន្ទុះនៃអ្នកគាំទ្រផលិតផលបន្លែ និងផ្លែឈើ ដែលដាំដុះតាមគោលការណ៍សុវត្ថិភាព មានការកើនឡើងគួរឱ្យកត់សម្គាល់ ជាពិសេសតាមរយៈសន្ទុះការគាំទ្រ និងទិញផលិតផលនៅផ្សារចុងសប្ដាហ៍ដែលអង្គការអាគ្រីស៊ុត និងមានការគាំទ្រដល់មន្ទីរពាណិជ្ជកម្មខេត្តសម្រាប់រៀបចំផ្សារនេះ។ លោកថា អ្នកទិញកាន់តែច្រើន ហើយបន្លែ ផ្លែឈើ ដែលដាំដោយកសិករក្នុងគម្រោងរបស់អង្គការលក់ដាច់ច្រើន ដែលនេះបង្ហាញពីការជឿទុកចិត្តមកលើ ផលិតផលបន្លែ និងផ្លែឈើ ដែលដាំដុះតាមគោលការណ៍សុវត្ថិភាព ហើយកម្មវិធីនេះនឹងបន្តជួយលើកកម្ពស់ការផ្សព្វផ្សាយ ផលិតផលរបស់ប្រជាកសិករទៅកាន់ទីផ្សារកាន់តែទូលាយបន្ថែមទៀត ជាពិសេសប្រតិបត្តិករទេសចរណ៍នៅក្នុងខេត្តសៀមរាប។
តំណាងសមាគមដាំបន្លែសុវត្ថិភាពនៅភូមិគោកដូង សង្កាត់ក្របីរៀល ក្រុងសៀមរាប លោកស្រី ឈង់ ចំប៉ា បានឱ្យដឹងថា សមាគមនេះបានចងក្រងសមាជិកកសិករដាំដាំណាំ១៤នាក់ នៅឆ្នាំ២០១៨ តាមរយៈការផ្ដល់សម្ភារៈ និងគាំទ្រពីអង្គការអាគ្រីស៊ុត។ ហើយតាំងពីបង្កើតមកឃើញថា សង្វាក់នៃការបញ្ជាទិញបន្លែមានជាបន្តហើយស្ថានភាពជីវភាពគ្រួសារក៏រីកដុះដាលប្រសើរជាងមុនច្រើន ខណៈពេលមុននោះការដាំដុះគ្មានបច្ចេកទេស ដាំតាមបែបយថាផល និងពិបាកក្នុងការរកទីផ្សារ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
