ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី២៣ ខែសីហា ឆ្នាំ២០២៤ អាជ្ញាធរឃុំកំពង់ភ្លុក ស្រុកប្រាសាទបាគង ខេត្តសៀមរាប បានប្ដេជ្ញាបន្តពង្រឹងការងារសន្តិសុខ សណ្តាប់ធ្នាប់ក្នុងមូលដ្ឋានឱ្យបានកាន់តែល្អប្រសើរ ដើម្បីធានាឱ្យបាននូវសុខសុវត្ថិភាពជូនប្រជាពលរដ្ឋក្នុងមូលដ្ឋាន ជាពិសេសភ្ញៀវទេសចរដែលមកកម្សាន្តនៅតំបន់ទេសចរណ៍របស់ខ្លួន។
លោក សុខ ប្លង់ មេឃុំកំពង់ភ្លុក បានឱ្យដឹងថា ក្រៅពីការងារសន្តិសុខ និងសណ្ដាប់ធ្នាប់ ឃុំកំពង់ភ្លុក ត្រូវបានកែលម្អហេដ្ឋារចនាសម្ព័ន្ធជាបន្តបន្ទាប់ ពីផ្លូវដីទៅជាផ្លូវបេតុង ដើម្បីសម្រួលការធ្វើដំណើររបស់ប្រជាពលរដ្ឋក្នុងមូលដ្ឋាន ជាពិសេសភ្ញៀវទេសចរដែលមកកម្សាន្តនៅតំបន់កំពង់ភ្លុកតែម្ដង។ ចំពោះការកែលម្អក្នុងសហគមន៍កំពង់ភ្លុក រដ្ឋបាលឃុំបានដាក់បញ្ចូលជាផែនការវិនិយោគប្រចាំឆ្នាំ ដើម្បីធ្វើយ៉ាងណាឱ្យទាក់ទាញអ្នកទេសចរ និងធ្វើឱ្យសហគមន៍មានការរីកចម្រើនជាបន្តបន្ទាប់។
លោកបន្តថា ចំពោះបញ្ហាបរិស្ថានវិញ អាជ្ញាធរ និងសហគមន៍ ដោយមានការគាំទ្រពីអាជ្ញាធរខេត្ត មន្ទីរបរិស្ថាន មន្ទីរទេសចរណ៍ អាជ្ញាធរស្រុក និងអង្គការដៃគូបានធ្វើការសម្អាតជាប្រចាំ ដោយកំណត់ជាអទិភាពក្នុង១ខែម្ដង តែបើសិនមានករណីដែលចាំបាច់គឺធ្វើបន្ថែម ២ទៅ៣ដងទៀត និងចុះផ្សព្វផ្សាយដល់ប្រជាពលរដ្ឋឱ្យចេះទុកដាក់សំរាម ដោយអង្គការទំពាំងស្នងឬស្សីបានគាំទ្រផ្តល់ជាសម្ភារៈ និងថវិកាក្នុងការធ្វើកិច្ចការលើបរិស្ថានទាំងនេះ៕
អត្ថបទ៖ កញ្ញា វុឹង ហាន់ស៊ាង
កែសម្រួល៖ លោក អ៊ុន ណារាជ្យ
