កាលពីរសៀលថ្ងៃទី២១ ខែសីហា ឆ្នាំ២០២៤នេះ មជ្ឈមណ្ឌលសកម្មភាពកម្ចាត់មីនកម្ពុជា (CMAC) បានរៀបចំកិច្ចប្រជុំត្រៀមខ្លួនក្នុងការចូលរួមព្រឹត្តិការណ៍ ស្តីពីពិភពលោកមួយដែលគ្មានមីននៃរដ្ឋភាគីអនុសញ្ញាអូតាវ៉ា ឆ្នាំ២០២៤ ដោយមានការចូលរួមពីមន្ត្រីថ្នាក់ដឹកនាំមកពីគ្រប់កងឯកភាព និងនាយកដ្ឋានជំនាញពាក់ព័ន្ធនៃអង្គភាពស៊ីម៉ាក់ នៅសារមន្ទីរតេជោសន្តិភាពខេត្តសៀមរាប។
ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពកម្ចាត់មីនកម្ពុជា មានប្រសាសន៍ថា កិច្ចប្រជុំនេះ គឺផ្ដោតសំខាន់ទៅនឹងព្រឹត្តិការណ៍អមនៃការរៀបចំតាំងពិព័រណ៍នៅសារមន្ទីរតេជោសន្តិភាព ដើម្បីទទួលស្វាគមន៍ដំណើរទស្សនកិច្ចរបស់គណៈប្រតិភូ និងការត្រៀមរៀបចំធ្វើជាម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ ឬកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៃអនុសញ្ញាអូតាវ៉ា នៅព្រះរាជាណាចក្រកម្ពុជា ដែលនឹងប្រព្រឹត្តទៅចាប់ពីថ្ងៃទី២៤-២៩ ខែវិច្ឆិកា ឆ្នាំ២០២៤ ខាងមុខក្នុងនាមកម្ពុជាធ្វើជាម្ចាស់ផ្ទះ។
ឯកឧត្តម ហេង រតនា បញ្ជាក់ថា ព្រឹត្តិការណ៍ដ៏មានសារៈសំខាន់ខាងមុខនេះ នឹងមានតំណាងចូលរួមប្រមាណជាង៨០០នាក់ មកពី១៦៤ប្រទេស នៃរដ្ឋសមាជិក ដោយបានផ្តោតសំខាន់ទៅការពិនិត្យមើលវឌ្ឍនភាពកិច្ចប្រតិបត្តិការរបស់អង្គភាពស៊ីម៉ាក់ក្នុងការ កសាងអគារ និងការដាក់តាំងបង្ហាញផ្សេងៗ នៅសារមន្ទីរតេជោសន្តិភាព។ ឯកឧត្តមក៏បានកោតសរសើរដល់មន្ត្រីជាថ្នាក់ដឹកនាំនៃអង្គភាពស៊ីម៉ាក់គ្រប់ជាន់ថ្នាក់ ដែលបានខិតខំប្រឹងប្រែងយកចិត្តទុកដាក់ក្នុងការបំពេញតួនាទីភារកិច្ចបានល្អ និងត្រៀមលក្ខណៈ ដើម្បីធ្វើឱ្យការដាក់តាំងបង្ហាញក្នុងព្រឹត្តិការណ៍ដ៏មានអត្ថន័យនេះទទួលបានភាពជោគជ័យ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
