ការដេញថ្លៃគម្រោងសាងសង់ផ្លូវបេតុងអាមេចំនួន២ខ្សែ ក្នុងឃុំសសស្តម្ភ និងឃុំកែវពណ៌ ស្រុកពួក ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យនៅថ្ងៃទី២២ ខែសីហា ឆ្នាំ២០២៤ ដោយមានការចូលរួមពី មន្ត្រីបច្ចេកទេសខេត្ត ក្រុមការងារថ្នាក់ជាតិចុះពិនិត្យតាមដានកិច្ចលទ្ធកម្ម អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក គី ឡាយ ប្រធានគណៈកម្មការលទ្ធកម្មឃុំសសរស្តម្ភ ស្រុកពួក បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំសសរស្តម្ភ បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១៦៥ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១១៥.៣៤៣.៨០៤រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌី ខនស្ត្រាក់សិន ក្នុងតម្លៃ ១១៣.១៩០.០០០រៀល។
ដោយឡែកលោកស្រី ណៃង៉ា ប្រធានគណៈកម្មការលទ្ធកម្មស្ដីទី ឃុំកែវពណ៌ ស្រុកពួក បានឱ្យដឹងផងដែរថា គម្រោងមូលនិធិឃុំឆ្នាំ២០១៤នេះ ឃុំកែវពណ៌ បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង២១២ម៉ែត្រ ទទឹង៤ម៉ែត្រ កម្រាស់បេតុង០.១៥ម៉ែត្រ ចាក់ក្រួសធម្មជាតិស្មារផ្លូវសងខាងប្រវែង០.៣០ម៉ែត្រ ដាក់លូរការពារ២កង់ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១០៨.៣៥៧.១៨០រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន រស់ ចំរើន ក្នុងតម្លៃ ១០៧.០០០.០០០រៀល។
ព័ត៌មានជាតិ ថ្មីៗ
ជាមួយនឹងការទទួលបានសិទ្ធិនៃសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
