ថ្លែងក្នុងក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នាព្រឹកថ្ងៃទី២០ ខែសីហា ឆ្នាំ២០២៤ នាយកប្រចាំប្រទេសអង្គការសម្ព័ន្ធចាប់ដៃប្រចាំប្រទេសកម្ពុជាបាន លោក ហោ កុសល្យ បានលើកឡើង ប្រជាពលរដ្ឋមួយចំនួននៅតែមានការយល់ច្រឡំថា លិខិតឆ្លងដែន(ប៉ាស្ព័រ)ជាឯកសារសំដៅថា ជាឯកសារដែលធ្វើឱ្យគាត់ធ្វើការចំណាកស្រុកទៅក្រៅប្រទេសដោយស្របច្បាប់ ប៉ុន្តែការពិតទៅមិនមែនតែលិខិតឆ្លងដែរប៉ុណ្ណោះទេ ពលរដ្ឋត្រូវមានបណ្ណអនុញ្ញាតការងារ, VISA ការងារ, កិច្ចព្រមព្រៀងការងារ, កន្លែងស្នាក់នៅ, ព័ត៌មាននៃការចាកចេញជាដើម។
លោក ហោ កុសល្យ បន្តថាប្រជាពលរដ្ឋនៅមិនទាន់បានយល់ដឹងទូលំទូលាយនៅឡើយពីការធ្វើចំណាកស្រុកដោយប្រកបដោយសុវត្ថិភាព។ ចំណែកការធ្វើចំណាកស្រុកមិនស្របច្បាប់ធ្វើឱ្យពលរដ្ឋប្រឈមជាមួយបញ្ហាជាច្រើន ដូចជាគ្រោះថ្នាក់ការងារជាដើម។ កន្លងមកអង្គការសម្ព័ន្ធចាប់ដៃមានតួនាទីសំខាន់ក្នុងការសហការជាមួយអាជ្ញាធរពាក់ព័ន្ធក្នុងការជួយសម្រួលដល់ការធ្វើចំណាកស្រុករបស់ប្រជាពលរដ្ឋ។ ក្នុងនោះអង្គការមានតួនាទីចំនួន៣ ដូចជា៖ ទី១.មានតួនាទីបំពេញបន្ថែមនូវភាពខ្វះខាតទាំងធនធានថវិកា ទាំងបច្ចេកទេស, ទី២.ធ្វើយ៉ាងណាគោរពរាល់ការសម្រេចចិត្តរបស់ពួកគាត់(ពលករ) និងទី៣.គឺការផ្ដល់សេវាតាមរយៈការសហការជាមួយអ្នកពាក់ព័ន្ធក្នុងការស្វែងរកការងារជូនពួកគាត់។
ជាមួយនោះលោកក៏សូមអំពាវនាវដល់ប្រជាពលរដ្ឋ ប្រសិនបើមានបំណងទៅធ្វើការនៅក្រៅប្រទេស ត្រូវគឺគិតពីបញ្ហាសុវត្ថិភាព លក្ខខណ្ឌការងារ និងការរៀបចំឯកសារឱ្យបានត្រឹមត្រូវ ដើម្បីឱ្យការធ្វើចំណាកស្រុកទៅក្រៅប្រទេស មានភាពស្របច្បាប់ និងប្រកបដោយសុវត្ថិភាព៕
អត្ថបទ៖ មន្ត្រីវិទ្យុជាតិខេត្ត
កែសម្រួល៖ លោក អ៊ុន ណារាជ្យ
