គិតត្រឹមឆមាសទី១ ឆ្នាំ២០២៤នេះ មណ្ឌលផ្តល់សេវាសាធារណៈខេត្តសៀមរាប បានចុះបញ្ជីយានយន្តចំនួន ១៤៤គ្រឿង និងផ្តល់បណ្ណបើកបរចំនួន ៥៥៨បណ្ណ ខណៈកាលពីឆ្នាំ២០២៣កន្លងទៅ មណ្ឌលផ្តល់សេវាសាធារណៈ បានផ្តល់សេវាជូនប្រជាពលរដ្ឋមានដូចជា ការងារចុះបញ្ជីយានយន្តសរុបបាន ៣០៨គ្រឿង ការងារផ្តល់បណ្ណបើកបរយានយន្តសរុបបាន ១.០៦៦បណ្ណ។
លោក ហូ សម័យ ប្រធានមណ្ឌលផ្តល់សេវាសាធារណៈ ហេរីថេកវ៉ក ខេត្តសៀមរាប បានឱ្យដឹងថា មណ្ឌលផ្តល់សេវាសាធារណៈនេះ ជាមណ្ឌលផ្តល់សេវាទី៥ របស់ក្រសួងសាធារណការ និងដឹកជញ្ជូន ហើយដាក់ឱ្យប្រើប្រាស់កាលពីឆ្នាំ២០២១ គោលបំណងបង្កើតមណ្ឌលនេះ គឺដើម្បីជួយសម្រួលក្នុង ការផ្តល់សេវាសាធារណៈ កាត់បន្ថយពេលវេលាទទួលសេវា កាត់បន្ថយចំណាយក្រៅផ្លូវការ លុបបំបាត់នីតិវិធី ស្មុគស្មាញ បង្ខិតសេវាឱ្យទៅជិតប្រជាពលរដ្ឋ ព្រមទាំងអាចគ្រប់គ្រងតាមដានពង្រឹងប្រសិទ្ធភាព និងតម្លាភាព នៃការផ្តល់សេវាឱ្យកាន់តែមានភាពប្រសើរឡើង។ មណ្ឌលផ្តល់សេវានេះដែរ បានផ្ដល់សេវាសាធារណៈដូចជា ចុះបញ្ជីរថយន្ត និងផ្ទេរកម្មសិទ្ធិយានយន្ត ប្ដូរបណ្ណបើកបរខ្មែរ និងបរទេស ដាក់ពាក្យសុំត្រួតពិនិត្យលក្ខណៈបច្ចេកទេសយានជំនិះ(ឆៀក)។ ហើយរហូតមកដល់ពេលនេះ មានរយៈពេល៣ឆ្នាំហើយ ជាលទ្ធផលឃើញថា មណ្ឌលផ្តល់សេវាសាធារណៈនេះ បានផ្តល់សេវាជូនប្រជាពលរដ្ឋបានយ៉ាងល្អប្រសើរ។
ថ្លែងនៅក្នុងឱកាសជួបសំណេះសំណាលជាមួយមន្រ្តីមណ្ឌលផ្តល់សេវាសាធារណៈ ហេរីថេកវ៉ក ខេត្តសៀមរាប នៅព្រឹកថ្ងៃទី២១ ខែសីហា ឆ្នាំ២០២៤នេះ លោក គី វីរិន្ទ ប្រធានមន្ទីរសាធារណការ និងដឹកជញ្ជូនខេត្តសៀមរាប បានជំរុញឱ្យមន្រ្តីបន្តផ្តល់សេវាជូនបង ប្អូនប្រជាពលរដ្ឋប្រកបដោយប្រសិទ្ធភាព តម្លាភាព និងការទទួលខុសត្រូវខ្ពស់ ស្របទៅតាមអនុសាសន៍សម្តេចនាយករដ្ឋមន្ត្រីថា“ជាមន្រ្តីបម្រើរាស្រ្ត មិនមែនជាចៅហ្វាយរាស្រ្តទេ” និងការជំរុញឱ្យប្រើប្រាស់ប្រព័ន្ធបច្ចេកវិទ្យាទំនើប ជាពិសេសស្របទៅនឹងបច្ចុប្បន្នភាពនៃបដិវត្តន៍ឧស្សាហកម្ម ៤.០ ដើម្បីគាំទ្រដល់ការផ្តល់សេវាសាធារណៈវិស័យដឹកជញ្ជូនផ្លូវគោកឱ្យកាន់តែមានភាពងាយស្រួល ចៀសវាងការប្រើប្រាស់សេវាក្រៅផ្លូវការនាំឱ្យខាតទាំងពេលវេលា និងចំណាយថវិកាបន្ថែម ទៀតផងដែរ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
