នាយកដ្ឋានសវនកម្មផ្ទៃក្នុងនៃក្រសួងព័ត៌មាន ដោយមានកិច្ចសហការជាមួយអគ្គនាយកដ្ឋានសវនកម្មផ្ទៃក្នុង ក្រសួងសេដ្ឋកិច្ច និងហិរញ្ញវត្ថុ បានរៀបចំសិក្ខាសាលាស្តីពី“សវនកម្មសមិទ្ធកម្ម” ជូនដល់លោកលោកស្រីជាមន្ត្រីជំនាញមកពីគ្រប់អង្គភាពចំណុះក្រសួងព័ត៌មាន ឱ្យបានស្វែងយល់បន្ថែមថាតើសវនកម្ម សមិទ្ធកម្មជាអ្វី និងអនុវត្តដោយរបៀបណា ស្របពេលដែលអង្គភាពមួយចំនួននៅមិនទាន់យល់ច្បាស់នៅឡើយ ថាអ្វីទៅដែលហៅថា “សវនកម្មសមិទ្ធកម្ម” ដែលសិក្ខាសាលានេះមានរយៈពេល២ថ្ងៃ ថ្ងៃទី២១-២២ ខែសីហា ឆ្នាំ២០២៤ នៅសណ្ឋាគារ អ៊េមព្រីសអង្គរ ខេត្តសៀមរាប។
តំណាងឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ឯកឧត្តម ហោ សុភាព រដ្ឋលេខាធិការក្រសួងព័ត៌មាន មានប្រសាសន៍ថា សិក្ខាសាលាដ៏មានសារៈសំខាន់នាពេលនេះ អាចចាត់ទុកជាកិច្ចខិតខំប្រឹងប្រែង ពង្រឹងមុខងារសវនកម្មផ្ទៃក្នុងរបស់ក្រសួងព័ត៌មាន ដើម្បីរួមចំណែកគាំទ្រដល់យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលបន្តផ្តល់អាទិភាពលើការពង្រឹងអភិបាលកិច្ច ប្រសិទ្ធភាព ស័ក្តិសិទ្ធិភាព និងសមត្ថភាពនៃអង្គភាពក្រោមឱវាទក្រសួងព័ត៌មាន តាមរយៈការបន្តអនុវត្តអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។
ព័ត៌មានជាតិ ថ្មីៗ
ឯកឧត្តម ហោ សុភាព មានប្រសាសន៍ទៀតថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានបន្តអនុវត្តយ៉ាងសកម្មនូវចំពោះ “កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ” ដែលមានលក្ខណៈគ្រប់ជ្រុងជ្រោយ និងគ្របដណ្តប់លើគ្រប់ទិដ្ឋភាព នៃប្រព័ន្ធហិរញ្ញវត្ថុសាធារណៈរបស់ជាតិ។ ចក្ខុវិស័យនៃកម្មវិធីកែទម្រង់នេះគឺ ប្រែក្លាយប្រព័ន្ធគ្រប់គ្រង ហិរញ្ញវត្ថុសាធារណៈកម្ពុជាពីប្រព័ន្ធផ្តោតលើធាតុចូល និងមានលក្ខណៈមជ្ឈការ, ទៅជាប្រព័ន្ធដែលផ្តោត លើលទ្ធផល ឬ សមិទ្ធកម្ម និងមានលក្ខណៈមជ្ឈការ, ស្របតាមស្តង់ដារ និងឧត្តមានុវត្តន៍អន្តរជាតិ។
ឯកឧត្តមបន្តថា ក្នុងរយៈពេលពេញ១ឆ្នាំកន្លងមកនេះ នាយកដ្ឋានសវនកម្មផ្ទៃក្នុងក្រសួងព័ត៌មាន បានចុះធ្វើការពិនិត្យ តាមដាន វាយតម្លៃហានិភ័យ និងធ្វើសវនកម្មសមិទ្ធកម្ម តាមបណ្តាអង្គភាពមួយចំនួនចំណុះក្រសួងព័ត៌មាន តាមផែនការសវនកម្មប្រចាំឆ្នាំ និងផែនការសវនកម្ម៣ឆ្នាំរំកិល២០២៣-២០២៥ ក៏ដូច ជាតាមការចង្អុលបង្ហាញពីឯកឧត្តមរដ្ឋមន្ត្រី។ តាមរយៈរបាយការណ៍នៃការចុះធ្វើសវនកម្មកន្លងមកបានបង្ហាញថា អង្គភាពមួយចំនួននៅមិនទាន់យល់ច្បាស់នៅឡើយថាអ្វីទៅដែលហៅថា “សវនកម្មសមិទ្ធកម្ម”។
ឯកឧត្តមរដ្ឋលេខាធិការ បានកត់សម្គាល់ឃើញថា ចាប់តាំងពីសវនកម្មផ្ទៃក្នុងក្រសួងព័ត៌មានត្រូវបានបង្កើតឡើងរហូតមកទល់បច្ចុប្បន្ន ការអនុវត្តមុខងារនេះមានការលំបាកស្មុគស្មាញ ដោយសារវាមានវិសាលភាពធំ និងត្រូវការនូវពហុជំនាញ ផ្សេងគ្នានៅតាមអង្គភាពក្រោមឱវាទក្រសួង ដែលទាមទារឱ្យសវនករ ត្រូវខិតខំស្វែងយល់អំពីការងារទាំង នោះឱ្យបានច្បាស់លាស់ និងគ្រប់ជ្រុងជ្រោយ។ មួយវិញទៀត សវនដ្ឋានមួយចំនួនអាចមិនឯកភាពលើអនុ សាសន៍នៃការធ្វើសវនកម្ម ដោយសារការវិភាគ ការវាយតម្លៃ និងការសន្និដ្ឋាន ត្រូវបានធ្វើឡើងដោយផ្អែក លើហានិភ័យ។ ទោះបីជាជួបនូវការលំបាកធំតូចយ៉ាងនេះក្តី ក៏សូមលើកទឹកចិត្តដល់សវនករផ្ទៃក្នុង ត្រូវបន្ត បំពេញតួនាទី និងភារកិច្ចរបស់ខ្លួន ប្រកបដោយវិជ្ជាជីវៈ និងការទទួលខុសត្រូវខ្ពស់ ដូចបានកំណត់នៅក្នុង លិខិតបទដ្ឋានគតិយុត្តិជាធរមាន៕
អត្ថបទ និងរូបភាព៖ លោក យូ វង្ស, បូ សាវី
កែសម្រួល៖ លោក អ៊ុន ណារាជ្យ
