នៅរសៀលថ្ងៃទី១៩ ខែសីហា ឆ្នាំ២០២៤ រដ្ឋបាលខេត្តសៀមរាបបានបើកកិច្ចប្រជុំពិភាក្សាស្ដីពីការរៀបចំសេចក្ដីព្រាងគោលការណ៍ណែនាំ ផ្នែកគោលនយោបាយ របស់ក្រុមប្រឹក្សាខេត្តសៀមរាប អាណត្តិទី៤ (២០២៥-២០២៩) ដឹកនាំដោយលោក ចឹក គឹមជុន នាយករងរដ្ឋបាលសាលាខេត្ត និងលោក លោកស្រី ជាថ្នាក់ដឹងនាំមន្ទីរអង្គភាពពាក់ព័ន្ធនានាជាច្រើនរូប។
កិច្ចប្រជុំពិភាក្សានេះធ្វើឡើងក្នុងគោលបំណងដើម្បីប្រមូលធាតុចូលដាក់ចូលនៅ វិស័យ និងសកម្មភាពជាអាទិភាព ឲ្យមានលក្ខណៈគ្រប់ជ្រុងជ្រោយ សម្រាប់រៀបចំសេចក្តីព្រាងគោលការណ៏ណែនាំផ្នែកគោលនយោបាយសម្រាប់ដាក់ជូនក្រុមប្រឹក្សាខេត្តពិនិត្យ និងអនុម័ត ដើម្បីឆ្លើយតបទៅនឹងតម្រូវការជាក់ស្ដែង មានសង្គតិភាពជាមួយគោលនយោបាយជាតិ និងស្របតាមសក្តានុពលដែលខេត្តមាន សំដៅរួមចំណែកអភិវឌ្ឍន៍សេដ្ឋកិច្ច សង្គម និងធ្វើអោយប្រសើរ ឡើងនូវគុណភាពជីវិត និងសុខុមាលភាពប្រជាពលរដ្ឋ ជាពិសេសស្ត្រី កុមារ យុវជន និងជនងាយ រងគ្រោះផ្សេងៗទៀតនៅក្នុងដែនសមត្ថកិច្ចរបស់ក្រុមប្រឹក្សា ។
លោក ចឹក គឹមជុន មានប្រសាសន៍ថា៖សម្រាប់វិស័យ និងសកម្មភាពជាអាទិភាព ដែលទទួលបានពីកិច្ចពិភាក្សានឹងដាក់ចូល ទៅតាមផ្នែកទាំង៤រួមមាន៖ផ្នែកសេដ្ឋកិច្ច ផ្នែកសង្គមកិច្ច ផ្នែកគ្រប់គ្រងដីធ្លី ធនធានធម្មជាតិ បរិស្ថាន ការប្រែប្រួលអាកាសធាតុ និងគ្រោះមហន្តរាយ ផ្នែករដ្ឋបាល និងសន្តិសុខសណ្ដាប់ធ្នាប់ធារណៈ។
ជាមួយនោះលោក ក៏បានជំរុញដល់គ្រប់មន្ទីអង្គភាពនិងភាគីពាក់ព័ន្ឋក្នុងទូទាំងខេត្ត ត្រូវយកចិត្តខ្ពស់ទុកដាក់លើការរៀបចំរបាយការណ៍ ផែនការគោលដៅ លើវិស័យ និងសកម្មភាពជាអាទិភាពរបស់ខ្លួន ដាក់ជូនមករដ្ឋបាលខេត្តឲ្យបានទាន់ពេលវេលាកំណត់ ដើម្បីដាក់ជូនក្រុមប្រឹក្សាខេត្តពិនិត្យ និងអនុម័ត ចេញជាលិខិតបទដ្ឋានគត្តិយុត្តិ សម្រាប់ណែនាំដល់ក្រុមការងារកសាងផែនការខេត្ត និងអ្នកពាក់ព័ន្ធនានាក្នុងខេត្តឱ្យចូលរួម រៀបចំផែនការអភិវឌ្ឍន៍រយៈពេល៥ឆ្នាំ និងកម្មវិធីវិនិយោគ៣ឆ្នាំរំកិលមានលក្ខណៈគ្រប់ជ្រុងជ្រោយ ដែលគ្របដណ្តប់លើគ្រប់វិស័យអាទិភាព សម្រាប់អនុវត្តឲ្យបានជោគជ័យនាពេលខាងមុខ ៕
អត្ថបទនិងរូបភាព៖ លោក ធន់ ពូថេ
កែសម្រួល៖ យូ វង្ស
