គណៈកម្មាធិការជាតិអូឡាំពិកកម្ពុជា បានបើកការប្រកួតកីឡាស្ប៉េស្យាល់អូឡាំពិក ថ្នាក់ខេត្តប្រចាំឆ្នាំ២០២៤ នៅកីឡដ្ឋានខេត្ដសៀមរាប ស្ថិតនៅភូមិស្វាយធំ ឃុំកណ្ដែក ស្រុកប្រាសាទបាគង នាថ្ងៃទី១៩ខែសីហាឆ្នាំ២០២៤ ក្រោមអធីបតី ឯកឧត្តម សែម សុខា រដ្ឋលេខាធិការ និងជាអនុប្រធាន តំណាងដ៏ខ្ពង់ខ្ពស់ រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា ដែលជាប្រធានគណៈកម្មាធិការអូឡាំពិកកម្ពុជា និងលោក លី សារី អភិបាលរងខេត្ដតំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ព្រមទាំងវត្តមានលោក លោកស្រី តំណាងមន្ទីរ ពាក់ព័ន្ធ ក្នុងអនុគណៈកម្មាធិការអូឡាំពិក កីឡាករ កីឡាការិនីក្នុងខេត្តសៀមរាបជាច្រើនទៀត។
លោក លី សារី អភិបាលរងខេត្ដសៀមរាប មានប្រសាសន៍ថា៖ ការរៀបចំដំណើរការប្រកួតកីឡាស្ប៉េស្យាល់អូឡាំពិកថ្នាក់ខេត្តប្រចាំឆ្នាំ២០២៤ និងកម្មវិធីត្រួតពិនិត្យសុខភាពកីឡាករ កីឡាការិនី បញ្ញាខ្សោយ ធ្វើឡើងក្នុងគោលបំណង ផ្ដល់ឱកាសឱ្យក្រុមកីឡាករ កីឡាការិនី មានបញ្ហាខ្សោយសតិបញ្ញា ថ្នាក់ភូមិ ឃុំ ស្រុក ខេត្តបានជួបជុំគ្នា ធ្វើការប្រកួតប្រជែង ចែករំលែក បទពិសោធន៍ និងផ្តល់ភាពសប្បាយរីករាយ ដល់គ្នាទៅវិញទៅមក សំដៅរួមចំណែកលើកកំពស់ ជនមានបញ្ញាខ្សោយ និងលុបបំបាត់ពីការរើសអើងផ្សេងៗនៅក្នុងសង្គម ។លើសពីនេះ ការប្រកួតមិនមែនដើម្បីតែជ័យជំនះម៉្យាងនោះទេ គឺដើម្បីរឹតចំណងមិត្តភាព សាមគ្គីភាព និងផ្តល់ឱកាសចូលរួមសកម្មភាពក្នុងសង្គមតាមរយៈវិស័យកីឡា ស្របតាមចលនាស្ប៉េស្យាល់អូឡាំពិកថ្នាក់ជាតិ ថ្នាក់តំបន់ និងថ្នាក់ពិភពលោក។ លោកអភិបាលរងខេត្តបន្ដថា៖ ការប្រកួតនេះ នឹងជ្រើសរើសយកកីឡាករ កីឡាការិនីឆ្នើមៗ ទៅចូលរួមការប្រកួតកីឡាស្ប៉េស្យាល់អូឡាំពិកថ្នាក់ជាតិ នាចុងខែវិច្ឆិកាខាងមុខផងដែរ។ លោកបន្ដថា ការប្រគួតកីឡានេះ មានឪពុក ម្តាយ អាណាព្យាបាល ជនមានពិការភាពខ្សោយសតិបញ្ញា បានយល់ដឹងកាន់តែទូលំទូលាយ និងបានបង្កលក្ខណៈឲ្យកូនចៅរបស់គាត់បានចូលរួមក្នុងការហ្វឹកហាត់នូវប្រភេទកីឡាបាល់ទាត់ កីឡាប៊ូល និងកីឡាអត្តពលកម្ម ដើម្បីពង្រឹង និងពង្រីកសមត្ថភាពរបស់កីឡាករ ក្នុងការចូលរួមចលនា កីឡាស្ប៉េស្យាល់អូឡាំពិកបានល្អប្រសើរ ។
ឯកឧត្តម សែម សុខា រដ្ឋលេខាធិការ ក្រសួងសង្គមកិច្ចអតីតយុទ្ធជន និងយុវនីតិសម្បទា និងជាអនុប្រធាន គណៈកម្មាធិការអូឡាំពិកកម្ពុជាមានប្រសាសន៍ថា៖ វិស័យពិការភាព គឺជាអាទិភាពដ៏សំខាន់របស់រាជរដ្ឋាភិបាល ក្រោមការដឹកនាំដ៏ប៉ិនប្រសព្វ និងឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលមានក្រសួងសង្គមកិច្ច អតីតយុទ្ធជន និងយុវ នីតិសម្បទា ជាសេនាធិការ ដោយរាជរដ្ឋាភិបាលបានកំណត់យ៉ាងច្បាស់នូវគោលនយោបាយអភិវឌ្ឍប្រព័ន្ធគាំពារសង្គម ដែលធានាបាននូវប្រសិទ្ធភាព និងបរិយាបន្នសម្រាប់ប្រជាជនកម្ពុជាទាំងមូល ដើម្បីលើកកម្ពស់ការកសាង និងអភិវឌ្ឍមូលធនមនុស្ស សុខុមាលភាពរបស់ប្រជាពលរដ្ឋ ដែលងាយរងគ្រោះនិងងាយរងហានិភ័យ ជាពិសេស ចូលរួមចំណែកកាត់បន្ថយ ភាពក្រីក្រ និងអភិវឌ្ឍសេដ្ឋកិច្ចប្រកបដោយចីរភាព ស្របតាម ចក្ខុវិស័យរបស់រាជរដ្ឋាភិបាលឈានទៅសម្រេចបាន ជា ប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និង ជាប្រទេសមានចំណូលខ្ពស់នៅឆ្នាំ២០៥០។ឯកឧត្ដមបន្ដថា៖ គណៈកម្មាធិការអូឡាំពិកកម្ពុជា បាន បន្តជំរុញនិងចូលរួមសហការជាមួយអង្គការដៃគូពាក់ព័ន្ធនានា ដែលបានជួយដល់ជនពិការខ្សោយសតិបញ្ញា ដើម្បីផ្តល់ឱកាសដល់ក្មួយៗ បានហ្វឹកហាត់និងចូលរួមប្រកួតកីឡា ដូចជនមាន ពិការភាពដទៃៗទៀត និងជនមិនមានពិការភាពផងដែរ។ ទាំងនេះជាការឆ្លុះបញ្ចាំងនូវការយកចិត្តទុកដាក់របស់រាជរដ្ឋាភិបាល កម្ពុជា ដល់ជនមានពិការភាពគ្រប់ប្រភេទ និងជាការរួម ចំណែកក្នុងការអនុវត្តច្បាប់ស្តីពីកិច្ចការពារ និងលើកកម្ពស់ សិទ្ធិជនពិការកម្ពុជា។ឯកឧត្ដម បានអំពាវនាវដល់អនុគណៈកម្មាធិការស៉្បេសស្យាល់អូឡាំពិក រាជធានី ខេត្ត ក៏ដូចជាអង្គការ សមាគមនានា ដែលគ្រប់គ្រងផ្ទាល់ជួយដល់ជនពិការខ្សោយសតិបញ្ញា សូមយកចិត្តទុកដាក់បីបាច់ថែរក្សា និងផ្តល់ឱកាសឱ្យ ពួកគាត់បានហ្វឹកហាត់ និងចូលរួមការប្រកួតនានាដែរ ។
ព័ត៌មានជាតិ ថ្មីៗ
សូមបញ្ជាក់ថា ការប្រកួតនេះប្រព្រឹត្តទៅមួយថ្ងៃពេញ មានវិញ្ញាសារ កីឡាអត្តពលកម្ម ៥០ម៉ែត្រនិង ១០០ ម៉ែត្របុរស – នារី ។ កីឡាបាល់ទាត់យូនីហ្វាយ បុរស និងនារី ៥ នាក់ម្ខាង ។កីឡាប៊ូលយូនីហ្វាយ ១នាក់ ទល់១នាក់, ២ នាក់ទល់ ២ នាក់ និង ៣ នាក់ទល់ ៣នាក់ និងមានប្រតិភូកីឡា និងគណៈកម្មការបច្ចេកទេស និងអាណាព្យាបាលប្រមាណ ជា២០០នាក់៕
អត្ថបទ និងរូបភាព៖ លោក បូ សាវី
កែសម្រួល៖ យូ វង្ស
