ការដេញថ្លៃគម្រោងជួសជុលផ្លូវដីសក្រាលក្រួសធម្មជាតិចំនួន៣ខ្សែ ក្នុងសង្កាត់ជ្រាវ ក្រុងសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី១៩ ខែសីហា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរក្រុង គណៈកម្មការលទ្ធកម្មសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ក្អោប រ៉ន ប្រធានគណៈកម្មការលទ្ធកម្មសង្កាត់ជ្រាវ ក្រុងសៀមរាប បានឱ្យដឹងថា ចំពោះគម្រោងមូលនិធិសង្កាត់ឆ្នាំ២០២៤នេះ សង្កាត់ជ្រាវ បានដាក់ដេញថ្លៃគម្រោងជួសជុលផ្លូវដីសក្រាលក្រួសធម្មជាតិចំនួន៣ខ្សែប្រវែង២០៤៩ម៉ែត្រ ទទឹង៥ម៉ែត្រ កម្រាស់ក្រួស០.១៥ម៉ែត្រ ដាក់លូមូលទោលកាត់ផ្លូវមុខកាត់១ម៉ែត្រ ចំនួន១កន្លែង និងស្លាកសញ្ញាគម្រោងចំនួន៣ ស្ថិតក្នុងតម្លៃប៉ាន់ស្មាន ២០៨.៨៦៦.៥១៩រៀល ដោយមានក្រុមហ៊ុនចំនួន៧ បានដាក់សំណើ។ ជាលទ្ធផលបានទៅលើក្រុមហ៊ុន ឯក គន្ធា ក្នុងតម្លៃ ៩៥.៨៩៣.៣០០រៀល។
ជាមួយនឹងការទទួលបានសិទ្ធិនៃជួសជុលនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព ស៊ុំ គីន
