សម្រាប់ការរៀបចំព្រឹត្តិការណ៍ Gumball 3000 Rally in Cambodia នៅលើទឹកដីអង្គរ នៃខេត្តសៀមរាប មិនត្រឹមតែជាព្រឹត្តិការណ៍ផ្សព្វផ្សាយពីវិស័យទេសចរណ៍កម្ពុជា ជាពិសេសទឹកដីសៀមរាបអង្គរប៉ុណ្ណោះទេ តែក៏ជាព្រឹត្តិការណ៍ត្រៀមបំបែកឯកត្តកម្មពិភពលោក Guinness World Records ដែលមានការតាំងបង្ហាញនូវរថយន្តសេរីទំនើបជាច្រើនប្រមូលផ្ដុំគ្នាបែបនេះ។
ក្នុងកម្មវិធីសន្ទនាមតិ របស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី១២ ខែកញ្ញា ឆ្នាំ២០២៤នេះ លោក លេ សុផុន ប្រធានការិយាល័យគ្រប់គ្រងឧស្សាហកម្មទេសចរណ៍ នៃមន្ទីរទេសចរណ៍ខេត្តសៀមរាប បានបង្ហាញថា ព្រឹត្តិការណ៍ Gumball 3000 បានរៀបចំឡើងចំនួន២៤ដង រួចមកហើយ។ ដោយឡែកឆ្នាំ២០២៤នេះ គឺជាលើកទី២៥ ហើយក៏ជាលើកទី១ សម្រាប់កម្ពុជា ដែលមានក្បួនរថយន្តបែបទេសចរណ៍ ធ្វើដំណើរឆ្លងកាត់កម្ពុជា រួមជាមួយការប្រមូលផ្តុំទៅដោយរថយន្តម៉ាកល្បីៗនៅជុំវិញពិភពលោកប្រមាណ ១៥០គ្រឿង អមជាមួយបុគ្គលដ៏មានប្រជាប្រិយភាពទាំងក្នុង និងក្រៅប្រទេសជាច្រើនរូប។
ព័ត៌មានជាតិ ថ្មីៗ
លោកប្រធានការិយាល័យ បានបញ្ជាក់ថា ព្រឹត្តិការណ៍លំដាប់ថ្នាក់អន្តរជាតិនេះ នឹងផ្តល់អត្ថប្រយោជន៍ជាច្រើន ក្នុងការចូលរួមផ្សព្វផ្សាយពីវិស័យទេសចរណ៍កម្ពុជាទៅគ្រប់មជ្ឈដ្ឋាន តាមរយៈព្រឹត្តិការណ៍កីឡាដែលមិនធ្លាប់មានពីមុនមក និងបង្ហាញឱ្យពិភពលោកបានស្គាល់កាន់តែច្បាស់ពីកម្ពុជា ដែលជាប្រទេសមួយពោរពេញដោយសក្តានុពលដ៏សម្បូរបែប ទាំងផ្នែកវប្បធម៌ អរិយៈធម៌ ទៅកាន់ពិភពលោកតាមរយៈវត្តមានបុគ្គលល្បីៗអន្តរជាតិដែលបានចូលរួមក្នុងព្រឹត្តិការណ៍មួយនេះ ជាពិសេសក៏ជាការជួយសេដ្ឋកិច្ចប្រជាពលរដ្ឋក្នុងខេត្តទេសចរណ៍ សៀមរាបអង្គរផងដែរ។
គួរឱ្យដឹងថា ក្បួន Gumball 3000 នឹងធ្វើដំណើរមកដល់ព្រះរាជាណាចក្រកម្ពុជា នៅថ្ងៃទី១៥ ខែកញ្ញា តាមច្រកទ្វារព្រំដែនអន្តរជាតិបាវិត ខេត្តស្វាយរៀង រួចបន្តមករាជធានីភ្នំពេញ។ ហើយនៅថ្ងៃទី១៦-១៧ ខែកញ្ញា នឹងបន្តនៅខេត្តសៀមរាប ហើយនឹងងចាកចេញពីខេត្តសៀមរាប ឆ្ពោះទៅកាន់ប្រទេសថៃ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ៕
អត្ថបទ៖ លោកស្រី ភី រចនា
កែសម្រួល៖ លោក អ៊ុន ណារាជ្យ
