តាមរយៈការគាំទ្រពីសមាគមសហគ្រិនស្រ្តីកម្ពុជា វេទិកាប្រកួតពានរង្វាន់សហគ្រិនស្រ្តីឆ្នើម២០២៤ សម្រាប់តំបន់ពាយ័ព្យ ត្រូវបានរៀបចំជាលើកទី៣ នៅខេត្តសៀមរាប ដែលវេទិកានេះបានសម្រិតសម្រាំងបេក្ខភាពជាស្ត្រីឆ្នើមចំនួន ១៤រូប មកពីខេត្តចំនួន ០៦ រួមមាន ខេត្តសៀមរាប បន្ទាយមានជ័យ បាត់ដំបង ឧត្តរមានជ័យ ព្រះវិហារ និងខេត្តកំពង់ធំ។
វេទិកានេះធ្វើឡើងក្នុងគោលបំណង លើកកម្ពស់ និងពង្រឹងសមត្ថភាពស្ត្រី ក្នុងវិស័យធុរកិច្ច ដោយការចែករំលែកបទពិសោធន៍ពីគ្នាទៅវិញទៅមក ព្រមទាំងជំរុញការផ្សព្វផ្សាយអាជីវកម្មទៅកាន់ទីផ្សារ ដែលជាបណ្តាញទំនាក់ទំនងរវាងម្ចាស់អាជីវកម្ម និងដៃគូ ទាំងក្នុងក្របខណ្ឌឯកជន និងរដ្ឋ ឱ្យកាន់តែជិតស្និទ្ធបន្ថែមទៀត។
ក្នុងវេទិកាប្រកួតប្រជែងនេះ តម្រូវឱ្យស្រ្តីជាម្ចាស់អាជីវកម្ម ត្រូវចុះបញ្ជី និងដំណើរការអាជីវកម្មចាប់ពី ០១ឆ្នាំឡើងទៅ ចំពោះអាជីវកម្ម ដែលធ្លាប់ទទួលបានជ័យលាភីមិនអនុញ្ញាតឱ្យចូលរួមប្រកួតឡើយ។ ដោយឡែកបេក្ខភាពទាំង ១៤រូប ដែលត្រូវបានជ្រើសរើសនៅវគ្គផ្ដាច់ព្រ័ត្រនេះ ត្រូវធ្វើបទបង្ហាញពីយុទ្ឋសាស្ត្រអាជីវកម្ម ការច្នៃប្រឌិតអាជីវកម្ម យុទ្ធសាស្រ្តទីផ្សារ លទ្ធផលដែលផ្តល់ដល់សង្គម ទំនាក់ទំនងរវាងអាជីវកម្ម និងគ្រួសារ និងដំណោះស្រាយទៅលើបញ្ហាក្នុងអាជីវកម្ម។
ជាលទ្ធផល សហគ្រិនស្រ្តី ដែលទទួលបានជ័យលាភីទាំង ០៣រូប សុទ្ធសឹងតែមកពីខេត្តសៀមរាប ដែលស្ថិតក្នុងវិស័យកម្មន្តសាល និង វិស័យសេវាកម្ម។
ក្នុងនាម ប្រធានសមាគមសហគ្រិនស្រ្តីកម្ពុជាសាខាខេត្តសៀមរាប លោកស្រី ជា សុកនួន លើកឡើងថា៖ ការប្រកួតប្រជែងនេះ ពិតជាបានផ្តល់អត្ថប្រយោជន៍យ៉ាងច្រើនដល់សហគ្រិនស្រ្តី ដែលសុទ្ធសឹងជាចំណេះដឹង និងការចែករំលែកបទពិសោធន៍ក្នុងការដឹកនាំអាជីវកម្មផ្សេងៗ លើសពីនោះ សហគ្រិនស្រ្តីអាចស្វែងរកដៃគូ ឬទីផ្សារក្នុងស្រុក និងក្រៅស្រុកតាមរយៈវេទិកានេះបានផងដែរ។ លោកស្រី ក៏បានថ្លែងកោតសរសើរ និងអរគុណដល់ថ្នាក់ដឹកនាំ និងក្រុមការងារសមាគមសហគ្រិនស្រ្តីកម្ពុជាសាខាខេត្តសៀមរាបគ្រប់ជាន់ថ្នាក់ និង មន្ទីរ អង្គភាព ស្ថាប័នពាក់ព័ន្ធទាំងអស់ ដែលបានគាំទ្រ និងលើកកម្ពស់សមត្ថភាពស្ត្រី ដើម្បចូលរួមកសាងសង្គម និងសេដ្ឋកិច្ចជាតិ ឱ្យកាន់តែប្រសើរឡើងបន្ថែមទៀត។
ក្នុងនាមអាជ្ញាធរខេត្ត លោក ឌី រ៉ាដូ អភិបាលរងខេត្តសៀមរាប លើកឡើងថា ស្រ្តីគឺជា “ឆ្អឹងខ្នងនៃការអភិវឌ្ឍសេដ្ឋកិច្ច និងសង្គមកិច្ច” កំណើននៃការចូលរួមរបស់ស្ត្រីក្នុងសហគ្រាសធុនតូច និងមធ្យមកាន់តែច្រើន គឺជំរុញឱ្យមានកំណើនការងារ និងធ្វើពិពិធកម្មសេដ្ឋកិច្ច។ លោក ក៏បានកោតសរសើរដល់ស្ត្រីកម្ពុជា ដែលមានភាពក្លាហាន បញ្ចេញសមត្ថភាពរបស់ខ្លួន ស្របតាមគោលនយោបាយរបស់រាជរដ្ឋាភិបាល ក្នុងការលើកទឹកចិត្ត និងជំរុញឱ្យស្ត្រីចូលរួមក្នុងការអភិវឌ្ឍប្រទេសជាតិ សំដៅលើកតម្លៃស្ត្រី និងលុបបំបាត់នូវរាល់ទស្សនៈរើសអើងផ្សេងៗ។
យោងតាមស្ថិតិរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងឆ្នាំ២០២៤ សហគ្រិនស្ត្រីមានចំនួនជាង ៨ ០០០ នាក់ ក្នុងចំណោមសហគ្រាសខ្នាតមីក្រូ តូច និងមធ្យម (MSMEs) សរុបចំនួន ៤៤ ២៧២កន្លែង។ ដោយឡែក កម្លាំងពលកម្មស្ត្រីមានប្រមាណ ១៤១ ០០០ នាក់ ស្មើនឹង ៣០ ភាគរយ នៃកម្លាំងពលកម្មសរុបប្រមាណ ៤៧០ ០០០ នាក់។
រូបភាព៖ លោក យូ វង្ស
កែសម្រួល៖ មន្ទីរព័ត៌មាន
