ព្រឹកថ្ងៃទី១៦ ខែកញ្ញា ឆ្នាំ២០២៤នេះ ក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ(GBV) ស្ថិតក្រោមគណ:កម្មាធិការពិគ្រោះយបល់កិច្ចការស្ត្រីនិងកុមារខេត្ត បានរៀបចំកិច្ចប្រជុំក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ ប្រចាំឆមាសទី៣ ឆ្នាំ២០២៤ ក្រោមអធិបតីភាពលោកស្រី ម៉ននី រងី្ស អភិបាលរងខេត្ត និងជាប្រធានក្រុមការងារ(GBV) ព្រមទាំងមានការ ចូលរួមពី តំណាងថ្នាក់ដឹកនាំមន្ទីរ អង្គភាពជុំវិញខេត្ត រដ្ឋបាលក្រុងស្រុក និងអង្គការដៃគូពាក់ព័ន្ធជាច្រើនរូបផងដែរ។
លោកស្រី ម៉ននី រងី្ស អភិបាលរងខេត្តសៀមរាប បានថ្លែងថា គោលបំណងនៃកិច្ចប្រជុំនេះ គឺដើមី្បរិះរកអំពីបញ្ហាប្រឈមរបស់ក្រុមការងារ និងគោលដៅលើកកម្ពស់ និងពង្រីកការផ្តល់សេវាជាពហុវិស័យឆ្លើយតប ចំពោះអំពើហិង្សាលើស្រី និងក្មេងស្រី ប្រកបដោយប្រសិទ្ធិភាព និងទាន់ពេលវេលា ដោយគ្រប់ភាគីពាក់ព័ន្ធទាំងអស់ ត្រូវរួមគ្នាទប់ស្កាត់អំពើហិង្សាដែលពាក់ព័ន្ធនឹងយេនឌ័រគ្រប់ទម្រង់ដូចជាអំពើហិង្សាក្នុងគ្រួសារ ការរំលោភបំពានផ្លូវភេទ និងការជួញដូរស្រ្តី និងកុមារជាដើម។ ជាពិសេសនៅតាមបណ្តាក្រុងស្រុកទាំង១៣ របស់ខេត្តត្រូវរួមគ្នាបង្កើនប្រសិទ្ធភាពការងារ ហើយក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រថ្នាក់ខេត្ត ត្រូវមានកិច្ចសហការល្អជាមួយមន្ទីរស្ថាប័ន អង្គរភាពពាក់ព័ន្ធ ដើម្បីឆ្លើយតបដល់ជនរងគ្រោះ ដោយអំពើហិង្សាទាក់ទងនឹងយេនឌ័របានទាន់ពេលវេលា។
ព័ត៌មានជាតិ ថ្មីៗ
បន្ទាប់ពីពិភាក្សា និងពិនិត្យទៅលើរបាយការណ៍សម្រាប់ត្រីមាសកន្លងមករួច លោកស្រីអភិបាលរងខេត្ត ក៏បានកោតសរសើរដល់ក្រុមការងារទាំងអស់ដែលបានសហការអនុវត្តសកម្មភាពការងារបានល្អប្រសើរ ដោយមានការយកចិត្តទុកដាក់ និងបានផ្តល់សេវាជួយដល់ជនរងគ្រោះបានជាច្រើនរូបផងដែរ។
លោកស្រីអភិបាលរង ក៏បានជម្រុញដល់ក្រុមការងារសូមបន្តសហការ និងអនុវត្តការងារនេះបន្ថែមទៀត និងត្រូវបន្តស្វែងរកការគាំទ្រពីអ្នកពាក់ព័ន្ធ និងអង្គការដៃគូ ដើម្បីពង្រឹងសមត្ថភាពតាមរយៈវគ្គបណ្តុះបណ្តាលពីកញ្ចប់សេវាទាំង៥ ក្រុមការងារGBV ថ្នាក់ខេត្ត ក្រុង/ស្រុកថ្មីទាំង៦ បន្តកិច្ចសហការក្នុងការផ្តល់សេវាដល់ស្ត្រី និងក្មេងស្រី រងគ្រោះដោយអំពើហិង្សាទាក់ទងនឹងយេនឌ័រ លើកផែនការរៀបចំកិច្ចប្រជុំប្រចាំត្រីមាសទី៤ ឆ្នាំ២០២៤ ។
សូមបញ្ជាក់ថា យោងតាមរបាយការណ៍របស់ក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ (GBV) ខេត្តសៀមរាប សម្រាប់ឆមាសទី៣ ឆ្នាំ២០២៤ ក្រុមការងារបានជួយអន្តរាគមន៍ដល់ស្ត្រី និងក្មេងស្រីដែលរងគ្រោះដោយអំពើហិង្សាទាក់ទងនឹងយេនឌ័រសរុប ៣៧ករណីមាន៖ រំលោភសេពសន្ថវៈ ០៨ករណី និងរួមភេទជាមួយអនីតិជនយាយុក្រោម១៥ឆ្នាំ ០៤ករណី និងអំពើអាសប្រឆាំងនឹងអនីតិជនអាយុក្រោម១៥ឆ្នាំ ០១ករណី អំពើហិង្សាក្នុងគ្រួសារសរុប ចំនួន២៤ករណី។ ក្នុងត្រីមាសទី៣ ឆ្នាំ២០២៤ ក្រុមការងារ GBV ស្រុកក្រឡាញ់ បន្ទាយស្រី អង្គរជុំ ស្រីស្នំ វ៉ារិន ពួក សូទ្រនិគម ជីក្រែង និងក្រុងសៀមរាប បានជួយអន្តរាគមន៍ ដល់ស្ត្រី និងក្មេងស្រី ដែលរងគ្រោះដោយអំពើហិង្សាទាក់ទងនឹងយេនឌ័រ សរុបចំនួន២៧៧ ករណី។
អត្ថបទ និងរូបភាព ស៊ុំ គីន
កែសម្រួល អត្ថបទ ហាំ ម៉េងហួត
