នៅរសៀលថ្ងៃទី១៦ ខែកញ្ញា ឆ្នាំ២០២៤នេះ ក្រសួងសង្គមកិច្ច អតីតយុទ្ធជន និងយុវនីតិសម្បទារួមជាមួយ និងរដ្ឋបាលខេត្តសៀមរាបបាន បើកសិក្ខាសាលាថ្នាក់ក្រោមជាតិស្តីពី “ការផ្សព្វផ្សាយរបាយការណ៍ ទិន្នន័យអត្តសញ្ញាណកម្មពិការភាពតាមគំរូសង្គម និងសិទ្ធិជាមូលដ្ឋាន”។ សិក្ខាសាលានេះរៀបចំនៅសាលប្រជុំសាលាខេត្តសៀមរាប ក្រោមអធិបតីភាពឯកឧត្តម សន សុផល អគ្គនាយកនៃអគ្គនាយកដ្ឋានស្តារសម្បទានៃក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក នាក់ ណេរ៉ុន អភិបាលរងខេត្តសៀមរាបព្រមទាំងមានការចូលរួម ពីសំណាក់លោក លោកស្រីអភិបាលរងក្រុង ស្រុក តំណាងមន្ទីរ អង្គភាពពាក់ព័ន្ធ ឃុំ សង្កាត់ និងអង្គការមិនមែនរដ្ឋាភិបាលចូលរួមផងដែរ ។
លោក នាក់ ណេរ៉ុន អភិបាលរងខេត្តសៀមរាបបានមានប្រសាសន៍ថា សិក្ខាសាលានាពេលនេះពិតជាមានសារៈសំខាន់ណាស់ក្នុងការផ្តល់សេវាកម្ម និងគាំទ្រដល់ជនមានពិការភាព គ្រួសារ អាណាព្យាបាល និងអ្នកពាក់ព័ន្ធនានា នឹងជាសក្ខីភាពបង្ហាញពីការគិតគូរ និងយកចិត្តទុកដាក់ខ្ពស់ ចំពោះបងប្អូនជនមានពិការភាព ដែលជាជនងាយរងគ្រោះ ហើយកំពុងតែត្រូវការចាំបាច់នូវការជួយឧបត្ថម្ភគាំទ្រទាំងជីវភាព ស្មារតី សម្ភារៈ លើកកម្ពស់តួនាទីផលប្រយោជន៍ និងការការពារសិទ្ធិ ពីគ្រប់មជ្ឈដ្ឋាន និងរាជរដ្ឋាភិបាលកម្ពុជា។
លោកអភិបាលរងខេត្តបានបន្តថា រដ្ឋាភិបាលកម្ពុជាបានចាត់ទុកថាភាពក្រីក្រគឺជាការខាតបង់តម្លៃធនធានសេដ្ឋកិច្ច ដូច្នេះ នៅក្នុងអាណត្តិទី ៧ របស់រដ្ឋសភា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណ ដំណាក់កាលទី ១ ដែលបានផ្តោត ជាសំខាន់ ទៅលើយុទ្ធ សាស្ត្រសម្រេចឱ្យបាននូវគោលដៅកាត់បន្ថយភាពក្រីក្រ និងជនងាយរងគ្រោះ ជាគោលនយោបាយ អាទិភាពរបស់ រាជ រដ្ឋាភិបាល ដែលធានាឱ្យបងប្អូនទទួលបាននូវផលប្រយោជន៍ពីប្រព័ន្ធជំនួយសង្គម និងរបបសន្តិសុខសង្គម បាន កាន់តែល្អប្រសើរឡើងផងដែរ។
ឯកឧត្តម សន សុផល អគ្គនាយកនៃអគ្គនាយកដ្ឋានស្តារសម្បទានៃក្រសួងសង្គមកិច្ច អតីតយុទ្ធជន និងយុវនីតិ សម្បទា បានមានប្រសាសន៍ថា វិស័យពិការភាពគឺជាអាទិភាពដ៏សំខាន់របស់រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសព្វ និងឈ្លាសវៃ របស់នាយករដ្ឋមន្ត្រី សម្តេចមហាបវរធិបតី ហ៊ុន ម៉ាណែត ដែលមាន ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាជាសេនាធិការ។
ឯកឧត្តម សន សុផល បន្តថាក្រសួងសង្គមកិច្ច អតីតយុទ្ធជន និងយុវនីតិសម្បទា បានផ្តល់អាទិភាពការងារពិការភាពក្នុងកម្មវិធីការងាររបស់ក្រសួង ចំណែកជនមានពិការភាព អតីតយុទ្ធជន អតីតមន្ត្រីរាជការមានពិការភាព បានទទួលរបបឧបត្ថម្ភពីរដ្ឋ ជនមានពិការភាពមានបណ្ណសមធម៌ ឬនៅក្នុងគ្រួសារដែលមានបណ្ណសមធម៌ នឹងទទួលបានប្រាក់ឧបត្ថម្ភពីរដ្ឋប្រចាំខែ បានទទួលសេវាស្តារលទ្ធភាពពលកម្មកាយសម្បទា សេវាអក្សរស្ទាប និងភាសាសញ្ញាសម្រាប់ជនមានពិការភាព ត្រូវបានបង្កើតដើម្បីឆ្លើយតបនឹងតម្រូវការរបស់ជនមានពិការភាព កម្មវិធីអភិវឌ្ឍ សហគមន៍ប្រកបដោយបរិយាបន្ន បានជួយលើកកម្ពស់សិទ្ធិ និងជីវភាពរស់នៅរបស់ជនមានពិការភាព ។
អត្ថបទ៖ ទ្រា ពន្លឺ
កែសម្រួស៖ សូ ស៊ីមាន
