នៅព្រឹកថ្ងៃទី១៧ ខែកញ្ញា ឆ្នាំ២០២៤នេះ រដ្ឋបាលខេត្តសៀមរាប និងមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តសៀមរាប បានរៀបចំពិធីសំណេះសំណាល និងផ្ដល់អំណោយជូនជនចាស់ជរាក្រីក្រតាមសហគមន៍ ក្រោមអធិបតីភាព លោក នាក់ ណេរ៉ុន អភិបាលរងខេត្តសៀមរាប និងលោក បឹង ពេជ្រ អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ព្រមទាំង លោក យន់ ស៊ីភន ប្រធានក្រុមប្រឹក្សាស្រុកជីក្រែង លោកស្រី ទី យិតហាន អភិបាលរងស្រុកជីក្រែង និងមានការចូលរួមពី មន្ត្រី អាជ្ញាធរពាក់ព័ន្ធជាច្រើនរូប និងប្រជាពលរដ្ឋប្រមាណ២០០គ្រួសារផងដែរ ដែលកម្មវិធីនេះប្រព្រឹត្តទៅនៅក្នុងបរិវេណសាលាឃុំអន្លង់សំណរ ដែលស្ថិតនៅក្នុងភូមិត្រពាំងត្រស់ ឃុំអន្លង់សំណរ ស្រុកជីក្រែង ខេត្តសៀមរាប។
ថ្លែងនៅក្នុងពិធីនេះ លោក បឹង ពេជ្រ អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានបង្ហាញអំពីការយកចិត្តទុកដាក់លើមនុស្សចាស់ និងអតីតយុទ្ធជនជាដើម តាមរយៈកិច្ចការងាររបស់មន្ទីរអតីតយុទ្ធជន និងយុវនីតិសម្បទា ដែលអនុវត្តតាមផែនការក្នុងការជួយដល់ជនរងគ្រោះ និងជនងាយរងគ្រោះគ្រប់ប្រភេទក្នុងសង្គម ជាពិសេស កុមារកំព្រា ស្ត្រី ជនចាស់ជរា ជនពិការ អតីតយុទ្ធជន និងអតីតមន្ត្រីរាជការស៊ីវិលជាដើម ដោយផ្អែកលើមូលដ្ឋាន មិនបោះបង់ មិនរើសអើង បណ្ដុះបណ្ដាលវិជ្ជាជីវៈ ធ្វើសមាហរណកម្មទៅសហគមន៍វិញ។ អំណោយដែលបានចែកជូននាពេលនេះ ជាអំណោយរបស់រាជរដ្ឋាភិបាលកម្ពុជា ដោយក្នុងមួយគ្រួសារ ទទួលបាន មុង១ , ភួយ១ , កន្ទេល១ , សារុង១ , មី១កេស និងអង្ករ២៥គីឡូក្រាម។
មានប្រសាសន៍នាឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប បានសម្ដែងការកោតសរសើរចំពោះមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ដែលជានិច្ចកាល តែងតែខិតខំយកចិត្តទុកដាក់ចំពោះសុខុមាលភាពមនុស្សចាស់ជរា ដោយមិនប្រកាន់និន្នាការអ្វីទាំងអស់។ ជាក់ស្ដែងពេលនេះមន្ទីរសង្គមកិច្ចបានរៀបចំពិធីសំណេះសំណាល និងផ្ដល់អំណោយជូនជនចាស់ជរាក្រីក្រតាមសហគមន៍ក្នុងឆ្នាំ២០២៤ ដែលនេះផ្ដើមចេញពីគោលនយោបាយជាវិជ្ជមាន របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរ ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
លោកអភិបាលរងខេត្ត បានបន្តថា មនុស្សចាស់ជាប្រភពធនធានដ៏សំខាន់ ដែលបានផ្ដល់នូវពុទ្ធិ ចំណេះដឹងដល់កូនចៅជំនាន់ក្រោយ ពិសេសមូលដ្ឋានគ្រឹះក្នុងការស្រាវជ្រាវ និងអភិវឌ្ឍធនធានមនុស្ស ដើម្បីឈានទៅរកការអភិវឌ្ឍប្រទេសជាតិបានគ្រប់សម័យកាល និងរក្សាបាននូវអត្តសញ្ញាណជាតិរបស់ខ្លួន ដែលវាជាការពិត មនុស្សចាស់ គឺជាឃ្លាំងសម្បត្តិនៃវប្បធម៌ជាតិ៕
អត្ថបទ៖ ហេង វន្នី
កែសម្រួល៖ សូ ស៊ីមាន
