អង្គការអាប៉ូប៉ូ ដែលធ្វើការលើវិស័យសម្អាតមីននៅកម្ពុជា បានប្រារព្ធពិធីខួប១០ឆ្នាំរបស់ខ្លួន ដើម្បីបង្ហាញពីប្រតិបត្តិការបោសសម្អាតមីននៅក្នុងប្រទេសកម្ពុជា ក្នុងការរួមចំណែកយ៉ាងធំធេងក្នុងការប្រែក្លាយចម្ការមីននៅកម្ពុជាឲ្យទៅជាវាលស្រែចំការសម្រាប់ប្រជាពលរដ្ឋខ្មែរ។ ពិធីនេះធ្វើឡើងនៅល្ងាចថ្ងៃទី១៧ ខែកញ្ញាឆ្នាំ២០២៤នេះ ក្រោមអធិបតីភាព ឯកឧត្ដម ព្រំ សុភមង្គល អនុប្រធានអាជ្ញាធរមីនកម្ពុជា និងមានការអញ្ជើញចូលរួមពីអាជ្ញាធរខេត្ដសៀមរាប និងអាជ្ញាធរខេត្ដព្រះវិហារ អង្គភាពស៊ីម៉ាក់ និងអ្នកពាក់ព័ន្ធជាច្រើនទៀតផងដែរ។
នាយកកម្មវិធីរបស់អង្គការ អាប៉ូប៉ូ ប្រចាំប្រទេសកម្ពុជា លោក ម៉ៃឃើល រ៉ែននី(Micheal Raine) បានឲ្យដឹងថា ប្រតិបត្តិការណ៍របស់អាប៉ូប៉ូ ក្នុងពេល១០ឆ្នាំនៅកម្ពុជា ទទួលបានជោគជ័យ ក៏ដោយសារការគាំទ្រពីគ្រប់ដៃគូពាក់ព័ន្ធ ជាពិសេសអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីន. (CMAA) ដែលតែង ការគាំទ្រឥតងាករេរបស់អ្នកមានសារៈសំខាន់ចំពោះភាពជោគជ័យរបស់ APOPO ជាពិសេសក្នុងការបង្កើតឲ្យមានបរិយាកាសអំណោយផលសម្រាប់គម្រោងរបស់យើង “ការប្រែក្លាយចម្ការមីនទៅជាវាលស្រែ” ។
ឯកឧត្តម ព្រំ សុភមង្គល អនុប្រធានអាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនមានពិការភាពដោយសារមីន (អាជ្ញាធរមីន) បានលើកថា កាលពីអំឡុងទសវត្សឆ្នាំ៩០ កម្ពុជាមានអ្នករងគ្រោះដោយសារគ្រាប់មីន និងយុទ្ធភណ្ឌសង្គ្រាមប្រមាណ៤ពាន់នាក់ក្នុងមួយឆ្នាំ។ប៉ុន្តែក្នុងរយៈពេលចុងក្រោយនេះ កម្ពុជាមានជនរងគ្រោះដោយសារមីន និងយុទ្ធភណ្ឌសង្គ្រាមនេះ ក្រោម១០០នាក់ប៉ុណ្ណោះ ហើយដីធ្លីមួយចំនួនដែលធ្លាប់ទុកចោលក៏ត្រូវបានធ្វើការរំដោះយកមកប្រើប្រាស់ឡើងវិញប្រកបដោយសុវត្ថិភាព។ ឯកឧត្តម បញ្ជាក់ថា “អង្គការអាប៉ូប៉ូដោយរួមសហការជាមួយអាជ្ញាធរមីន និងប្រតិបត្តិករផ្សេងៗទៀតបានជំរុញនូវវឌ្ឍនភាពយ៉ាងច្រើនក្នុងការធ្វើឲ្យប្រទេសកម្ពុជាមានការអភិវឌ្ឍនិងធ្វើឲ្យដីមានសុវត្ថភាពឡើងវិញ”។
អត្ថបទ និងរូបភាព ៖ ឈិត សាវី
កែសម្រួល ៖ ហាំ ម៉េងហួត
