ក្នុងឱកាសកាន់បិណ្ឌវេនទី១ វត្តប្រាសាទសែនជ័យ ហៅវត្តភ្នំព្រះទេវៈ ក្នុងឃុំរំចេក ស្រុកបន្ទាយស្រី ខេត្តសៀមរាប នាព្រឹកថ្ងៃទី១៨ ខែកញ្ញានេះ ឯកឧត្ដម សែម សុវណ្ណនី ប្រធានក្រុមការងាររាជរដ្ឋាភិបាល ចុះមូលដ្ឋានស្រុកបន្ទាយស្រី លើកឡើងថា បច្ចុប្បន្ន បានកំពុងដើរលើផ្លូវត្រឹមត្រូវ ដែលផ្ដល់នូវសិទ្ធសេរីភាព សន្តិភាព និងការអភិវឌ្ឍ ទាំងវិស័យពុទ្ធចក្រ និងអាណាចក្រ។ ផ្ទុយទៅវិញ ការញុះញង់របស់ពួកអគតិ គឺជាការនាំមកនូវការបែកបាក់សាមគ្គី ដែលនឹងអាចនាំកម្ពុជាចូលក្នុងភ្លើងសង្គ្រាមដូចអតីតកាល។
ឯកឧត្ដម សែម សុវណ្ណនី រំលឹកឡើងវិញថា ចាប់ពីថ្ងៃ១៧ មេសា ១៩៧៥ និងអំឡុងពេលរបប ៣ឆ្នាំ៨ខែ និង២០ថ្ងៃ សាសនាទាំងអស់បានរលត់សូន្យ មិនមានការប្រារព្វពីធីបុណ្យបែបសាសនាណាមួយឡើយ ភាពវេទនា នៃប្រជាជាតិទាំងមូល និងការកាប់សម្លាប់ គឺកើតឡើងដោយសារការបែកបាក់សាមគ្គី។ ប៉ុន្តែ ក្រោយថ្ងៃ ៧មករា១៩៧៩មក ព្រះរាជាណាចក្រកម្ពុជា បានចាប់កំណើតជាថ្មី មិនតែប៉ុណ្ណោះវិស័យព្រះពុទ្ធសាសនានៅកម្ពុជាកាន់តែមានភាពរុងរឿង និងល្អប្រសើរឡើងពីមួយកម្រិតទៅមួយកម្រិត ដូចបច្ចុប្បន្ន ទាំងអស់នេះ គឺជាតម្លៃនៃសន្តិភាព ដែលពួកអគតិបានមើលរំលង។ ក្នុងឱកាសនោះ ឯកឧត្ដម ក៏បានឧទ្ទិសកុសលផលបុណ្យ នៃពិធីបុណ្យកាន់បិណ្ឌទី១នេះ ជូនដល់វិញ្ញាក្ខន្ធវីរយុទ្ធជនខ្មែរទាំងអស់ ដែលបានពលីជីវិត ស្រោចស្រង់ជាតិមាតុភូមិ និងប្រជាជាតិទាំងមូល ឱ្យស្គាល់នូវសន្តិភាពពិតប្រាកដដូចសព្វថ្ងៃ។
ព័ត៌មានជាតិ ថ្មីៗ
ជាមួយនោះ ឯកឧត្តម សែម សុវណ្ណ និងក្រុមការងារ បាននាំយកទេយ្យទាន ប្រគេនដល់វត្តចំនួន១៤ ក្នុងស្រុកបន្ទាយស្រី ដោយក្នុងមួយវត្តៗ ទទួលបានបច្ច័យ ២លានរៀល អង្ករ១០០គីឡូក្រាម ត្រីខ ០២យួរ ទឹកក្រូច ០២កេស ទឹកសុទ្ធ ០២កេស ទឹកត្រី-ទឹកស៊ីអ៊ីវ ០៥យួរ តែ២កញ្ជប់ធំ ស្ករ ០២គីឡូក្រាម អំបិល ០២គីឡូក្រាម។ ដោយឡែក ព្រះអនុគណ និងព្រះចៅអធិការ ១៤អង្គ ប្រគេនក្នុងមួយអង្គបច្ច័យចំនួន ១០ម៉ឺនរៀល នេន៥០អង្គ ក្នុងមួយអង្គ ២ម៉ឺនរៀល យាយជី តាជី ប្រជាពលរដ្ឋ ៤០០នាក់ ក្នុងម្នាក់ៗទទួលបានសារុង០១ ថវិកា១ម៉ឺនរៀល ។ លើសពីនោះ ឯកឧត្តម សែម សុវណ្ណនី និងក្រុមការងារ ប្រគេនថវិកា៥.០០០ដុល្លារ បន្ថែមទៀត ដល់វត្តប្រាសាទសែនជ័យ ហៅវត្តភ្នំព្រះទេវៈ សម្រាប់ធ្វើការជួសជុលដំបូលសាលាឆាន់៕
អត្ថបទ និងរូបភាព ៖ ធន់ ពូថេ
កែសម្រួល ៖ មន្ទីរព័ត៌មានខេត្តសៀមរាប
