វេទិកានេះរៀបចំនៅថ្ងៃទី១៩ ខែកញ្ញា ឆ្នាំ២០២៤ នាសណ្ឋាគារសុខាខេត្តសៀមរាប ដោយក្រសួងទេសចរណ៍ និងស្ថានទូតចិនប្រចាំកម្ពុជា សហការជាមួយរដ្ឋបាលខេត្តសៀមរាបក្រោមអធិបតីភាព ឯកឧត្តម ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍ លោក ChenCong ទីប្រឹក្សា នៃស្ថានទូតចិនប្រចាំព្រះរាជាណាចក្រកម្ពុជា លោក ឌី រ៉ាដូ អភិបាលរងខេត្តសៀមរាប និងវត្តមាន ឯកឧត្តម លោកជំទាវ លោក លោកស្រី ជាថ្នាក់ដឹកនាំ តំណាងក្រសួង មន្ទីរ អង្គភាពស្ថាប័ន ព្រមទាំងវិស័យឯកជនជាតិ និងអន្តរជាតិ ពាក់ព័ន្ឋនឹងវិស័យទេសចរណ៍ជាច្រើនរូប។
ក្នុងរបាយការណ៍ស្វាគមន៍របស់ លោក ឌី រ៉ាដូ អភិបាលរងខេត្តសៀមរាប បង្ហាញថា៖ រយៈពេល ៨ខែ ឆ្នាំ២០២៤នេះ ខេត្តសៀមរាបទទួលបានភ្ញៀវទេសចរអន្តរជាតិសរុបចំនួនជាង៦៥ម៉ឺននាក់ ដែលមានការកើនឡើង៣១% ធៀបនឹងរយៈពេលដូចគ្នានៅឆ្នាំ២០២៣។ ក្នុងនោះយើងឃើញភ្ញៀវដែលមកកម្សាន្តច្រើនជាងគេរួមមាន ជនជាតិអាមេរិកឈរនៅលំដាប់ថ្នាក់លេខមួយ អង់គ្លេសនៅលំដាប់ទីពីរ និងភ្ញៀវទេសចរណ៍បារាំងឈរនៅលំដាប់ថ្នាក់ទីបី។ បច្ចុប្បន្ននេះទោះបីជាកំណើនភ្ញៀវទេសចរមានការកើនឡើងយឺតបន្តិចមែន ប៉ុន្តែអាជីវកម្មទេសចរណ៍គ្រប់ប្រភេទ បាននឹងកំពុងចាប់ផ្តើមបើកដំណើរការឡើងវិញជាបណ្តើរៗ ដើម្បីត្រៀមចាំស្វាគមន៍ទទួលភ្ញៀវទេសចរណ៍មកកម្សាន្តក្នុងខេត្តសៀមរាបរបស់យើង។
លោក អភិបាលរងខេត្តបានបន្តថា៖ នៅក្នុងឆ្នាំ២០២៤នេះរដ្ឋបាលខេត្តបានខិតខំជម្រុញឱ្យមានការសហការគ្នារវាងអន្តរវិស័យដែលពាក់ព័ន្ធក្នុងស្មារតីទទួលខុសត្រូវ និងគោលដៅតែមួយ ការខិតខំពង្រឹងគុណភាពសេវាកម្មទេសចរណ៍ ការអភិវឌ្ឍន៍ផលិតផលទេសចរណ៍ថ្មីៗក្នុងខេត្ត និងការរៀបចំតំបន់អង្គរឱ្យក្លាយជាគោលដៅទស្សនាប្រកបដោយគុណភាព ដោយមានការគាំទ្រដោយរាជរដ្ឋាភិបាល និងក្រសួងទេសចរណ៍។
លោក ChenCong ទីប្រឹក្សានៃស្ថានទូតចិនប្រចាំកម្ពុជា មានប្រសាសន៍ថា៖ប្រធានបទនៃវេទិកាថ្ងៃនេះគឺ សំដៅធ្វើឱ្យទីផ្សារទេសចរណ៍របស់ប្រទេសចិនរស់ឡើងវិញនៅកម្ពុជា ដែលសមស្របនឹងកង្វល់របស់ភាគីទាំងពីរ ហើយសង្ឃឹមថា តាមរយៈវេទិកានេះ យើងអាចបង្កើតនូវចំណុចប្រទាក់ក្រឡាគ្នា អំពីវិធីសាស្រ្តបន្ថែមទៀត និងឈានដល់ការព្រមព្រៀងកិច្ចសហប្រតិបត្តិការជាក់ស្តែង តាមតែអាចធ្វើទៅបានបន្ថែមទៀតស្របតាមឆន្ទៈក្នុងការពង្រឹងទំនាក់ទំនង និងកិច្ចសហប្រតិបត្តិការជាមួយក្រសួងទេសចរណ៍ និងនាយកដ្ឋានផ្សេងទៀត ដើម្បីសិក្សាអំពីយន្តការការងារដ៏ទូលំទូលាយ ជំរុញនិងលើកទឹកចិត្តភ្ញៀវទេសចរចិនចូលមកកម្ពុជាកាន់តែច្រើន។
ថ្លែងបើកអង្គវេទិកាឯកឧត្តម ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍មានប្រសាសន៍ថា៖ការរៀបចំវេទិកានេះ ពិតជាឆ្លុះបញ្ចាំងឲ្យឃើញនូវការយកចិត្តទុកដាក់ខ្ពស់របស់ប្រមុខរដ្ឋាភិបាលប្រទេសទាំងពីរ ពិសេសកិច្ចសហការល្អរវាងក្រសួងទេសចរណ៍កម្ពុជា ស្ថានទូតចិន និងបណ្តារដ្ឋបាលខេត្ត-ក្រុងនានារបស់ប្រទេសចិន ក្នុងការពង្រឹង និងពង្រីកចំណងមិត្តភាពកម្ពុជា-ចិន ស្របតាមស្មារតីមិត្តដែកថែប និងសហគមន៍វាសនារួមកម្ពុជា-ចិន ប្រកបដោយភាពស៊ីជម្រៅ និងភាពជាក់ស្តែង ក៏ដូចជាក្របខ័ណ្ឌកិច្ចសហប្រតិបត្តិការត្បូងពេជ្ររវាងកម្ពុជា-ចិន ដែលផ្តោតលើ វិស័យអាទិភាពចំនួន៦ ក្នុងនោះរួមបញ្ចូលទាំងការផ្លាស់ប្តូរប្រជាជន និងប្រជាជនផងដែរ។
ឯកឧត្តម បានវាយតម្លៃខ្ពស់នៃយុទ្ធនាការ ឆ្នាំ នៃការផ្លាស់ប្តូរប្រជាជន និងប្រជាជន កម្ពុជា-ចិន ឆ្នាំ២០២៤ និងវេទិកាទេសចរណ៍ កម្ពុជា-ចិន ឆ្នាំ២០២៤នេះ ហើយសូមគាំទ្រឱ្យមានការ រៀបចំវេទិកានេះជារៀងរាល់ឆ្នាំ។ ឯកឧត្តម រដ្ឋលេខាធិការបានស្នើ ដល់ភាគីពាក់ព័ន្ឋឱ្យមានកិច្ចសហការស្អិតរមួតរវាងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ផ្នែកឯកជនកម្ពុជា និងផ្នែកឯកជនប្រទេសចិន ពិសេសក្រុមហ៊ុនទេសចរណ៍ចិន ដើម្បីជំរុញការផ្សព្វផ្សាយ និងការរៀបចំកញ្ចប់ទស្សនកិច្ចរួមគ្នា សំដៅជំរុញលំហូរភ្ញៀវទេសចរប្រទេសទាំងពីរ៕
អត្ថបទ និងរូបភាព ៖ យូ វង្ស និងជា ស្រស់ ឈិត សាវី
កែសម្រួល ៖ ហាំ ម៉េងហួត
