កិច្ចប្រជុំបច្ចេកទេសលើកទី៩របស់គណៈកម្មាធិការICC-ព្រះវិហារដើម្បីតាមដាន និងត្រួតពិនិត្យការងារអភិរក្ស និងអភិវឌ្ឍន៍តំបន់រមណីយដ្ឋានប្រាសាទកោះកេរ និងប្រាសាទព្រះវិហារ ដែលមានការជួយពីប្រទេសចិន និងប្រទេសឥណ្ឌា សហរដ្ឋអាមេរិក នឹងបន្ដជួសជុលប្រាសាទព្រះវិហារ ដើម្បីថែរក្សាកេរិ៍តំណែលខ្មែរឱ្យគង់វង្ស ដល់កូនខ្មែរជំនាន់ក្រោយបានស្គាល់ ខណៈដែលប្រាសាទបុរាណមួយនេះ មានអាយុកាលជាងមួយពាន់ឆ្នាំមកហើយ ដែលកិច្ចប្រជុំនេះធ្វើឡើងពេញមួយថ្ងៃ នាថ្ងៃទី១៨ ខែកញ្ញា ឆ្នាំ២០២៤ ក្នុងខេត្តសៀមរាប។
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ទទួលបន្ទុកបេតិកភណ្ឌ មានប្រសាសន៍ថា នៅក្នុងប្រជុំអាស៊ីស៊ីព្រះវិហារនេះ ប្រទេសចិន និងប្រទេសឥណ្ឌា បានបង្ហាញនូវសេចក្ដីប្ដេជ្ញាបន្ដការជួសជុលប្រាសាទព្រះវិហារបន្ថែមទៀត ដែលក្នុងនោះ ប្រទសចិនបន្ដជួសជុលនៅគោបុរៈទី១ទី២និងទី៣ ខណៈដែលខ្លួនបានបញ្ចប់ការសិក្សាបឋមលើហានិភ័យរចនាសម្ព័ន្ធគោបុរៈទាំងបីនោះ ហើយកំពុងរៀបចំផែនការដើម្បីធ្វើអន្តរាគមន៍។ដោយឡែកប្រទេសឥណ្ឌា បានសហការជាមួយវិទ្យាស្ថានបច្ចេកវិទ្យាកម្ពុជា សិក្សាស៊ីជំរៅលើការរៀបចំផែនការគ្រប់គ្រងទឹក ការសិក្សាភូគព្ភសាស្ត្រ ការសិក្សាអំពីថ្មភ្នំ និងជម្រាលភ្នំធម្មជាតិ ដែលជាមូលដ្ឋានគ្រឹះសំខាន់សម្រាប់ការរៀបចំផែនការអភិរក្សគោបុរៈទី៥ ខណៈដែលសហរដ្ឋអាមេរិកបន្តជួយជួសជុលជណ្តើរបុរាណខាងជើងប្រាសាទព្រះវិហារ ក្នុងដំណាក់កាលទី៤ ដែលកំពុងអនុវត្តដោយមន្ត្រីជំនាញអាជ្ញាធរជាតិព្រះវិហារ និងកម្ពុជាកំពុងជួសជុលគោបុរៈទី៤។
ព័ត៌មានជាតិ ថ្មីៗ
លោកជំទាវបានបន្ដថា ក្រៅពីនេះ ដៃគូសហប្រតិបត្តិការអន្តរជាតិ របស់អាជ្ញាធរជាតិព្រះវិហារ គឺសាលា បារាំងចុងបូព៌ា បានបង្ហាញពីវឌ្ឍនភាពនៃការងារជួសជុលរូបបដិមាព្រះសិវៈរាំ និងវិទ្យាស្ថាន MPI របស់អាឡឺម៉ង់ បានបង្ហាញពីការរុករកប្រវត្តិ នៃការតាំងទីលំនៅបុរាណកោះកេរ ដល់អង្គប្រជុំផងដែរ។
ជាមួយគ្នានេះ អង្គប្រជុំក៏បានវាយតម្លៃខ្ពស់ចំពោះការវិវឌ្ឍន៍នូវចំណេះដឹង និងជំនាញអភិរក្សរបស់ មន្ត្រីអាជ្ញាធរជាតិព្រះវិហារ ចំពោះការអភិរក្ស និងជួសជុលប្រាសាទបល្ល័ង្គត្បូង និងប្រាសាទក្រចាប់ នៅរមណីយដ្ឋានកោះកេរ ស្របតាមគោលការណ៍អភិរក្សបេតិកភណ្ឌពិភពលោក ហើយបានស្នើឲ្យអាជ្ញាធរជាតិព្រះវិហារ បន្តពង្រីកក្រុមការងារអភិរក្សបន្ថែមទៀត ដើម្បីអន្តរាគមន៍ទាន់ពេលវេលាចំពោះប្រាសាទផ្សេងៗទៀតនៅក្នុងរមណីយដ្ឋានប្រាសាទព្រះវិហារ និងប្រាសាទកោះកេរ ដែលមានចំនួនប្រាសាទច្រើនទៀតត្រូវការយកចិត្តទុកដាក់។
ជាមួយគ្នានោះ កិច្ចប្រជុំរបស់គណៈកម្មាធិការសម្របសម្រួលអន្តរជាតិដើម្បីការពារនិងលើកតម្លៃរមណីយដ្ឋានវប្បធម៌ធម្មជាតិនៃប្រាសាទព្រះវិហារ (ICC-ព្រះវិហារ)ដឹកនាំដោយសហប្រធានចិន និងសហប្រធានឥណ្ឌា និងមានតំណាងរដ្ឋសមាជិកចំនួន៤ប្រទេស រួមមាន បែលហ្សិក បារាំង ជប៉ុន និងសហរដ្ឋអាមេរិក ព្រមទាំងមានការចូលរួមផ្ទាល់ពីស្ថាប័នជាតិ និងអន្តរជាតិ អាជ្ញាធរជាតិអប្សរា អាជ្ញាធរជាតិសំបូរព្រៃគុក អ្នកស្រាវជ្រាវជាតិ និងអន្តរជាតិសរុប ប្រមាណ១០០រូប និងចូលរួមតាមប្រព័ន្ធ Online ចំនួន ២២រូប ដើម្បីតាមដាន និងត្រួតពិនិត្យការងារ អភិរក្ស និងអភិវឌ្ឍន៍តំបន់រមណីយដ្ឋានប្រាសាទកោះកេរ ដែលអនុវត្តដោយអាជ្ញាធរជាតិព្រះវិហារ និងដៃគូអន្តរជាតិ៕
សូមជម្រាបថា កិច្ចប្រជុំអាយស៊ីស៊ីព្រះវិហារនេះ មានការបំពាក់មេដាយ និងគ្រឿងឥស្សរិយយសរបស់រាជរដ្ឋាភិបាល ជូនដល់អ្នកជំនាញជាតិ និងអន្តរជាតិ ដែលបានជួយដល់ការលើកកម្ពស់ការអភិរក្ស និងអភិវឌ្ឍន៍នៅក្នុងរមណីយដ្ឋានទាំងពីរ ព្រមជាមួយថ្នាក់ដឹកនាំ មន្ត្រី ពលករ ភ្នាក់ងារទេសចរណ៍ និងសន្តិសុខអភិរក្ស នៃអាជ្ញាធរជាតិព្រះវិហារចំនួន៤៥រូបផងដែរ។
អត្ថបទ និងរូបភាព ៖ យូ វង្ស និងឈិត សាវី
កែសម្រួល ៖ ហាំ ម៉េងហួត
