នៅព្រឹកថ្ងៃទី១៩ ខែកញ្ញា ឆ្នាំ២០២៤នេះ គណៈកម្មាធិការទីក្រុងឆ្លាតវៃ(SCC) និងគណៈកម្មាធិការសម្របសម្រួលរួម JCC បានបើកកិច្ចប្រជុំលើកទី៦ នៃគម្រោងអនុវត្តវិធីសាស្ត្រទីក្រុងឆ្លាតវ៉ៃ ដើម្បីដោះស្រាយបញ្ហាទីក្រុង ក្នុងខេត្តសៀមរាប និងចុះហត្ថលេខាលើកំណត់ត្រា នៃកិច្ចប្រជុំ MR រវាងរដ្ឋបាលខេត្តសៀមរាប និងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន(JICA) ដើម្បីត្រួតពិនិត្យវឌ្ឍនភាពនៃគម្រោងសកម្មភាពនាពេលអនាគត។ ដឹកនាំកិច្ចប្រជុំដោយលោក លី សារី អភិបាលរងខេត្តសៀមរាប និងលោកស្រី មីយូរ៉ា យុស៊ិកុ(Miura Yoshiko) តំណាង JICA ប្រចាំប្រទេសកម្ពុជា ព្រមទាំងលោក លោកស្រីតំណាងក្រសួងមហាផ្ទៃ ក្រសួងប្រៃសណីយ៍ និងទូរគមនាគមន៍ តំណាងមន្ទីរ‑អង្គភាពពាក់ព័ន្ធ និងភាគី JICA មួយចំនួនទៀតតាម online ផងដែរ។
លោក លី សារី អភិបាលរងខេត្តសៀមរាប បានមានប្រសាសន៍ថា រដ្ឋបាលខេត្តសៀមរាប បានទទួលនូវជំនួយកិច្ចសហប្រតិបត្តិការបច្ចេកទេសពីទីភ្នាក់ងារសហប្រតិបត្តិការអន្តរជាតិជប៉ុន(JICA) អស់រយៈពេលជាង៤ឆ្នាំមកហើយ ទៅលើការសិក្សា និងរៀបចំផែនការយុទ្ធសាស្រ្តអភិវឌ្ឍន៍ទីក្រុងសៀមរាបនៃខេត្តសៀមរាបឱ្យក្លាយទៅជាទីក្រុងឆ្លាតវៃ នឹងសក្តិសមជាទីក្រុងសមាជិក នៃបណ្តាញទីក្រុងឆ្លាតវៃអាស៊ាន(ASEAN Smart City Network) តាមរយៈការសិក្សាស្វែងរកបញ្ហាប្រឈម និងបានរៀបចំជាផែនទីបង្ហាញផ្លូវ «សៀមរាបឆ្លាតវៃ»។
លោកបានបន្តថា៖ ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន បានសហការ និងគាំទ្រយ៉ាងពេញទំហឹងដល់រដ្ឋបាលខេត្ត ក្នុងការដាក់ឲ្យអនុវត្តគម្រោងសាកល្បងទីក្រុងឆ្លាតវៃចំនួន៨ ក្នុងក្រុងសៀមរាប រួមមាន១. ការកែលម្អការប្រមូលសំរាម ២. ការត្រួតពិនិត្យការចតយានយន្តខុសច្បាប់ ៣. ឌីជីថលនីយកម្ម នៃស្ថិតិទេសចរណ៍ ៤. ប្រព័ន្ធតាមដានលំហូរឯកសារផ្ទៃក្នុងរបស់រដ្ឋបាលខេត្ត ៥. គម្រោងត្រួតពិនិត្យបរិស្ថានទីក្រុងដោយប្រើប្រាស់ឧបករណ៍ចាប់សញ្ញា ៦. កិច្ចសហការរវាងរដ្ឋ និងឯកជនក្នុងវិស័យ ទេសចរណ៍ ៧.ការប្រមូល និងដឹកជញ្ជូនសំរាមឆ្លាតវៃ និង៨.ថ្នាលទិន្នន័យទីក្រុងឆ្លាតវៃសៀមរាប ដែលក្នុងនោះគម្រោងមួយចំនួនបានបញ្ចប់ ហើយគម្រោងមួយចំនួនទៀត បាននឹងកំពុងអនុវត្ត និងដំណើរការស្របតាមផែនការរបស់គម្រោង។
នៅក្នុងកិច្ចប្រជុំក៏មានការធ្វើបទបង្ហាញពីក្រុមការងារជំនាញនៃទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន និងក្រុមការងាររដ្ឋបាលខេត្តសៀមរាប អំពីវឌ្ឍនភាពគម្រោងទីក្រុងឆ្លាតវៃ ព្រមទាំងមានការចុះហត្ថលេខាលើកំណត់ត្រា នៃកិច្ចប្រជុំ MR រវាងរដ្ឋបាលខេត្តសៀមរាបនិងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA)ដោយលោក លោក លី សារី អភិបាលរងខេត្តសៀមរាប និងជាមួយលោកស្រី មីយូរ៉ា យុស៊ិកុ(Miura Yoshiko)តំណាងJICA ប្រចាំប្រទេសកម្ពុជា ផងដែរ ៕
អត្ថបទ និងរូបភាព ៖ ធន់ ពូថេ
កែសម្រួល ៖ ហាំ ម៉េងហួត
